Read Birifor, Malba Eburo Sɛbɛ 7 Bible Online

Eburo Sɛbɛ 7 - Birifor, Malba bible

Eburo Sɛbɛ 7

¹A Mɛkisedɛkɩ na, dãa na ɩ a Salɛm-tẽw jamana, nɩ a saꞌlon iin Naaŋmɩn baar-loro. A lɛdaar a Abʋraham na dãa cen na jɛb a jɛb tʋɔ a jamansɩ ŋmɛɛ ɩ̃ waara, a Mɛkisedɛkɩ ʋlɔ jɔ na tuor ʋ, ɩ̃ ƴɛr a nason ƴɔ̃w ʋ,

²ɩ̃ a Abʋraham de a ala a jaa ʋ na pɔw a jɛb jie, ir a bir bõ-ƴen a bie pie pʋɔ kʋ ʋ. A Mɛkisedɛkɩ yuor par ɩ na: “A torfʋ jamana,” ɩ̃ ʋ lɛ ɩ na a Salɛm jamana, a lɛ yelʼã: “A pɩɛnfʋ jamana.”

³A mɩnɛ a nɩrɛ na ma bɔ̃w a ʋ sãa, a ʋ mã, nɩ a ʋ sãa-kʋmɔ wa, ɩ̃ tɔlfʋ jie kãw ma mɩ mana a ʋ dɔwfʋ nɩ a ʋ kũu wa, ala-ɩ̃-sɔ ʋ wɔ̃ na taa nɩ a Naaŋmɩn Bie na ɩ a baar-loro a daar a jaa.

⁴Nyɩ́ nyɛ a mɩnɛ a Mɛkisedɛkɩ na ɩ a kpɛ̃ɛ, a sɩ sãa-kʋmɔ Abʋraham wa ir a ala a jaa ʋ na pɔw a jɛb jie bir bõ-ƴen a bie pie pʋɔ kʋ ʋ.

⁵A Levi yir deme pʋɔ, a bala ba na vɛl ir a ba ɩ a baar-lorbo, sɔr be na be a ba na de a bir bõ-ƴen a bie pie pʋɔ a nɩbɛ jie, tu nɩ a Mowisi ƴɛr-kpɛn; a lɛ yelʼã a ba yɛɛr jie ʋ, a mɩnɛ a ba jaa na saarɩ̃ ɩ a Abʋraham bibiir.

⁶A Mɛkisedɛkɩ ma dãa ɩ a ba yir sʋbɔ wa, ɩ̃-cɛ ʋ de na a ʋna bir bõ-ƴen a Abʋraham jie, ɩ̃ mɩ ƴɛr a nason ƴɔ̃w ʋ, a mɩnɛ a na saarɩ̃ ɩ a Abʋraham a Naaŋmɩn na dãa pʋlɩ̃ nɩ.

⁷Baalʋ̃ʋ kãw ma be be wa. A ʋlɔ na ma ƴɛr a nason ma ɩ na kpɛ̃ɛ gãw a ʋlɔ ʋ na ƴɛr ƴɔ̃w.

⁸A Levi yir deme, nɩ-kpiirsɩ ba ɩ ɩ̃ pɔwrɔ a bir bõ-ƴen a nɩbɛ jie, ɩ̃-cɛ a ala ɩ a Mɛkisedɛkɩ ʋ, a yelʼã a Naaŋmɩn Sɛbɛ pʋɔ á ʋ cãa na.

⁹Sɩ na tʋɔ na yel a nɔhɔ̃, a mɩnɛ a Abʋraham na ya a bir bõ-ƴen a yele pʋɔ, a Levi ʋlɔ na ma pɔwrɔ a bie a bie pie pʋɔ, mɩ ya na a lɛ.

¹⁰A-na-ɩ, a lɛdaar a Mɛkisedɛkɩ na dãa jɔ tuor a Abʋraham, a Levi ba na ma dãa dɔw sɛr wa, dãa na gɔr be be a Abʋraham pʋ̃ɔ.

¹¹A baar-lorbo bala na ɩ a Levi yir deme, bala ɩ̃ dãa ɩ a ƴɛr-kpɛn jur deme a *Ɩsɩrayɛl nɩbɛ jie. A ala dãa ɩ a ba tʋmɔ ɩ na cɛcɛ, ba kɔ̃ɔ lɛ bʋɔrɔ baar-lo-kpee na tuure a Mɛkisedɛkɩ maalfʋ wa. A Mɛkisedɛkɩ ʋlɔ ma mɩ lɛ dãa be a *Aarɔ̃ yir deme maalfʋ pʋɔ wa.

¹²Ɩ̃ a ala ɩ ba lɩɛrʼã a baar-lorbo, a sɛw na a ba na mɩ lɩɛb a ƴɛr-kpɛn.

¹³A ʋlɔ ba na ƴɛrɛ a ƴɛrɩ̃ asɩmɛ ƴɔnɔ ɩ na a sɩ Nɩ-kpɛ̃ɛ, na ɩ a yir kpee sʋbɔ, a jie ʋlɔ a nɩrɛ kãw ma mɩ dãa ɩ a baar-loro wa.

¹⁴Nɩbɛ jaa bɔ̃w na ka a Juda yir deme pʋɔ ba dɔw ʋ, ɩ̃ a lɛdaar a Mowisi na dãa mana a baar-lorbo ƴɛrɩ̃, ꞌwaa dãa bʋɔl a ʋna yir yuor wa.

¹⁵Nyɩ́ nyɛ a mɩnɛ a ʋna ƴɛrɩ̃ na cɔɔrɩ̃ nyɩr yi cãa pʋɔ. Baar-lo-kpee lɛ wa na na wɔ̃ taa nɩ a Mɛkisedɛkɩ.

¹⁶ꞌWaa lɩɛb ɩ a baar-loro tu nɩ a mɩnɛ a nɩbɛ ƴɛr-kpɛn na tu taa wa, ɩ̃-cɛ ʋ lɩɛbʼã ɩ a baar-loro tu nɩ a kpɛ̃w ʋlɔ na yi a baafʋ na ma tɛrɛ a baarfʋ daar wa.

¹⁷A-na-ɩ a Naaŋmɩn Sɛbɛ yelʼã: “Fʋ ɩ na a daar a jaa baar-loro tu nɩ a mɩnɛ a Mɛkisedɛkɩ na dãa maala.”

¹⁸A nɔhɔ̃, a korĩ-cɛ ƴɛr-kpɛn hɛlʼã, a-na-ɩ ʋ balʼã ɩ̃ ma lɛ ɩ bom wa.

¹⁹ꞌWaa dãa lɩɛb bom kãw ʋ ɩ cɛcɛ wa, ɩ̃-cɛ a tɩɛrʋ̃ son na vɩɛlɛ gãw a ʋlɔ wa na lɩɛr ʋ, ɩ̃ a ʋlɔ ɩnɛ sɩ pɩɛlɛ a Naaŋmɩn.

²⁰Ɩ̃ a ala na lɛ be be ɩ na a Naaŋmɩn pʋlɩ̃fʋ ʋ na de a ʋ yuor pʋlɩ̃ nɩ. A Levi yir deme na dãa ɩ a baar-lorbo ma dãa pɔw a pʋlɩ̃fʋ a lɛ wa.

²¹Ɩ̃-cɛ a *Jeeju, a pʋlɩ̃fʋ ba dãa ƴɔ̃w nɩ ʋ, ʋ ɩ a baar-loro, a mɩnɛ a Naaŋmɩn na dãa yel ʋ: “A Nɩ-kpɛ̃ɛ de na a ʋ yuor pʋlɩ̃ nɩ, ɩ̃ ꞌwaa lɔɔ lɩɛbɛ wa. Fʋ ɩ na a daar a jaa baar-loro.”

²²Ala-ɩ̃-sɔ, sɩ bɔ̃w ka a pʋlɩ̃-ta-paalaa be na be na vɩɛlɛ gãw a korĩ-cɛ ben, ɩ̃ a Jeeju lɩɛbʼã ɩ a ʋlɔ na miile áa *pʋlɩ̃-taa ʋlɔ ma be na bũburĩ wa.

²³Bõ-kpee lɛ be na be go. A korĩ-cɛ baar-lorbo dãa na waa, a-na-ɩ nɩ-kpiirsɩ ba dãa ɩ. Ba maa tʋɔ kam a ba tʋmɔ pʋɔ wa.

²⁴Ɩ̃-cɛ a Jeeju baar-lo-tumɔ ma tʋɔrɔ cere nɩ-kpee jie wa, a-na-ɩ ʋ be na be a daar a jaa.

²⁵Ala-ɩ̃-sɔ, a bala na pɩɛlɛ a Naaŋmɩn a ʋ ɩnɛ, ʋ na tʋɔ na faa ba daadaa kpoolaa, a-na-ɩ ʋ be na be a daar a jaa na ʋ sʋɔrɔ a Naaŋmɩn á ba ɩnɛ.

²⁶A Jeeju ʋlɔ ɩ̃ sɩrɩ̃ ɩ a *baar-lo-nɩ-kpɛ̃ɛ ʋlɔ na sɛw sɩ. Ʋ ɩ na cɛcɛ, ma tɛrɛ bier nɩ maal-fãa fɩ̃ɩ wa. Ʋ be na kpee nɩ a maal-faar deme, ɩ̃ do a saꞌlon iin jɛ.

²⁷Aa lɛ sɛw ʋ loro a baba a bibie a jaa, a bana *baar-lo-nɩ-bɛrɛ kaarɩ̃ wa. A bala, ba ma de na nĩe lo a baar a ba mɩ̃ɛ maal-faar ɩnɛ, ɩ̃ pãa lo a nɩbɛ ben. Ɩ̃-cɛ a Jeeju, ʋ de na a ʋ mɩ̃ɛ lo nɩ a baar a gbɛ-daa a daar a jaa fɛw ɩnɛ.

²⁸A Mowisi ƴɛr-kpɛn pʋɔ, a bala ba na ma biin a ba ɩ a baar-lo-nɩ-bɛrɛ ɩ na a bala na mɩ tʋɔrɔ loro a fãa pʋɔ. Ɩ̃-cɛ a mɩnɛ a ƴɛr-kpɛn na ta kam baar, a Naaŋmɩn de na a ʋ yuor pʋlɩ̃ nɩ, biinʼɩ̃ a ʋ Bie na lɩɛb ɩ a cɛcɛ, a daar a jaa ɩnɛ.