Read Birifor, Malba 1 Timote Sɛbɛ 4 Bible Online

1 Timote Sɛbɛ 4 - Birifor, Malba bible

1 Timote Sɛbɛ 4

¹A Naaŋmɩn Sɩɛ yel sɩ na cãa pʋɔ, áa baarfʋ daar wa tara, a nɩŋmɛɛ na ŋmaa na yi a puorfʋ pʋɔ, ɩ̃ cɛlɛ a sɩ-kpansɩ na bɛlɛ ba, ɩ̃ mɩ sɔwrɔ a ƴɛrɩ̃sɩ ala a kɔ̃tɔnsɩ na jaana ba.

²A asɩmɛ yi na a poe ayi deme jie na mana a jir-ƴɛrɩ̃sɩ, a nɩbɛ bala a mɩ̃ɛ-bɔ̃wfʋ na sãw wɔ̃ taa nɩ vũu fal a Satã na ƴɔ̃w ba a ɩ a jɩbaa.

³A nɩbɛ bala yelʼã áa kul-taa ciire na, ɩ̃ mɩ jaana a nɩbɛ a ba taa dɩrɛ a yele ŋmɛɛ wa. Ɩ̃-cɛ a Naaŋmɩn maalʼã a yele a jaa, a mɩnɛ a popuorbo bala na bɔ̃w a yel-mɩ̃ɛ na tʋɔ puor ƴɔ̃w, ɩ̃ dɩ.

⁴A-na-ɩ a yele a jaa a Naaŋmɩn na maal ɩ na bõ-son. Bom ma be be na ɩ bõ-jaaraa wa, ɩ̃-cɛ sɩ ma dɩrɛ puoro nɩ ʋ.

⁵A Naaŋmɩn ƴɛrɩ̃ nɩ a Naaŋmɩn sʋɔrfʋ lɩɛb ʋ na ʋ ɩ bõ-son.

⁶A fʋ̃ʋ wa de a yele asɩmɛ man kʋ a yɛɛr, fʋ na ɩ na a *Jeeju-Kirisi tʋ̃tʋ̃-vɩlaa, ɩ nɩ a nɩrɛ ʋlɔ na guolo a ʋ mɩ̃ɛ nɩ a Naaŋmɩn ƴɛrɩ̃sɩ nɩ a jaan-vɩlaa fʋ na tu.

⁷Ɩ̃-cɛ, jaar a ana kpurĩ-pɔrsɩ a pɔɔ-nyan na ma kpure, ɩ̃ ƴɔ̃w kpɛ̃w a Naaŋmɩn sɔr pʋɔ.

⁸A-na-ɩ a ɩ̃gan kpɛ̃w pɔwfʋ vɩɛlɛ na a daar fɩ̃ɩ pʋɔ tɛw, ɩ̃-cɛ a Naaŋmɩn sɔr tufʋ vɩɛlɛ na a yele a jaa pʋɔ, a-na-ɩ ʋ pʋlɩ̃ nɩ sɩ na a baafʋ ʋlɔ sɩ na tɛrɛ a ƴɛ̃ƴɛrɩ̃ na nɩ a ʋlɔ sɩ nɔɔ tɛrɛɛ a nɩdaar.

⁹A yel-mɩ̃ɛ ƴɛrɩ̃ nɩ a naa, na sɛw sɩ sɔw de nɩ a sɩ suur ʋ jaa.

¹⁰A ala ɩnɛ sɩ tʋnɔ dɩrɛ nɩ a tuo, a-na-ɩ sɩ barʼã a sɩ tɩɛrɩ̃sɩ ƴɔ̃w a baafʋ Naaŋmɩn nuumɩ na ɩ a nɩbɛ ba jaa Fafaara; ɩ̃ a bala na tɩɛrɛ ʋ, bala ʋ sɩrɩ̃ faa.

¹¹Kpãkpana nɩ ba, ɩ̃ mɩ jaana ba a yele asɩmɛ a jaa.

¹²Taa ɩ nɩrɛ ʋ kpɛrɛ fʋ a-na-ɩ polbile fʋ ɩ wa, ɩ̃-cɛ fʋ̃ ɩ bõ-tɔɔnaa a popuorbo jie, a fʋ ƴɛrɩ̃sɩ pʋɔ, nɩ a fʋ maalfʋ pʋɔ, nɩ a fʋ nʋfʋ pʋɔ, nɩ a fʋ ƴɔ̃w-nyãa pʋɔ, nɩ a mɩnɛ fʋ na ɩrɛɛ nɩ a cɛcɛ.

¹³A lɛ fʋ na cãa gure ma, bɔ̃w cɛlɛ tɔ ꞌwuoro a Naaŋmɩn Sɛbɛ jawra nɩ a nɩbɛ, mɩ jaana nɩ ba.

¹⁴Taa mele a tʋɔfʋ ʋlɔ a Naaŋmɩn Sɩɛ na kʋ fʋ wa, a ʋlɔ fʋ na dãa pɔw a lɛdaar a ni-dierbe na dãa dɔɔl fʋ a ba nur, ɩ̃ mɩ bʋʋ a Naaŋmɩn pʋ-tɩɛrʋ̃ a fʋ ɩnɛ.

¹⁵Bɔ̃w cɛl tɔ ƴɔ̃w a fʋ mɩ̃ɛ a ana tʋmɔ naa pʋɔ, maala nɩ a mɩnɛ a nɩbɛ ba jaa na nyɛ bɔ̃w ka a fʋ tʋmɔ vɩɛlɛ na.

¹⁶Bɔ̃w ꞌwuoro a fʋ mɩ̃ɛ, nɩ a fʋ jaanfʋ, ɩraa nɩ a ala pʋɔ cĩcĩ, a-na-ɩ a fʋ̃ʋ maala a lɛ, fʋ na faa na a fʋ mɩ̃ɛ nɩ a bala na cɛlɛ fʋ.