Read Birifor, Malba Eburo Sɛbɛ 3 Bible Online

Eburo Sɛbɛ 3 - Birifor, Malba bible

Eburo Sɛbɛ 3

¹Ala-ɩ̃-sɔ yɛɛr a Naaŋmɩn na sɔ, ɩ̃ mɩ bʋɔl a ʋ tẽw kpɛfʋ ɩnɛ, nyɩ́ tɩɛrɛ a *Jeeju a Naaŋmɩn na tʋ̃ ʋ ɩ a *baar-lo-nɩ-kpɛ̃ɛ, a mɩnɛ a sɩ puorfʋ ƴɛrɩ̃ na be.

²A Jeeju ʋlɔ, ʋ dãa na ɩ a dẽdẽ a Naaŋmɩn ʋlɔ na biin ʋ jie, a mɩnɛ a Mowisi na mɩ dãa ɩ a dẽdẽ a Naaŋmɩn yir deme sɔ̃w.

³Ɩ̃-cɛ a Jeeju sɛw nɩ na a yo-yifʋ gãw a Mowisi, a mɩnɛ a yir-kpɛɛrɛ na ma pɔw a yo-yifʋ gãw a yir deme.

⁴A yie a jaa tɛrɛ na a ba yir-kpɛɛrbɛ, ɩ̃-cɛ a ʋlɔ na ɩ a yele a jaa mɩɛrɛ ɩ na a Naaŋmɩn.

⁵A Mowisi, tʋ̃tʋnɔ ʋ dãa ɩ, ɩ nɩ a dẽdẽ a Naaŋmɩn yir deme ba jaa sɔ̃w, a mɩnɛ ʋ na tʋɔ miile a ala nɔɔ tuure,

⁶ɩ̃-cɛ a *Kirisi, bi-daba ʋ ɩ, mɩ ɩ nɩ a yir-kpɛɛr-dẽdẽ. Ɩ̃ a ʋ yir deme sɩ ɩ, a ala ɩ sɩ ɩraa na cĩcĩ, barʼɩ̃ a nyãa, kãkara nɩ a sɩ gufʋ tɩɛrʋ̃ son ɩnɛ.

⁷Ala-ɩ̃-sɔ, a mɩnɛ a Naaŋmɩn Sɩɛ na yel: “A nyɩmɩ wa wõ a Naaŋmɩn kɔkɩr a dɩnaa,

⁸nyɩ taa kpɛmɛ a nyɩ suur, a mɩnɛ nyɩ na dãa maal a lɛ nyɩ na dãa wõw ʋ a toor a ʋna bibir nyɩ na bɩɩr ʋ a wɛkar pʋɔ wa.

⁹A be a nyɩ sãa-kʋnbɔ dãa bɩɩr ma, jʋʋrʼɩ̃ ma je kãa, a mɩnɛ ba na saarɩ̃ nyɛ a ɩ̃ tʋmɔ a ba ɩnɛ a yomo lɩjaayi pʋɔ.

¹⁰Ala-ɩ̃-sɔ ɩ̃ nyɛ nɩ a bana nɩbɛ suur, ɩ̃ yel: ‘A ba tɩɛrɩ̃sɩ ma bɔrɔ na a daar a jaa. Baa bɔ̃w a ala ɩ̃ na bʋɔrɔ a ba jie wa.’

¹¹A mɩnɛ ɩ̃ na nyɛ a suur, ɩ̃ pɔ na yel á baa lɛ kpɛɛrɛ a jie ʋlɔ ba na pɔwrɔ nɩ ma a pɩɛnfʋ go wa.”

¹²Yɛɛr, nyɩ́ bɔ̃w tɛrɛ a nyɩ mɩ̃ɛ, a mɩnɛ a nɩrɛ kɔ̃ wa be a nyɩ sɔ̃w ɩ̃ wa tɛrɛ su-kpana na nyɩrɩ̃ kpɛmɛ ʋ wa ŋmaa yi a Naaŋmɩn-mimir pʋɔ wa.

¹³Ɩ̃-cɛ, a mɩnɛ sɩ na cãa be a ʋna dayen a Naaŋmɩn Sɛbɛ na bʋɔlɔ “a dɩnaa,” nyɩ́ kʋrɔ taa a ꞌlafʋ a bibie a jaa, a mɩnɛ a fãa kɔ̃ wa bɛlɩ̃ a nɩrɛ kãw suur kpɛmɛ bar wa.

¹⁴A-na-ɩ sɩ lãw nɩ na a *Kirisi a yele, a ala ɩ sɩ sɩrɩ̃ na bɔ̃w barʼɩ̃ ʋ a nyãa wa ta nɩ a baarfʋ daar, a korĩ-cɛ kaarɩ̃.

¹⁵A mɩnɛ a na yel: “A nyɩmɩ wa wõ a Naaŋmɩn kɔkɩr a dɩnaa, nyɩ taa kpɛmɛ a nyɩ suur, a mɩnɛ nyɩ na dãa maal a lɛ nyɩ na dãa wõw ʋ a toor wa.”

¹⁶Babõ ɩ̃ wõ a Naaŋmɩn kɔkɩr ɩ̃ jaar ɩ̃ wõw ʋ a toor? Aa ɩ a bala ba jaa a Mowisi na dãa tɛrɛ yi nɩ a Ejibti-tẽw pʋɔ wa?

¹⁷Ɩ̃ babõ a Naaŋmɩn dãa nyɛ nɩ a suur wa ta nɩ a yomo lɩjaayi? Aa ɩ a bala na dãa maal a fãa ɩ̃ lo kpi a wɛkar pʋɔ wa?

¹⁸Ɩ̃ babõ a Naaŋmɩn dãa pɔ yele á baa lɛ kpɛɛrɛ a jie ʋlɔ ba na pɔwrɔ nɩ ʋ a pɩɛnfʋ go wa? Má a bala na dãa wõw ʋ a toor ʋ.

¹⁹Sɩ nyɛ na a nɔhɔ̃ a mɩnɛ a ba toor wõwfʋ na saa a baa tʋɔ kpɛ a pɩɛnfʋ pʋɔ wa.