Read Birifor, Malba Eburo Sɛbɛ 13 Bible Online

Eburo Sɛbɛ 13 - Birifor, Malba bible

Eburo Sɛbɛ 13

¹A mɩnɛ nyɩ na ɩ a yɛɛr a *Kirisi pʋɔ, nyɩ taa wa bara a nyɩ nʋ-taa wa.

²Nyɩ taa wa hiine a sáanba defʋ wa. A lɛ saa na a nɩŋmɛɛ dãa ir a sɩ-tʋnɩsɩ saan ɩ̃ ma mɩ bɔ̃w ba wa.

³Nyɩ́ bɔ̃wnɔ nɩ a bala na be a kasu pʋɔ, wɔ̃ taa nɩ ba mɩ lãa na pɔw nɩ nyɩ, nɩ a bala ba na kpowro, wɔ̃ taa nɩ ba mɩ lãa na kpowro nɩ nyɩ.

⁴A sɛw na a nɩbɛ ba jaa ba ƴɔnɔ a kul-taa, ɩ̃ a daba nɩ a pɔw sɛw na ba ɩ dẽdẽ, a-na-ɩ a Naaŋmɩn na guorʼã a bala na pebe, nɩ a gã-ta-burbur deme ƴɛrɩ̃.

⁵Nyɩ taa ɩ a libie ꞌlaarfʋ ʋ tʋɔ nyɩ wa, ɩ̃ nyɩ́ ɛ̃ɛ ɩ a nʋmɔ nyɩ a ala nyɩ na tɛrɛ ɩnɛ, a-na-ɩ a Naaŋmɩn yelʼã: “A ala saarɩ̃ wɔ̃ mɩnɛ, ɩ̃ maa bara fʋ wa. Maa jɛrɛ fʋ bara fɩ̃ɩ wa.”

⁶Ala-ɩ̃-sɔ sɩ na tʋɔ na bar nyãa ɩ̃ yel: “A Nɩ-kpɛ̃ɛ ɩ̃ ɩ a ɩ̃ Sõsũono; maa jɔrɔ dãbɩ̃ɛ wa. Bõ a nɩrɛ na tʋɔ maal ma?”

⁷Nyɩ́ cãa bɔ̃w nɩ a bala na dãa ƴɛr a Naaŋmɩn ƴɛrɩ̃ kʋ nyɩ, na dãa ɩ a nyɩ ni-dierbe, ꞌwuoro nɩ a ala ba na maal wa kpi nɩ, ɩ̃ tɔɔnɔ ba a ba ƴɔ̃w-nyãa pʋɔ.

⁸A mɩnɛ a *Jeeju-Kirisi na dãa be, lɛ ʋ cãa be, a jamɩ, a dɩnaa, nɩ a daar a jaa.

⁹Nyɩ taa wa ɩ a ba taw nyɩ bɔrʼɩ̃ a jaan-kpe-paala pʋɔ wa. A vɩɛlɛ na a nyɩ sɩɛ na pɔw a kpɛ̃w a Naaŋmɩn sũofʋ ɩnɛ, ɩ̃ a kɔ̃ ɩ a bõ-dɩrɩsɩ ƴɛrɩ̃ jɔfʋ na ma mɩ dãa sũo nɩ-bõ-ƴen fɩ̃ɩ wa.

¹⁰Sɩ tɛrɛ na a baar lofʋ jie, ɩ̃ a baar-lorbo bala na tʋnɔ a Jufisɩ gan-yir pʋɔ ma tɛrɛ sɔr na dɩ a ana yele wa.

¹¹A ba *baar-lo-nɩ-kpɛ̃ɛ ma de na a dʋn jɩ̃ɩ kpɛ nɩ a di-ciiraa pʋɔ kʋ a Naaŋmɩn a maal-faar de-barfʋ ɩnɛ, ɩ̃ ba ma de na a ana dʋn cenʼɩ̃ cɛ̃cɛ̃w na su bar a dɩ.

¹²A ala ɩnɛ a *Jeeju mɩ nyɛ a hʋʋr kpi nɩ a tẽw cɛ̃cɛ̃w, a mɩnɛ a ʋ jɩ̃-son na tʋɔ cɔɔrɩ̃ a ʋ nɩbɛ ow ba kpee.

¹³Ala-ɩ̃-sɔ, sɩ́ yi cen a be a ʋ sɛ̃ a tẽw cɛ̃cɛ̃w mɩ pɔwrɔ a ʋ kpɛfʋ.

¹⁴A-na-ɩ saa tɛrɛ tẽ-daadaa ka wa, ɩ̃-cɛ sɩ bʋɔrɔ na a ʋlɔ nɔɔ waara.

¹⁵Ala-ɩ̃-sɔ, sɩ́ de a Jeeju yuor pɛwrɛ nɩ a Naaŋmɩn a daar a jaa, a wɔ̃ taa nɩ baar-lo-bom na yi a sɩmɩ na kãkara ʋ nɔɛ pʋɔ.

¹⁶Nyɩ taa wa hiine a son maalfʋ nɩ a sũo-taa bara wa, a-na-ɩ a baar-lo-nɔhɔ̃ ma nʋmɔ a Naaŋmɩn.

¹⁷Nyɩ́ wono a nyɩ ni-dierbe toor, ɩ̃ mɩ wur a nyɩ mɩ̃ɛ a ba jie. Bala ma gure a nyɩ sɩɩr a daar a jaa, a-na-ɩ Naaŋmɩn na soor ba na a ala daar kãw. Nyɩ́ ɩ a ba tʋ̃ a tʋmɔ nɩ nʋ̃ɔ, kɔ̃ ɩ ba ni-sɔbaa wa, a-na-ɩ a lɛ kɔ̃ sũo nyɩ wa.

¹⁸Nyɩ́ cãa sʋɔrɔ a Naaŋmɩn ƴɔnɔ sɩ. Sɩ bɔ̃w ka saa tɛrɛ tɩɛrʋ̃ na dama sɩ wa, a-na-ɩ sɩ bʋɔrɔ na sɩ maal a ala na tor a yele a jaa pʋɔ.

¹⁹Ɩ̃ sʋɔrɔ nyɩ na bɩlɛ, nyɩ́ sʋɔrɔ a Naaŋmɩn ƴɔnɔ ma ɩ̃ lɛ wɩ a nyɩ jie fɔfɔw.

²⁰A pɩɛnfʋ sʋbɔ Naaŋmɩn maalʼã a sɩ Nɩ-kpɛ̃ɛ *Jeeju-Kirisi ʋ ir a kũu pʋɔ, ɩ̃ maal ʋ ʋ wɔ̃ taa nɩ a piir Dɔ-cɩɩn-kpɛ̃ɛ a sɩ jie, a yi a ʋ jɩ̃ɩ na deer cɔɔrɔ nɩ a daadaa *pʋlɩ̃-taa.

²¹A ʋna Naaŋmɩn, ú sũo nyɩ a vɩlaa maal-bʋrɔ bʋrɔ pʋɔ a jaa, a nyɩ maala a ʋ pʋ-tɩɛrʋ̃, ɩ̃ mɩ maal a sɩ pʋɔ a ala na nʋmɔ ʋ, a yi a Jeeju-Kirisi jie. A ʋlɔ sɔ a yo-yifʋ a daar a jaa. *Amɛn.

²²Yɛɛr, ɩ̃ sʋɔr nyɩ na nyɩ́ sɔw de a kpãkpanfʋ ƴɛrɩ̃sɩ asɩmɛ nɩ su-nyɔwraa, a-na-ɩ a sɛbɛ na ɩ̃ na sɛb nyɩ ma bɔ̃w womo wa.

²³Ɩ̃ bʋɔrɔ na ka nyɩ bɔ̃w á ba barʼã a sɩ yɛbɛ Timote. A ʋlɔ wa wa pʋrpʋr, ɩ̃ na taw ʋ na wɩ nɩ a lɛdaar ɩ̃ nɔɔ wɩɛrɛ a nyɩ sɛ̃.

²⁴Nyɩ́ puor a nyɩ ni-dierbe ba jaa, nɩ a *Kirisi nɩbɛ ba jaa. A Ɩtalɩ-tẽw yɛɛr mɩ puor nyɩ na.

²⁵A Naaŋmɩn sũofʋ ú be a nyɩ jie nyɩ jaa.