Read Birifor, Malba Eburo Sɛbɛ 10 Bible Online

Eburo Sɛbɛ 10 - Birifor, Malba bible

Eburo Sɛbɛ 10

¹A Jufisɩ ƴɛr-kpɛn ma ɩ a bõ-son tɔr jaa wa, ɩ̃ a yel-vɛlɛ ala na waara dãadiile ʋ. ꞌWaa tʋɔrɔ maala a bala na pɩɛlɛ a Naaŋmɩn a ba ɩrɛ a cɛcɛ nɩ a ba baar-lo-yele ba na tɩɩrɛ a yomo a jaa ma tɛrɛ a baarfʋ wa.

²A ala dãa ɩ a bala na puoro a Naaŋmɩn a nɔhɔ̃ sube dãa na pɛɛr, a ba tɩɛrɩ̃sɩ kãa lɛ dãa ƴɔnɔ ba ƴɛrɩ̃sɩ a maal-fãa kãw ɩnɛ wa, ɩ̃ ba naa barʼã a baba ala lofʋ.

³Ɩ̃-cɛ, a ana baar-lo-yele ma ɛ̃ɛ na jawra ba a ba maal-faar a yomo yomo.

⁴A-na-ɩ a nadɛɛ nɩ a bʋdɛɛ jɩ̃ɩ ma tʋɔrɔ ire a nɩbɛ maal-faar bara fɩ̃ɩ wa.

⁵Ala-ɩ̃-sɔ, a lɛdaar a *Kirisi na dãa kpɛɛrɛ a tẽw pʋɔ ʋ yelʼã a Naaŋmɩn: “Faa bʋɔrɔ baar-lo-bom nɩ nɩrɛ bõ-pɔrɔ wa, ɩ̃-cɛ fʋ mɛ ma na ɩ̃ tɛrɛ a ɩ̃gan.

⁶Faa nʋ a dʋn ba na gbɔw a kab wa, nɩ a baba ba na lo a maal-fãa de-barfʋ ɩnɛ wa.

⁷Ala-ɩ̃-sɔ ɩ̃ yel: ‘Fʋ̃ʋ Naaŋmɩn, nyɛ ma! Ɩ̃ wa na na maal a ala fʋ na bʋɔrɔ, tu nɩ a ala na sɛb a ɩ̃ ɩnɛ a ƴɛr-kpɛn sɛbɛ pʋɔ.’ ”

⁸Ʋ yelʼã sɛr: “Faa bʋɔrɔ baar-lo-bom nɩ nɩrɛ bõ-pɔrɔ wa. Faa mɩ nʋ a dʋn ba na gbɔw a kab, nɩ a baba ba na lo a maal-fãa de-barfʋ ɩnɛ wa.” Ɩ̃-cɛ a ala a jaa maalʼã tu nɩ a ƴɛr-kpɛn.

⁹Ɩ̃ a mɩnɛ ʋ na yel a lɛ baar ʋ lɛ yelʼã go: “Fʋ̃ʋ Naaŋmɩn, nyɛ ma! Ɩ̃ wa na na maal a ala fu na buɔrɔ.” A nɔhɔ̃ a Naaŋmɩn sãw na a dãdãw baar lofʋ, a mɩnɛ ʋ na tʋɔ de a Kirisi mɩ̃ɛ lɩɛrʼɩ̃ ʋ.

¹⁰A-na-ɩ a Kirisi maalʼã a ala a Naaŋmɩn na buɔrɔ baar, a mɩnɛ ʋ na de a ʋ mɩ̃ɛ ɩ̃gan ʋ lɩɛb ɩ a baar-lo-bom a gbɛ-daa a daar a jaa ɩnɛ, pɛɛrʼɩ̃ a sɩ maal-fãa bar, ow nɩ sɩ a kpee a sɩ ɩ a ʋ ben.

¹¹A Jufisɩ baar-lorbo ba jaa ma irʼã ɩraa tʋnɔ a ba tʋmɔ a bibie a jaa, loro a ana baba a daar a jaa na ma tʋɔrɔ diere nɩrɛ maal-fãa bara fɩ̃ɩ wa.

¹²Ɩ̃-cɛ a Kirisi ʋlɔ lo na a baar a gbɛ-daa a maal-faar ɩnɛ, na tɛrɛ a fãgã a daar a jaa, ɩ̃ pãa jɛ a Naaŋmɩn dʋrɩ̃ loor.

¹³Be ʋ jɛ cɛlɛ a ʋ sama-deme na lɩɛb ɩ a ʋ gbɛɛ dɔɔlfʋ jie.

¹⁴A-na-ɩ a mɩnɛ ʋ na tɩɩr a ʋ mɩ̃ɛ a gbɛ-daa, ʋ lɩɛbʼã a bala ʋ na pɛw a maal-fãa bar ɩ̃ ow ba kpee, a ba ɩ cɛcɛ.

¹⁵A Naaŋmɩn Sɩɛ mɩ man sɩ na a lɛ mɩ. A-na-ɩ ʋ yelʼã:

¹⁶“Nyɩ́ nyɛ a *pʋlɩ̃-taa yele ɩ̃ nɔɔ cɔɔrɔ nɩ a *Ɩsɩrayɛl nɩbɛ a lɛdaar a ana bibie nɔɔ tɔlɔ baara. Ɩ̃ na ƴɔ̃w na a ɩ̃ ƴɛrɩ̃sɩ a ba tɩɛrɩ̃sɩ pʋɔ, ɩ̃ mɩ sɛb a ɩ̃ ƴɛr-kpɛn ƴɔ̃w a ba sube pʋʋr. Lɛ a Nɩ-kpɛ̃ɛ yel.”

¹⁷Ɩ̃ ʋ lɛ yelʼã dɔɔl go: “Maa lɔɔ tɩɛrɛ nɩ a ba maal-fãa nɩ a ba cɛfʋ jiir go wa.”

¹⁸Ɩ̃ a ala ɩ a Naaŋmɩn de na a nɩrɛ maal-fãa bar kʋ ʋ, aa lɛ sɛw ʋ na tɩɩr a bom a ʋ maal-faar de-bar-kʋfʋ ɩnɛ go wa.

¹⁹Ala-ɩ̃-sɔ yɛɛr, sɩ barʼã nyãa a di-ciiraa pʋɔ kpɛfʋ a yi a *Jeeju jɩ̃ɩ ɩnɛ,

²⁰a mɩnɛ ʋ na yuo sɩ a sɔr paalaa na ɩ bõ-mimir, na po a cẽcen pɔwraa bar, a cẽcen ʋlɔ na ɩ a ʋ mɩ̃ɛ ɩ̃gan.

²¹Ʋlɔ ɩ̃ mɩ ɩ a *baar-lo-nɩ-kpɛ̃ɛ na tɛrɛ a Naaŋmɩn yir deme.

²²Ala-ɩ̃-sɔ nyɩ́ ɩ a sɩ taw ta pɩɛl a Naaŋmɩn nɩ a su-son, barʼɩ̃ tɩɛrʋ̃ jaa a sɩ ƴɔ̃w-nyãa ɩnɛ, tɛrɛ nɩ a suur ʋlɔ a Jeeju jɩ̃ɩ na cɔɔrɩ̃ ir a tɩɛrɩ̃-kpansɩ bar, mɩ tɛrɛ nɩ a ɩ̃gan ʋlɔ ba na pɛw nɩ a kʋ̃ɔ son.

²³Nyɩ́ ɩ a sɩ bɔ̃w ɩraa cĩcĩ a sɩ gufʋ tɩɛrʋ̃ son pʋɔ sɩ na dãa cã yel a nɩbɛ, a-na-ɩ a ʋlɔ na pʋlɩ̃ nɩ sɩ ɩ na dẽdẽ.

²⁴Á sɩ́ cɛlɛ taa, kpãkpana nɩ taa a nʋfʋ nɩ a tʋ̃-vɛlɛ ɩnɛ.

²⁵Á sɩ́ taa bara a sɩ kpaarɩ̃-taa pʋʋr cenfʋ wa, a mɩnɛ a nɩŋmɛɛ na mɩlɩ̃ nɩ a lɛbfʋ, ɩ̃-cɛ nyɩ́ ɛ̃ɛ kpãkpana taa, nyɩrɛ maala a mɩnɛ nyɩ na nyɛ a Nɩ-kpɛ̃ɛ bibir na pɩɛlɛ.

²⁶A ala ɩ ba jaan sɩ na a yel-mɩ̃ɛ a sɩ bɔ̃w baar, ɩ̃ cãa bɔ̃w nɩ maala a fãa, baar lofʋ ma lɛ be be na ire a maal-faar bara wa.

²⁷Ɩ̃-cɛ a ala na cɛ sɩ ɩ na sɩ́ jɛ nɩ dãbɩ̃ɛ gure nɩ a ƴɛrɩ̃ guorfʋ bibir, nɩ a vũu kpõ-kpõ na wa dɩrɛ a Naaŋmɩn sama-deme.

²⁸A Jufi nɩrɛ lɛ na wõw a Mowisi ƴɛr-kpɛn a toor, ɩ̃ a nɩbɛ ayi, mɩɩ ata ɩ̃ wa man a ala ʋ na maal, ba ma kú ʋ na ɩ̃ ma bɔ̃w ʋ nãw wa.

²⁹A ala ɩ a lɛ ʋ, nyɩ́ tɩɛr bɔ̃w a mɩnɛ a ʋlɔ na kpɛrɛ a Naaŋmɩn Bie kpãafʋ na nyɩrɩ̃ bɛlɩ̃. A-na-ɩ ʋ de na a jɩ̃ɩ ʋlɔ na deer a pʋlɩ̃-ta-paalaa ɩnɛ na mɩ pɛw a ʋ suur, ʋ ɩ ʋ pɔrɔ. A ʋ maalfʋ pʋɔ ʋ tʋ na a Naaŋmɩn maal-vɩlaa Sɩɛ.

³⁰Sɩ bɔ̃w na a sʋbɔ ʋlɔ na yel: “Maa ɩ̃ sɔ a san yawfʋ; maa ɩ̃ na lɩɛb ya ba.” A sʋbɔ ʋlɔ lɛ yelʼã go: “A Nɩ-kpɛ̃ɛ na guorʼã a ʋ nɩbɛ ƴɛrɩ̃.”

³¹A ɩ na dãbɩ̃ɛ a ʋlɔ jie na kpɛɛrɛ a Naaŋmɩn-mimir nuu pʋɔ!

³²Nyɩ́ cãa bɔ̃w nɩ a ana bibie na tɔl, a lɛdaar nyɩ na dãa pɔw a cãa a Naaŋmɩn jie, ɩ̃ mɩ pɔw a jɛb yayaw. Nyɩ dãa na cãa ɩraa cĩcĩ a ana won pʋɔ.

³³A daar kãw ba ma tʋrɔ nyɩ na, hʋɔlɔ nɩ nyɩ a nɩbɛ nii-sɔw. A daar kãw pʋɔ go, nyɩ ma lɩɛbʼã ɓã a bala ba na mɩ hʋɔlɔ.

³⁴Nyɩ dãa na pɔw a kasu deme nyɛ nɩ a nãw, ɩ̃ a mɩnɛ ba na fa a nyɩ yele, nyɩ sɔw na nɩ nʋ̃ɔ, ɩ̃ bar a ba de. A-na-ɩ nyɩ bɔ̃w na ka nyɩ tɛrɛ na yel-sono na vɩɛlɛ gãw a ala, na ma tɛrɛ baarfʋ daar wa.

³⁵Ala-ɩ̃-sɔ nyɩ taa bar a nyɩ tɩɛrʋ̃ son nyɩ na tɛrɛ wa, a-na-ɩ yar kpɛ̃ɛ gure nyɩ na a ʋ ɩnɛ.

³⁶A sɛw na a nyɩ na tɛrɛ su-nyɔwraa ɩraa nɩ, na tʋɔ maalʼɩ̃ a Naaŋmɩn pʋ-tɩɛrʋ̃, pɔw nɩ a ala ʋ na pʋlɩ̃ nɩ nyɩ.

³⁷A-na-ɩ, a mɩnɛ a Naaŋmɩn Sɛbɛ na yel: “A cɛ na fɩ̃ɩ, fɩ̃ɩ tɛw, ɩ̃ a ʋlɔ na waara na ta na. ꞌWaa kama wa.

³⁸Ɩ̃ a ʋlɔ na tor a ɩ̃ jie a ʋ ƴɔ̃w-nyãa ɩnɛ, ʋ na pɔw na a baafʋ. Ɩ̃-cɛ a ʋlɔ wa lɩɛb a parɩ̃, a ʋ ben kɔ̃ lɛ nʋmɔ ma wa.”

³⁹Ɩ̃ a sɩmɩ, saa be a bala pʋɔ na lɩɛbɛ a parɩ̃ bɔrɔ wa, ɩ̃-cɛ sɩ tɛrɛ na a ƴɔ̃w-nyãa be nɩ a faafʋ sɔr pʋɔ.