Read Birifor, Malba Eburo Sɛbɛ 2 Bible Online

Eburo Sɛbɛ 2 - Birifor, Malba bible

Eburo Sɛbɛ 2

¹A mɩnɛ a Naaŋmɩn na de a ʋ Bie ƴɛrʼɩ̃ sɩ, ala-ɩ̃-sɔ a sɛw na a sɩ na bɔ̃w cɛlɛ tɔ a ana ƴɛrɩ̃sɩ sɩ na wõ, a mɩnɛ sɩ kɔ̃ wa sal lo wa.

²Sɩ bɔ̃w ka a Naaŋmɩn ƴɛrɩ̃ ʋlɔ a sɩ-tʋnɩsɩ na dãa de wa nɩ ɩ na yel-mɩ̃ɛ, ɩ̃ a nɩrɛ lɛ na dãa sãw a ʋna ƴɛrɩ̃, mɩɩ wõw nɩ ʋ a toor, ma pɔw na a yar ʋlɔ na sɛw ʋ.

³Ala-ɩ̃-sɔ, mɩnɛ a sɩmɩ na ɩ ɩ̃ cɩ̃ɛ, a ala ɩ saa cɛlɛ tɔ a faafʋ ʋlɔ na nyɩrɩ̃ bɛrmɛ a lɛ wa? A ʋna faafʋ ƴɛrɩ̃, a Nɩ-kpɛ̃ɛ mɩ̃ɛ ɩ̃ dãa de nĩe ƴɛr, ɩ̃ a bala na dãa cɛl ʋ mɩ man sɩ na a sɩ bɔ̃w ka a yel-mɩ̃ɛ ʋ,

⁴ɩ̃ a Naaŋmɩn mɩ̃ɛ mɩ man sɩ a ʋna yel-mɩ̃ɛ a mɩnɛ ʋ na tʋ̃ a nɔ-kofʋ tʋmɔ nɩ a tʋ̃-bʋrɔ bʋrɔ na miile a ʋ kpɛ̃w, ɩ̃ mɩ de a ʋ Sɩɛ tʋ̃-bʋrɔ bʋrɔ po a nɩbɛ a mɩnɛ ʋ na bʋɔrɔ.

⁵A-na-ɩ a tẽw ʋlɔ nɔɔ waara ƴɛrɩ̃ sɩ na ƴɛr, aa ɩ a sɩ-tʋnɩsɩ a Naaŋmɩn na de a ʋna tẽw kʋ wa.

⁶Ɩ̃-cɛ nɩrɛ yelʼã a Naaŋmɩn Sɛbɛ pʋɔ a jie kãw: “A bõ a nɩrɛ ɩ a fʋ̃ʋ Naaŋmɩn maa hiin ʋ bar wa? Mɩɩ a bõ a nɩsaa salaa ɩ a fʋ ma cɛlɛ ʋ a lɛ?

⁷Fʋ lɩɛb ʋ na daar fɩ̃ɩ pʋɔ ʋ pab gãw a sɩ-tʋnɩsɩ, ɩ̃ kʋ ʋ a yo-yifʋ nɩ a ju-kpɛ̃ɛ, ʋ jɛ ɩ a jamana,

⁸ɩ̃ mɩ kʋ nɩ ʋ a tʋɔfʋ a yele a jaa jie.” A mɩnɛ a na yel: “A Naaŋmɩn kʋ ʋ na a tʋɔfʋ a yele a jaa jie,” a lɛ yelʼã a bom kãw ma be be ʋ na ma tʋɔ wa. Ɩ̃-cɛ, wa ta nɩ a dɩnaa, saa nyɛ a ʋ yele a jaa tʋɔfʋ wa.

⁹Ɩ̃-cɛ a ala sɩ na nyɛ a ƴɛ̃ƴɛrɩ̃ ɩ na a *Jeeju ba na dãa lɩɛb ʋ pab gãw a sɩ-tʋnɩsɩ a daar fɩ̃ɩ pʋɔ, ʋ jɛ ɩ a jamana, pɔw a yo-yifʋ nɩ a ju-kpɛ̃ɛ a ʋ kũu ʋ na kpi ɩnɛ. A Naaŋmɩn maal-vɩlaa ɩnɛ a ta a lɛ, a mɩnɛ a Jeeju na tʋɔ kpi a nɩbɛ ba jaa ɩnɛ.

¹⁰A Naaŋmɩn ʋlɔ na ir a yele a jaa ɩ̃ mɩ tɛrɛ ba, a mɩnɛ ʋ na bʋɔrɔ ʋ tɔw a bi-dabsɩ yayaw a ba kpɛ a ʋ yo-yifʋ pʋɔ, ʋ nyɛ na a vɩɛlɛ ʋ na lɩɛb a Jeeju na ɩ a ba ni-diere kpɛɛrɛ nɩ ba a faafʋ pʋɔ, ʋ na ɩ a cɛcɛ a ʋ won ʋ na nyɛ ɩnɛ.

¹¹A nɩbɛ bala a Jeeju na pɛɛr a ba maal-faar bar, nɩ a ʋlɔ, tɛrɛ na a Sãa bõ-ƴen. Ala-ɩ̃-sɔ vĩ ma nyɔw ʋ ʋ na bʋɔlɔ ba a ʋ yɛɛr wa.

¹²A-na-ɩ ʋ yelʼã: “Ɩ̃ na ƴɛrʼã a fʋ ƴɛrɩ̃ kʋ a ɩ̃ yɛɛr. Ɩ̃ na pɛw fʋ na a fʋ *duo-puorbo sɔ̃w.”

¹³Ʋ lɛ yelʼã: “Ɩ̃ na barʼɩ̃ na a Naaŋmɩn nyãa,” ɩ̃ lɛ yel go: “Nyɛ ma, nɩ a bibiir bala a Naaŋmɩn na kʋ ma.”

¹⁴Ɩ̃ a mɩnɛ a bibiir bala na ɩ a ɩ̃gan buur nɩbɛ, tɛrɛ a jɩ̃ɩ, a Jeeju mɩ̃ɛ mɩ lɩɛbʼã wɔ̃ a ba kaarɩ̃, a mɩnɛ ʋ na tʋɔ sãw nɩ a ʋ kũu a ʋlɔ na tɛrɛ a kũu fãgã, a lɛ yelʼã a Satã,

¹⁵ɩ̃ mɩ ir a bala na dãa ɩ a gbãgbaar a kũu dãbɩ̃ɛ ɩnɛ a ba baafʋ a jaa pʋɔ bar.

¹⁶A-na-ɩ sɩ bɔ̃w na vɩlaa á aa ɩ a sɩ-tʋnɩsɩ sũofʋ ɩnɛ ʋ wa wa, ɩ̃-cɛ a Abʋraham nɩbɛ sũofʋ ɩnɛ ʋ wa.

¹⁷Ala-ɩ̃-sɔ a dãa sɛw ʋ na lɩɛb be a ʋ yɛɛr kaarɩ̃ a yele a jaa pʋɔ, a mɩnɛ ʋ na tʋɔ ɩ a ba *baar-lo-nɩ-kpɛ̃ɛ na tɛrɛ a nã-bɔ̃wfʋ, ɩ nɩ dẽdẽ a Naaŋmɩn nii-sɔw, na tʋɔ ir a ʋ nɩbɛ maal-faar bar.

¹⁸A-na-ɩ a ʋlɔ mɩ̃ɛ mɩ pɔw na a bɩɩrfʋ a won pʋɔ, ʋ na mɩ tʋɔ na sũo a bala na be a bɩɩrfʋ pʋɔ.