Read Birifor, Malba Eburo Sɛbɛ 4 Bible Online

Eburo Sɛbɛ 4 - Birifor, Malba bible

Eburo Sɛbɛ 4

¹Ala-ɩ̃-sɔ, a mɩnɛ a Naaŋmɩn pʋlɩ̃fʋ na cãa be nɩ sɩ a ʋ pɩɛnfʋ pʋɔ kpɛfʋ, sɩ́ tɛrɛ sɩ mɩ̃ɛ, a nɩrɛ kãw a nyɩ sɔ̃w kɔ̃ wa faa ʋ wa.

²A-na-ɩ sɩ mɩ wõ na a ƴɛr-son a bala na dãa be a wɛkar pʋɔ kaarɩ̃. Ɩ̃-cɛ a bala, a mɩnɛ ba na wõ a ʋna ƴɛrɩ̃, aa ɩ ba bom wa, a-na-ɩ a mɩnɛ ba na wõ, baa sɔw de nɩ a ba suur wa.

³Ɩ̃-cɛ a sɩmɩ, sɩ na kpɛ na a ʋna pɩɛnfʋ pʋɔ, a-na-ɩ sɩ barʼɩ̃ na a Naaŋmɩn a nyãa, tu nɩ a mɩnɛ ʋ na dãa yel: “Ɩ̃ nyɛ na a suur, ɩ̃ pɔ yel á baa lɛ kpɛɛrɛ pɔwrɔ nɩ ma a pɩɛnfʋ go wa.” Ʋ yelʼã a lɛ ɩ̃-cɛ a pɩɛnfʋ ʋlɔ be nɩ ʋ na a korĩ-cɛ jaa, a lɛ ʋ na maal a tẽw baar.

⁴A-na-ɩ a Naaŋmɩn Sɛbɛ yelʼã a jie kãw a ala na ɩ a bibie anuu-nʼayi dayen ɩnɛ: “A Naaŋmɩn jɛ na pɩɛn a bibie anuu-nʼayi dayen a ʋ tʋmɔ a jaa ʋ na maal ɩnɛ.”

⁵Ɩ̃ a Naaŋmɩn Sɛbɛ lɛ yelʼã go: “Baa lɛ kpɛɛrɛ pɔwrɔ nɩ ma a pɩɛnfʋ go wa.”

⁶A bala na dãa de nĩe wõ a ʋna ƴɛr-son ma dãa tʋɔ kpɛ a ʋna pɩɛnfʋ pʋɔ wa, a-na-ɩ to-woonbo ba dãa ɩ. Ɩ̃-cɛ a sɔr cãa na yuo a nɩŋmɛɛ na tʋɔ kpɛ,

⁷ala-ɩ̃-sɔ a Naaŋmɩn ƴɔ̃w a bibir ʋ na bʋɔlɔ “a dɩnaa.” A dãa na kam, ɩ̃-cɛ ʋ lɛ ƴɔ̃w a Davɩtɩ ʋ lɛ cɔɔrɩ̃ ƴɛr a tɔlfʋ jie ʋlɔ sɩ na dãa nyɛ, na yel: “A nyɩmɩ wa wõ a Naaŋmɩn kɔkɩr a dɩnaa, nyɩ taa kpɛmɛ a nyɩ suur wa.”

⁸A ala dãa ɩ a Jojie tɔw na a nɩbɛ kpɛ nɩ a ʋna pɩɛnfʋ pʋɔ, a Naaŋmɩn kɔ̃ɔ lɛ ƴɛr, ƴɔ̃w nɩ bibir yuo wa.

⁹Ala-ɩ̃-sɔ a pɩɛnfʋ ʋlɔ na wɔ̃ taa nɩ a Naaŋmɩn bibie anuu-nʼayi dayen pɩɛnfʋ cãa na be be a Naaŋmɩn nɩbɛ ɩnɛ.

¹⁰A-na-ɩ a ʋlɔ na kpɛ a pɩɛnfʋ ʋlɔ a Naaŋmɩn na gbɛɛrɩ̃ pʋɔ, na mɩ jɛ na pɩɛn a ʋ tʋmɔ ɩnɛ, a mɩnɛ a Naaŋmɩn na mɩ maal.

¹¹Ala-ɩ̃-sɔ, sɩ́ nyɩrɛ a ʋna pɩɛnfʋ pʋɔ kpɛfʋ, a mɩnɛ a nɩrɛ kãw kɔ̃ɔ wõw toor wɔ̃ taa nɩ a bala na dãa be a wɛkar pʋɔ, ɩ̃ wa faa a ʋna pɩɛnfʋ pʋɔ kpɛfʋ wa.

¹²A Naaŋmɩn ƴɛrɩ̃ ɩ na bõ-mimir na mɩ bɔ̃w a ʋ tʋmɔ, ɩ̃ dɩrɛ gãw sɔ-bãjɩnɛ na dɩrɛ a lõbobo a jaa. Ʋ ma kpɛ na wa ta a yɛ̃ nɩ a sɩɛ sɔ̃w, ɩ̃ mɩ kpɛ ta a kɔbɔ cowfʋ jiir nɩ a kɔɔr pʋɔ, jʋʋrɔ nɩ a nɩrɛ pʋ-tɩɛrɩ̃sɩ, nɩ a ʋ su-tɩɛrɩ̃sɩ mɩ.

¹³Bom ma be na sɔɔlɩ̃ a Naaŋmɩn nii-sɔw wa. A yele a jaa fɛw be na cãa pʋɔ, na dɩɛl a ʋlɔ nii-sɔw sɩ na mana a yele a jaa.

¹⁴Sɩ́ bɔ̃w ɩraa a sɩ puorfʋ ƴɛrɩ̃ pʋɔ cĩcĩ, a-na-ɩ sɩ tɛrɛ na *baar-lo-nɩ-kpɛ̃ɛ na gãw a baar-lorbo ba jaa, a *Jeeju na ɩ a Naaŋmɩn Bie na va a saꞌlon ʋ jaa bar ɩ̃ ta a Naaŋmɩn nii-sɔw.

¹⁵Saa tɛrɛ baar-lo-nɩ-kpɛ̃ɛ na ma tʋɔrɔ bɔ̃wnɔ a sɩ won wa, a-na-ɩ a ʋlɔ mɩ̃ɛ dãa na pɔw a bɩɩrfʋ a jaa a sɩ kaarɩ̃, ɩ̃-cɛ ꞌwaa dãa lo fãa pʋɔ wa.

¹⁶Ala-ɩ̃-sɔ, nyɩ́ ɩ a sɩ bar nyãa ɩ̃ taw ta pɩɛl a maal-vɩlaa Naaŋmɩn naa-dakɔw, a mɩnɛ sɩ na tʋɔ pɔw a nã-bɔ̃wfʋ nɩ a maal-vɩlaa a na tʋɔ sũo sɩ a daar ʋlɔ na sɛw.