Read Birifor, Malba 2 Tɛsaloniki Sɛbɛ 3 Bible Online

2 Tɛsaloniki Sɛbɛ 3 - Birifor, Malba bible

2 Tɛsaloniki Sɛbɛ 3

¹Yɛɛr, a ƴɛ̃ƴɛrɩ̃ na, nyɩ́ sʋɔrɔ a Naaŋmɩn ƴɔnɔ sɩ, a mɩnɛ a Naaŋmɩn ƴɛrɩ̃ na tʋɔrɔ yɛrɛ pɔwrɔ a jiir a jaa fɔfɔw, ɩ̃ a nɩbɛ na ƴɔnɔ a ƴɛrɩ̃ ʋlɔ, wɔ̃ taa nɩ a mɩnɛ a na dãa maal a nyɩ jie.

²Nyɩ́ lɛ sʋɔrɔ a Naaŋmɩn ʋ faa sɩ a nɩ-burbur nɩ a nɩ-faar jie, a-na-ɩ aa ɩ a nɩbɛ ba jaa ɩ̃ ma tɛrɛ a ƴɔ̃w-nyãa wa.

³Ɩ̃-cɛ a Nɩ-kpɛ̃ɛ ɩ na dẽdẽ. Ʋ na kʋ nyɩ na a fãgã, ɩ̃ mɩ gu nyɩ tɛɛlɛ a Fãa Sʋbɔ jie.

⁴Sɩ barʼã nyãa a Nɩ-kpɛ̃ɛ pʋɔ, bɔ̃w ka nyɩ ma maala na a ala sɩ na dãa yel nyɩ, ɩ̃ nyɩ na cãa na maala a lɛ.

⁵A Nɩ-kpɛ̃ɛ ú tɔw a nyɩ sube kpɛ nɩ a Naaŋmɩn nʋfʋ pʋɔ, nɩ a *Kirisi su-nyɔwraa pʋɔ.

⁶Yɛɛr, a ƴɛ̃ƴɛrɩ̃ na sɩ yel nyɩ na nɩ a sɩ Nɩ-kpɛ̃ɛ *Jeeju-Kirisi yuor, nyɩ́ taw yi a yɛɛr bala ba jaa na kpɛ a tõtol jie, na ma mɩ cere tuure nɩ a jaanfʋ ʋlɔ sɩ na dãa jaan nyɩ wa.

⁷Nyɩmɩ mɩ̃ɛ bɔ̃w na a mɩnɛ nyɩ na sɛw na tɔɔnɔ sɩ, a-na-ɩ saa dãa ɩ tõtol deme a nyɩ sɔ̃w wa.

⁸Saa dãa sɔw dɩ nɩrɛ bom a pɔrɔ wa, ɩ̃ sɩ ɛ̃ɛ na dãa dɩ a tuo ɩ̃ tʋnɔ nɩ kpɛ̃w a mɔtɔ̃w nɩ a tɩsɔw, a mɩnɛ a sɩ kɔ̃ wa ƴɔ̃w nɩrɛ kãw won wa.

⁹Aa ɩ saa dãa tɛrɛ sɔr na de a nyɩ bom wa, ɩ̃-cɛ sɩ dãa na bʋɔrɔ sɩ maala a lɛ ɩ nyɩ bõ-tɔɔnaa.

¹⁰A-na-ɩ a lɛdaar sɩ na dãa cãa be a nyɩ sɛ̃, sɩ dãa na yel nyɩ áa nɩrɛ ma bʋɔrɔ a tʋmɔ wa, ʋ taa mɩ dɩrɛ a bom wa.

¹¹A-na-ɩ sɩ wõ na a ba yel áa ŋmɛɛ be na a nyɩ sɔ̃w na kpɛ a tõtol, á baa maala bom, ɩ̃ a ala ma ɩ a nɩbɛ jʋʋrfʋ tɛw ʋ wa.

¹²A bana nɩbɛ naa, sɩ yele ba na kpãkpana nɩ ba, nɩ a sɩ Nɩ-kpɛ̃ɛ Jeeju-Kirisi yuor, á bá tɛrɛ a ba mɩ̃ɛ tʋmɔ tʋnɔ guolo nɩ a ba mɩ̃ɛ.

¹³Yɛɛr, a ala ɩ a nyɩmɩ ʋ, nyɩ taa wa bala a vɩlaa maalfʋ ɩnɛ wa.

¹⁴A ala ɩ a nɩrɛ mɔɔ sɔw a jaanfʋ asɩmɛ sɩ na kʋ nyɩ a sɛbɛ na pʋɔ wa, nyɩ́ bɔ̃w nɩ a nɩrɛ ʋlɔ, ɩ̃ nyɩ taa wa beree taa nɩ ʋ bom wa, a mɩnɛ a vĩ na nyɔw ʋ.

¹⁵Nyɩ́ taa wa de ʋ ʋ ɩ nyɩ san-sʋbɔ wa, ɩ̃-cɛ nyɩ́ mana ʋ a yɛ̃, a-na-ɩ nyɩ yɛbɛ ʋ ɩ.

¹⁶A Nɩ-kpɛ̃ɛ ʋlɔ na tɩɩrɛ a pɩɛnfʋ, a ala saarɩ̃ wɔ̃ mɩnɛ, a ʋlɔ mɩ̃ɛ, ú kʋ nyɩ a pɩɛnfʋ. A Nɩ-kpɛ̃ɛ ú be nɩ nyɩ nyɩ jaa.

¹⁷A maa mɩ̃ɛ Pol nuu ɩ̃ sɛb puor nyɩ. Nyɩ́ nyɛ a mɩnɛ ɩ̃ na ma sɛb. A ʋlɔ ɩ̃ ɩ a jɩbaa a ɩ̃ sɛbsɩ a jaa pʋɔ.

¹⁸A sɩ Nɩ-kpɛ̃ɛ *Jeeju-Kirisi sũofʋ ú be a nyɩ jie nyɩ jaa fɛw.