Read Birifor, Malba Eburo Sɛbɛ 12 Bible Online

Eburo Sɛbɛ 12 - Birifor, Malba bible

Eburo Sɛbɛ 12

¹Ala-ɩ̃-sɔ a sɩmɩ mɩ, a mɩnɛ sɩ na tɛrɛ a yel-mɩ̃ɛ ƴɛr-manba na nyɩrɩ̃ waa tiw kolĩ sɩ a nɔhɔ̃, nyɩ́ ɩ a sɩ lɔb a ala a jaa na mɔɔnɔ sɩ a Naaŋmɩn sɔr tufʋ bara, nɩ a maal-fãa na maa yaarɩ̃ barʼɩ̃ sɩ, ɩ̃ na sɩ tɛrɛ a su-varkpara jɔrɔ nɩ a dãw-taa ʋlɔ na be a sɩ nii-sɔw,

²ꞌwuoro nɩ a *Jeeju kir-kir-kir. A ʋlɔ ɩ̃ ɩ a ni-diere a ƴɔ̃w-nyãa sɔr pʋɔ, na mɩ tɔwrɔ sɩ wa tara nɩ a baarfʋ jie. A mɩnɛ ʋ na nyɛ a nʋ̃ɔ ʋlɔ na be a ʋ nii-sɔw, ʋ nyɔw na a suur ɩ̃ bar a ba kpa ʋ a nɩ-kʋ-daa juu, ɩ̃ ꞌwaa mɩ tɩɛrʼɩ̃ a vĩ ʋlɔ na be a kũu lɛ pʋɔ wa. Ɩ̃ a ƴɛ̃ƴɛrɩ̃ na, ʋ jɛ na a Naaŋmɩn naa-dakɔw juu a ʋ dʋrɩ̃ lõboorɩ̃.

³Nyɩ́ tɩɛrʼɩ̃ a Jeeju, a mɩnɛ ʋ na dãa nyɔw a suur a lɛdaar a nɩ-faar na jɛbɛ nɩ ʋ, a mɩnɛ a nyɩ kɔ̃ wa bal a ɩ̃gana kar nyɩ, a nyɩ sube sãw wa.

⁴A-na-ɩ a mɩnɛ nyɩ na jɛbɛ nɩ a maal-fãa, baa kú nɩrɛ a nyɩ sɔ̃w sɛr wa.

⁵Nyɩ hiinʼã a ana ꞌlafʋ ƴɛrɩ̃sɩ a Naaŋmɩn na dãa ƴɛrʼɩ̃ nyɩ a ʋ bibiir kaarɩ̃? Ʋ yelʼã: “Ɩ̃ bie, taa de a Nɩ-kpɛ̃ɛ kpãafʋ ʋ ɩ fʋ bõ-pɔrɔ wa. Taa ɩ a fʋ suur sãw fʋ a lɛ ʋ na gala fʋ wa.

⁶A-na-ɩ a Nɩ-kpɛ̃ɛ ma kpãa na a ʋlɔ ʋ na nʋnɔ, ɩ̃ ma mɩ fɔb a nɩrɛ lɛ ʋ na de ʋ ɩ a ʋ bie.”

⁷Nyɩ́ tɛrɛ su-nyɔwraa a kpãafʋ pʋɔ, a-na-ɩ a ala miile na áa Naaŋmɩn ꞌwuoro nyɩ na a ʋ bibiir kaarɩ̃. Bile kãw be na be a ʋ sãa na maa kpãa wa?

⁸A ala ɩ ꞌwaa kpãa nyɩ a ʋ bibiir ba jaa kaarɩ̃ wa, nyaa sɩrɩ̃ ɩ a ʋ bibiir wa, ɩ̃-cɛ sɛ̃sɛn bibiir nyɩ ɩ.

⁹Sɩ tɛrɛ na a ɩ̃gan buur saanba na ma dãa kpãa sɩ a sɩ jɔrɔ ba. Wa yele nɩ a sɩ saa juu Sãa, mɩnɛ ɩ̃ sɛw a sɩ na jɔrɔ ʋ, naa pɔw a baafʋ?

¹⁰A sɩ saanba, ba ma dãa na kpãa sɩ a daar fɩ̃ɩ pʋɔ a mɩnɛ ba na buɔrɔ, ɩ̃-cɛ a Naaŋmɩn ma kpãa sɩ na a sɩ son pɔwfʋ ɩnɛ, a mɩnɛ a sɩ na tʋɔ lɩɛb ɩ a cɛcɛ a ʋ kaarɩ̃.

¹¹A lɛdaar ba na ma kpãa a nɩrɛ a maa nʋmɔ ʋ wa; a ma ɩ ʋ na nãw. Ɩ̃-cɛ a daar kãw, a bala a kpãafʋ na kuol ma pɔw na a pɩɛnfʋ nɩ a torfʋ a ba baafʋ pʋɔ.

¹²Ala-ɩ̃-sɔ, nyɩ́ lɛ kpɛmɛ a nyɩ nur na ƴɔl, nɩ a nyɩ dume na bal.

¹³Nyɩ́ cɔɔrɩ̃ a nyɩ sɔr ʋlɔ nyɩ na diere, ʋ tor a nyɩ gbɛɛ ɩnɛ, a mɩnɛ a gbɛ-saanaa sʋbɔ gbɛr kɔ̃ lɛ vir wa, ɩ̃-cɛ ʋ na ɛ̃ɛ kpaar.

¹⁴Nyɩ́ bʋɔrɔ a pɩɛnfʋ a nɩbɛ ba jaa jie, nɩ a cɛcɛ ɩfʋ. A nɩrɛ ma be a lɛ wa, ꞌwaa wa nyɛrɛ a Nɩ-kpɛ̃ɛ wa.

¹⁵Nyɩ́ jʋʋrɔ a mɩnɛ a nɩrɛ kɔ̃ wa lo sɔr pʋɔ ɩ̃ faa a Naaŋmɩn wɩɛfʋ wa, mɩɩ a nɩrɛ kɔ̃ wa ƴɔ̃w a ʋ tɔ sʋbɔ pʋ̃ɔ wa. A na wɔ̃ na taa nɩ tɩ-tomaa na bul a nyɩ sɔ̃w sãw a nɩ-yaw nɩ a ʋ lɔw bar.

¹⁶Nyɩ́ mɩ jʋʋrɔ a mɩnɛ a nɩrɛ kɔ̃ wa ɩ pepebe, mɩɩ na wɔ̃ taa nɩ a Ejayu na ma dãa tɛrɛ puorfʋ tɩɛrʋ̃ wa, na mɩ dãa de a ʋ kpɛ̃ɛ ɩfʋ tɛw nɩ bõ-dɩraa gbɛ-bõ-ƴen tɛw dɩ.

¹⁷Nyɩ bɔ̃w na ka a mɩnɛ ʋ na lɛ dãa bʋɔrɔ a ʋ sãa ʋ ƴɛr a nason ƴɔ̃w ʋ, a ʋ sãa jaar ʋ na bar. ꞌWaa dãa pɔw sɔr na lɩɛb a ʋna maalfʋ, a mɩnɛ ʋ na dãa saarɩ̃ bɔ a sɔr kõ nɩ wa.

¹⁸Nyaa taw ta ɩraa a Sɩnayɩ tãw nii-sɔw a *Ɩsɩrayɛl nɩbɛ kaarɩ̃ wa, a be a vũu kpɛ̃ɛ na ma dãa ꞌlere, a wɩɛr ma sɔb, ɩ̃ lɛ liwre a jile-jile, a sɛsɛb kpɛ̃ɛ ma ire,

¹⁹ɩl gɔ̃-pɔɔr na ma be, ɩ̃ a nɩrɛ kɔkɩr na ƴɛrɛ. A mɩnɛ ba na wõ a ʋna kɔkɩr, ba sʋɔrʼã a ba taa lɛ ɩ a ba lɛ wõ a ʋna kɔkɩr go wa.

²⁰A-na-ɩ baa dãa tʋɔrɔ tɛrɛɛ a ʋna ƴɛr-bir na yele áa nɩrɛ lɛ wa sɩɩr a ʋna tãw, a ala saarɩ̃ ɩ a dʋ̃ɔ ʋ, bá lɔb ʋ nɩ kubie kú bar.

²¹A yele ala na nyɩr ba, dãa na nyɩrɩ̃ kʋrɔ ba dãbɩ̃ɛ a Mowisi wa yel: “Dãbɩ̃ɛ nyɩrɩ̃ na nyɔw ma, ɩ̃ mine!”

²²Ɩ̃-cɛ a nyɩmɩ, nyɩ irʼã ɩraa a *Sɩ̃ɔ tãw nii-sɔw, a lɛ yelʼã a Naaŋmɩn-mimir tẽw na ɩ a saa juu Jerujalɛm na tɛrɛ a sɩ-tʋnɩsɩ ture ture kɔ̃ bɔ̃w nʋɔr wa.

²³Nyɩ mɩ taw na ta a Naaŋmɩn bibi-dãdan na duo taa, a bala yoe ba na sɛb a saa juu, nɩ a Naaŋmɩn na ɩ a nɩbɛ ba jaa ƴɛr-guoro. Nyɩ mɩ ta na a nɩ-torisɩ sɩɩr na lɩɛb ɩ a cɛcɛ jie,

²⁴nɩ a *Jeeju na ɩ a pʋlɩ̃-ta-paalaa *lɔlʋɔrɔ, nɩ a ʋ jɩ̃ɩ na deer tɛrɛ a ƴɛrɩ̃ na vɩɛlɛ gãw a Abɛl ben.

²⁵Nyɩ́ tɛrɛ nyɩ mɩ̃ɛ kɔ̃ jaar a ʋlɔ na ƴɛrɛ nɩ nyɩ cɛlfʋ wa. A bala na jaar a Naaŋmɩn nʋɔr a Mowisi na dãa de kpãana nɩ ba a ka a tẽw pʋɔ ma cɩ̃ɛ wa, wa yele nɩ a sɩmɩ, a sɩmɩ lɩɛb jaar a ʋlɔ kpãafʋ na yi a saa juu, mɩnɛ sɩ na ɩ ɩ̃ cɩ̃ɛ?

²⁶A ʋlɔ kɔkɩr na dãa dam a tẽw a korĩ-cɛ lɛ pʋlɩ̃ nɩ sɩ na a ƴɛ̃ƴɛrɩ̃ yele nɩ: “Ɩ̃ na lɛ damʼã a tẽw gbɛ-daa go, ɓã taa nɩ a saꞌlon jaa.”

²⁷A “gbɛ-daa go” miile na a yele ala a jaa na dama na nyɩ na, a-na-ɩ yel-mɩɛrsɩ ʋ, a mɩnɛ a yele ala na ma tʋɔrɔ dama wa na tʋɔ ɩraa.

²⁸Ala-ɩ̃-sɔ, a mɩnɛ sɩ na kpɛɛrɛ a Naaŋmɩn fãw pʋɔ na ma tɛrɛ a damfʋ wa, nyɩ́ ɩ a sɩ tɛrɛ sube na puoro ʋ, a sɩ na tʋɔ pɛwrɛ ʋ a mɩnɛ a na nʋmɔ ʋ, ƴɔnɔ nɩ ʋ, mɩ jɔrɔ nɩ ʋ.

²⁹A-na-ɩ a sɩ Naaŋmɩn ɩ na a vũu Naaŋmɩn na ma wɛlɛ.