Read Birifor, Malba Eburo Sɛbɛ 11 Bible Online

Eburo Sɛbɛ 11 - Birifor, Malba bible

Eburo Sɛbɛ 11

¹A ƴɔ̃w-nyãa ɩ na a tɩɛrʋ̃ barfʋ a ala ɩnɛ a nɩrɛ na tɛrɛ a gufʋ tɩɛrʋ̃ son cɛlɛ nɩ, nɩ a mɩnɛ ʋ na sɔw bɔ̃w ka ʋ pɔw na a ala ʋ na ma nyɛ wa.

²A ƴɔ̃w-nyãa a korĩ-cɛ deme na dãa tɛrɛ ɩnɛ a Naaŋmɩn dãa kpiir ba.

³A ƴɔ̃w-nyãa sɩ na tɛrɛ ɩnɛ sɩ bɔ̃w ka a Naaŋmɩn dãa na de a ʋ nʋɔr ƴɛrɩ̃ irʼɩ̃ a tẽw, a na ɩ a ala sɩ na ma nyɛ, yi na a ala sɩ na ma nyɛ wa pʋɔ.

⁴A Abɛl ƴɔ̃w-nyãa ʋ na tɛrɛ ɩnɛ ʋ lo a baar kʋ a Naaŋmɩn ʋ vɩɛlɛ gãw a Kayɩ̃ ben, ɩ̃ a ala ɩnɛ a Naaŋmɩn de ʋ ʋ tor, kpiirʼɩ̃ ʋ a ʋ yel-pɔrsɩ ɩnɛ. A ʋ ƴɔ̃w-nyãa ʋ na mɩ tɛrɛ ɩnɛ, a mɩnɛ ʋ na saarɩ̃ kpi, ɩ̃ a ʋ ƴɛrɩ̃ cãa na ƴɛrɛ nɩ sɩ.

⁵A Ɛnɔkɩ ƴɔ̃w-nyãa ʋ na tɛrɛ ɩnɛ a Naaŋmɩn de ʋ a nɩ-mimir do nɩ a saa juu; ꞌwaa dãa kpi wa. Ba bɔ ʋ na faa, a-na-ɩ a Naaŋmɩn de ʋ na do nɩ a ʋ sɛ̃. Ɩ̃ a mɩnɛ ʋ na ma dãa de ʋ do nɩ sɛr wa, a Naaŋmɩn Sɛbɛ yelʼã áa ʋ cenfʋ nʋmɔ na a Naaŋmɩn.

⁶Ɩ̃ a ala ma ɩ a ƴɔ̃w-nyãa ɩnɛ ʋ wa, nɩrɛ kãw ma tʋɔrɔ nʋmɛɛ á Naaŋmɩn wa, a-na-ɩ a ʋlɔ na pɩɛlɛ a Naaŋmɩn sɛw na ʋ bɔ̃w ka a Naaŋmɩn be na be, ɩ̃ a ʋ maal-vɩlaa be na a bala na bʋɔrɔ ʋ jie.

⁷A Nowe ƴɔ̃w-nyãa ʋ na tɛrɛ ɩnɛ ʋ sɔw a ala a Naaŋmɩn na dãa yele ʋ, a yele ala nɔɔ tara a nɩdaar ɩnɛ. A mɩnɛ ʋ na wõ a Naaŋmɩn ƴɛrɩ̃ ɩ̃ sɔw, ʋ kpalʼã a gbor kpɛ̃ɛ faa nɩ a ʋ mɩ̃ɛ nɩ a ʋ yir deme. A nɔhɔ̃ ʋ ƴɔ̃w na a tẽw ʋ jaa nɩbɛ a ƴɛrɩ̃ a ba Naaŋmɩn ƴɛrɩ̃ jaarfʋ ɩnɛ, ɩ̃ pɔw a torfʋ a Naaŋmɩn jie a ʋ ƴɔ̃w-nyãa ɩnɛ.

⁸A Abʋraham ƴɔ̃w-nyãa ʋ na tɛrɛ ɩnɛ ʋ wõ a Naaŋmɩn ƴɛrɩ̃ a toor ɩ̃ yi a ʋ tẽw cere a tẽw ʋlɔ a Naaŋmɩn na pʋlɩ̃ nɩ ʋ a ʋ nɔɔ ɩ na a ʋ tẽw. Ʋ yi na cere ɩ̃ ma mɩ bɔ̃w a jie ʋ na cere wa.

⁹A ʋ ƴɔ̃w-nyãa ʋ na mɩ tɛrɛ ɩnɛ ʋ jɛ a be a ʋna tẽw pʋɔ ba na pʋlɩ̃ nɩ ʋ, ɩ a saana. Gan-yie pʋʋr a ʋlɔ nɩ a Ɩjakɩ nɩ a Jakɔb dãa gana. A bala ayi, ba mɩ dãa na pɔw a ʋna pʋlɩ̃fʋ naa.

¹⁰Ʋ gana na a gan-yir pʋɔ cɛlɛ nɩ a tẽw ʋlɔ na tɛrɛ a dacin kparaa, a Naaŋmɩn na ɩrɛ a yir-kɩɩrɛ nɩ a mɛmɩɛrɛ.

¹¹A Abʋraham ƴɔ̃w-nyãa ʋ na mɩ tɛrɛ ɩnɛ ʋ tʋɔ lɛ dɔw a bie, a mɩnɛ a daar na dãa saarɩ̃ po ʋ, nɩ a mɩnɛ a Sara na dãa ab, a-na-ɩ ʋ bɔ̃w na bɔ̃w ka a ʋlɔ na pʋlɩ̃ nɩ ʋ, ɩ na dẽdẽ.

¹²Ala-ɩ̃-sɔ, a nɩ-bõ-ƴen ʋlɔ na dãa ta a kũu, nɩ-yayaw lɛ yi na a ʋ jie waa a saꞌlon ŋmarbie kaarɩ̃, nɩ a man gbẽgbere nʋɔr biire kaarɩ̃ ba na ma bɔ̃wnɔ a nʋɔr wa.

¹³A ƴɔ̃w-nyãa pʋɔ a nɩbɛ basɩmɛ kpi ba jaa. Baa tʋɔ pɔw a yele ala a Naaŋmɩn na pʋlɩ̃ nɩ ba wa, ɩ̃-cɛ nɩdaa ba gbã nyaa, ɩ̃ gbã puor ba. Ba yelʼã cãa pʋɔ, áa sáanba nɩ a nɩ-yʋɔrbɔ ba ɩ a ka a tẽw pʋɔ.

¹⁴A nɩbɛ bala na ma yele a lɛ miile na áa ba mɩ̃ɛ tẽw ba bʋɔrɔ.

¹⁵A ala ɩ ba dãa na tɩɛrɛ a tẽw ʋlɔ ba na bar ɩ̃ wa, ba naa dãa na nyɛ sɔr lɩɛb kul,

¹⁶ɩ̃-cɛ a-na-ɩ ba bʋɔrɔ na a tẽw ʋlɔ na be a saa juu na vɩɛlɛ gãw a ʋna tẽw. Ala-ɩ̃-sɔ a vĩ ma nyɔw a Naaŋmɩn a ba na bʋɔlɔ ʋ a ba Naaŋmɩn wa, a-na-ɩ ʋ gbɛɛrɩ̃ na a tẽw a ba ɩnɛ.

¹⁷A Abʋraham ƴɔ̃w-nyãa ʋ na tɛrɛ ɩnɛ ʋ de a Ɩjakɩ ʋ na ɩ a baar-lo-bom, a lɛ a Naaŋmɩn na dãa bʋɔrɔ ʋ jʋʋr ʋ je kãa. A Naaŋmɩn dãa na yel ʋ, áa Ɩjakɩ jie a ʋ bal parvʋɔr na yi, tu nɩ a mɩnɛ ʋ na dãa pʋlɩ̃ nɩ ʋ. Ɩ̃ a mɩnɛ ʋ na saarɩ̃ pɔw a ʋna pʋlɩ̃fʋ naa, ɩ̃-cɛ ʋ cãa na sɔw ɩ̃ de a ʋ bi-daadaa kʋrɔ a Naaŋmɩn.

¹⁹A-na-ɩ ʋ tɩɛrʼã bɔ̃w ka a Naaŋmɩn na tʋɔ na ir a bala na kpi a kũu pʋɔ; ɩ̃ a wɔ̃ na taa nɩ a ʋ bie na dãa na sɩrɩ̃ ir a kũu pʋɔ.

²⁰A Ɩjakɩ ƴɔ̃w-nyãa ʋ na mɩ tɛrɛ ɩnɛ ʋ ƴɛr a nason ƴɛrɩ̃ ƴɔ̃w a Jakɔb nɩ a Ejayu a yele ala na waara ɩnɛ.

²¹A Jakɔb ƴɔ̃w-nyãa ʋ na lɛ tɛrɛ ɩnɛ, a lɛdaar ʋ na bʋɔrɔ a kũu, ʋ ƴɛr a nason ƴɛrɩ̃ ƴɔ̃w a Jojɛfʋ bibiir ba jaa, ɩ̃ pɛwrɛ a Naaŋmɩn di nɩ a ʋ dã-ɓʋlaa.

²²A Jojɛfʋ ƴɔ̃w-nyãa ʋ na tɛrɛ ɩnɛ go, a mɩnɛ a ʋ kũu na tara, ʋ ƴɛr a *Ɩsɩrayɛl nɩbɛ Ejibti-tẽw yifʋ ƴɛrɩ̃, ɩ̃ man ba a mɩnɛ a na sɛw a ba na maalʼɩ̃ a ʋ kɔbɔ.

²³A Mowisi dɔɔrbɔ ƴɔ̃w-nyãa ba na tɛrɛ ɩnɛ, a mɩnɛ ba na dɔw ʋ, ba de ʋ na sɔɔlɩ̃ cur ata, a-na-ɩ ba nyɛ ʋ na ʋ ɩ bi-vɩlaa, ɩ̃ a baa jɔ a jamana ƴɛr-kpɛ̃w dãbɩ̃ɛ wa.

²⁴A Mowisi ƴɔ̃w-nyãa ʋ na tɛrɛ ɩnɛ, a mɩnɛ ʋ na nʋ̃ɔ baar, ꞌwaa sɔw a ba bʋɔlɔ ʋ a *Faarɔ̃ bi-pɔw bie wa.

²⁵Ɩ̃ ʋ ɛ̃ɛ na vɛl ir a ba na ɓã taa hʋɔlɔ ʋ nɩ a Naaŋmɩn nɩbɛ gãw a mɩnɛ ʋ naa dãa wõ a nʋ̃ɔ a maal-fãa pʋɔ a daar fɩ̃ɩ pʋɔ.

²⁶A ʋ tɩɛrʋ̃ dãa na be a yar ʋlɔ pʋɔ na waara, ala-ɩ̃-sɔ ʋ nyɛ a ɩ son a mɩnɛ ʋ na pɔw a kpɛfʋ a *Kirisi kaarɩ̃, a-na-ɩ a tɛrɛ na par gãw a Ejibti-tẽw na-yele.

²⁷A Mowisi ƴɔ̃w-nyãa ʋ na tɛrɛ ɩnɛ a dãbɩ̃ɛ ma nyɔw ʋ a jamana suur ɩnɛ wa, ʋ yi a Ejibti-tẽw. Ʋ ɩraa na cĩcĩ wɔ̃ taa nɩ ʋ nyɛ na a Naaŋmɩn ba na maa nyɛ wa.

²⁸A ʋ ƴɔ̃w-nyãa ʋ na mɩ tɛrɛ ɩnɛ ʋ ƴɔ̃w na a ba maal a *Pakɩ fɛtɩ, ɩ̃ mɩ ƴɔ̃w a ba bol a jɩ̃ɩ a dɔ̃dɔɛ nɔɛ, a mɩnɛ a sɩ-tʋnaa ʋlɔ na kúrɔ a pɔsabiir kɔ̃ sɩɩr a Ɩsɩrayɛl bibiir wa.

²⁹A Ɩsɩrayɛl nɩbɛ ƴɔ̃w-nyãa ba na tɛrɛ ɩnɛ ba gãw a man jɩ̃ɛw a tẽ-kõw kaarɩ̃. Ɩ̃-cɛ a mɩnɛ a Ejibti-tẽw nɩbɛ na mɩ bʋɔrɔ ba maal a lɛ, a kʋ̃ɔ de ba na jɔ nɩ.

³⁰A ƴɔ̃w-nyãa ɩnɛ a Jeriko-tẽw dacine lo a mɩnɛ a Ɩsɩrayɛl nɩbɛ na viirĩ kolĩ ʋ a bibie anuu-nʼayi.

³¹A ƴɔ̃w-nyãa ɩnɛ a Arahab na ɩ a pɔw-baa ma lãa kpi nɩ a bala na wõw a Naaŋmɩn a toor wa, a-na-ɩ ʋ sɔw na de a bala na dãa wɩ a tẽw jʋʋrfʋ vɩlaa.

³²Bõ ɩ̃ na lɛ yel go? A daar na ɓɔr ma na a ala ɩ ɩ̃ ƴɛrɛ na a Jediyõ, a Barakɩ, a Samsɔ̃, a Jefite, a Davɩtɩ, a Samɩɛl nɩ a Naaŋmɩn ƴɛr-hierbe ƴɛrɩ̃.

³³A ba ƴɔ̃w-nyãa ba na tɛrɛ ɩnɛ ba tʋɔ jɛb fa a ten, maal a ala na tor, mɩ pɔw a ala a Naaŋmɩn na pʋlɩ̃ nɩ ba, mɩ kpalʼɩ̃ a gbeensɩ nɔɛ.

³⁴Ba mɩ kpiinʼã a vũu-bɛrɛ bar, ɩ̃ mɩ cɩ̃ɛ a bãjɩnsɩ ba naa dãa kú nɩ ba. A ba ƴɔ̃w-nyãa ɩnɛ a bala na dãa bal lɛ pɔw a fãgã, lɛ lɩɛb ɩ gãdar a jɛb pʋɔ, diw a sɔdaal-sáanba bar.

³⁵A ƴɔ̃w-nyãa ɩnɛ, pɔɔbɔ lɛ pɔw na a ba nɩbɛ na ir a kũu pʋɔ. Ŋmɛɛ mɩ dãa na pɔw a kpowfʋ kpi nɩ. A ala ɩ ba dãa na lɩɛb a ba ƴɔ̃w-nyãa ba naa bar ba na, ɩ̃-cɛ baa sɔw wa, a mɩnɛ a ba na tʋɔ ir a kũu pʋɔ pɔw a baafʋ ʋlɔ na nyɩrɩ̃ vɩɛlɛ.

³⁶A ŋmɛɛ go, ba la ba na, ɩ̃ fɔb a ŋmɛɛ, lũ nɩ a banʋmɔ a bɔ̃jɔrɩ̃sɩ pɔw a kasu pʋɔ.

³⁷Ba lɔbʼã a nɩŋmɛɛ nɩ kubie kú, ɩ̃ lɛ cɛ a ŋmɛɛ ŋma ayi, ɩ̃ mɩ cɛ a ŋmɛɛ nɩ a bãjɩnsɩ kú. A piir nɩ a bʋʋr gã-kpoor ba dãa su yʋɔrɔ nɩ, ɩ nɩ a nãw deme, a ba hʋɔlɔ ba kpowro nɩ ba.

³⁸A tẽw na ma mɩ sɛw nɩ a nɩbɛ bala wa. Ba bɔrɔ na yʋɔrɔ a wɛkar pʋɔ nɩ a tan pʋʋr, gana a tan nɩ a tene bɔɔr kpolsɩ pʋʋr.

³⁹A Naaŋmɩn kpiirʼã a nɩbɛ basɩmɛ ba jaa a ba ƴɔ̃w-nyãa ɩnɛ, ɩ̃-cɛ baa mɩ pɔw a ala ʋ na pʋlɩ̃ nɩ ba wa.

⁴⁰A-na-ɩ a mɩnɛ a Naaŋmɩn na tɩɛrɛ nɩ sɩ, ʋ gbɛɛrɩ̃ na a yel-paala na vɩɛlɛ gãw a ba ben, a mɩnɛ a ba kɔ̃ lɩɛb ɩ a cɛcɛ ɩ̃ a ala ma ɩ sɩ mɩ be na be wa.