Read Birifor, Malba Tɩtɩ Sɛbɛ 2 Bible Online

Tɩtɩ Sɛbɛ 2 - Birifor, Malba bible

Tɩtɩ Sɛbɛ 2

¹Ɩ̃-cɛ a fʋ̃ʋ, mana a ala na tuure taa nɩ a jaan-son.

²Yel a dab-koro á bá tɛrɛ a yɛ̃, ɩ nɩ nɩ-hɛlɛlɛ, ɩ̃ mɩ ɩ cɛcɛlbɛ, bɔ̃w ɩraa nɩ cĩcĩ a Naaŋmɩn ƴɛrɩ̃ pʋɔ, a nʋfʋ, nɩ a su-nyɔwraa pʋɔ.

³A lɛ ʋ mɩ, a pɔɔbɔ bala na kor, a ba cenfʋ á sɛw taa nɩ a bala na be a puorfʋ pʋɔ. A ba taa ɩ nɩ-korbo, mɩɩ a dãa gbãgbaar wa, ɩ̃-cɛ bá ɛ̃ɛ ɩ a ƴɛr-son-manba,

⁴a mɩnɛ a ba na tʋɔ jaan a pɔɔbɔ a ba nʋnɔ a ba sɩrbɛ nɩ a ba bibiir,

⁵bɔ̃w tɛrɛ nɩ a ba mɩ̃ɛ, ɩ nɩ cɛcɛ, bɔ̃w tʋnɔ a tʋmɔ a yir pʋɔ, a ba mɩ ɩ a pɔɔ-sono na wono a ba sɩrɛ toor, a mɩnɛ a nɩrɛ kɔ̃ wa kpɛrɛ a Naaŋmɩn ƴɛrɩ̃ wa.

⁶A lɛ ʋ mɩ a polbil jie, kpãkpana ba a ba bɔ̃w tɛrɛ a ba mɩ̃ɛ.

⁷Ɩ̃ a fʋ̃ʋ mɩ, fú ɩ a bõ-tɔɔnaa a tʋ̃-vɛlɛ a jaa ɩnɛ; a fʋ jaanfʋ ʋ taa tɛrɛ saanaa wa. Fú ɩ nɩ-hɛlɛlɛ,

⁸tɛrɛ a yel-mɩ̃ɛ ƴɛrɩ̃sɩ, a mɩnɛ a sama-deme kɔ̃ nyɛ korfʋ jie, a vĩ na nyɔw ba, a-na-ɩ baa nyɛ a cɛfʋ jie wa.

⁹A gbãgbaar sɛw na na jɔrɔ a ba nɩ-bɛrɛ, maala a ala na nʋmɔ ba a yele a jaa pʋɔ. Baa sɛw na ma cɩɩrɛ ba wa,

¹⁰mɩɩ ma fara ba yele wa, ɩ̃ ba ɛ̃ɛ na sɛw ba miile a ba maal-bie pʋɔ á ba ɩ na nɩ-sono nɩ nɩ-dẽdẽsɩ, a mɩnɛ a nɩbɛ na ƴɔnɔ a sɩ Fafaara Naaŋmɩn jaanfʋ a ba maalfʋ a jaa pʋɔ.

¹¹A-na-ɩ a Naaŋmɩn sũofʋ ʋlɔ na ɩ a faafʋ a nɩbɛ ba jaa jie nyɩrʼã cãa pʋɔ,

¹²ma jaana sɩ a sɩ kɔ̃ jaar a Naaŋmɩn sɔr bar, mɩɩ kɔ̃ jɩɛlɛ a tẽw pʋɔ yele wa, ɩ̃-cɛ a sɩ na ɩ cɛcɛlbɛ a ka a tẽw na pʋɔ, ɩ nɩ nɩ-torisɩ, ɩ̃ mɩ ɩ a dẽdẽ a puorfʋ sɔr pʋɔ.

¹³A ƴɛ̃ƴɛrɩ̃ na, sɩ tɛrɛ na tɩɛrɩ̃-daadaa a Naaŋmɩn jie, cɛlɛ nɩ a bibir ʋlɔ a *Jeeju-Kirisi ʋlɔ na ɩ a Nɩ-kpɛ̃ɛ Naaŋmɩn nɩ a sɩ Fafaara nɔɔ nyɩrɛ nɩ a ʋ yo-yifʋ.

¹⁴Ʋ tɩɩrʼã a ʋ mɩ̃ɛ a sɩ ɩnɛ, na tʋɔ da sɩ faa a yel-faar a jaa pʋɔ, ɩ̃ pɛw sɩ bar a sɩ ɩ a ʋ mɩ̃ɛ tɛw ben, mɩ ɓĩɓine a tʋ̃-vɛlɛ a jaa maalfʋ ɩnɛ.

¹⁵A nɔhɔ̃ ɩ̃ sɛw a fʋ na man ba, kpãkpana nɩ ba, ɩ̃ gala ba nɩ a kpɛ̃w ʋlɔ a Naaŋmɩn na kʋ fʋ. Taa wa ɩ a nɩrɛ ʋ kpɛrɛ fʋ wa.