Read Birifor, Malba Eburo Sɛbɛ 9 Bible Online

Eburo Sɛbɛ 9 - Birifor, Malba bible

Eburo Sɛbɛ 9

¹A dãdãw *pʋlɩ̃-taa pʋɔ, ba mɩ dãa na ƴɔ̃w a ƴɛr-tu-taa a ba puorfʋ ɩnɛ, nɩ a puorfʋ jie ba na dãa tɛrɛ a ka a tẽw pʋɔ, na ɩ a gan-yir.

²A ʋna gan-yir pʋɔ, a di-dãdãw dɩ na a di-cɛcɛ. A be a lãpa kpɛ̃ɛ be, nɩ a tabala ʋlɔ juu ba na ma bine a Naaŋmɩn buru.

³A nii-sɔw die, a cẽcen na pɔw, dɩ na a di-ciiraa,

⁴na tɛrɛ a baar lofʋ jie na ɩ a sɛlmɛ, a ʋ juu a vũu be, ma dɩrɛ a tɩ̃ɩ-nyu-vilaa. A ʋna di-ciiraa pʋɔ a daw mɩ be na be, ba na mar a sɛlmɛ pɔw ʋ jaa, na miile a pʋlɩ̃-taa. A daw ʋlɔ tɛrɛ na a sɛlmɛ yolo a *maan na be tɔ, ɩ̃ mɩ tɛrɛ a *Aarɔ̃ daa na dãa pu a tɩ-pube, nɩ a kʋsɩ-pɛrɩsɩ ba na sɛb a pʋlɩ̃-taa ƴɛrɩ̃ ƴɔ̃w.

⁵A ʋna daw juu, yele be na be ba na pɛrɩ̃ na wɔ̃ taa nɩ a Naaŋmɩn sɩ-tʋnɩsɩ ba na bʋɔlɔ a serubɛ̃ na miile a Naaŋmɩn cãa. A ba pɩrɛ pɔw na a baar lofʋ jie na ɩ a maal-fãa de-barfʋ jie. Ɩ̃-cɛ a ƴɛ̃ƴɛrɩ̃ na ma ɩ a daar ʋlɔ sɩ na ƴɛrɛ a asɩmɛ a jaa wa.

⁶A mɩnɛ ba na gbɛɛrɩ̃ a ana yele a jaa bin a nɔhɔ̃, a baar-lorbo ma kpɛɛrɛ na a bibie a jaa a dãdãw die pʋɔ a ba tʋmɔ tʋ̃fʋ ɩnɛ,

⁷ɩ̃-cɛ a *baar-lo-nɩ-kpɛ̃ɛ ɩ̃ ma kpɛ a nii-sɔw diem gbɛ-daa a yõ-bõ-ƴen pʋɔ. Dʋ̃ɔ jɩ̃ɩ ʋ ma kpɛ nɩ kʋ a Naaŋmɩn a ʋ mɩ̃ɛ ɩnɛ, nɩ a nɩbɛ maal-faar ba na ma bɔ̃w nɩ maal wa.

⁸A nɔhɔ̃, a Naaŋmɩn Sɩɛ miilʼã cãa pʋɔ, a lɛdaar a ʋna korĩ-cɛ gan-yir na cãa, áa Naaŋmɩn di-ciiraa ma yuo a nɩbɛ kpɛfʋ ɩnɛ sɛr wa.

⁹A ala ɩ na bõ-miilaa na mana sɩ a ala na be a ƴɛ̃ƴɛrɩ̃ na. A par ɩ na: a yele ala a nɩbɛ na de wa nɩ, nɩ a baba ba na lo kʋ a Naaŋmɩn, ma tʋɔrɔ lɩɛbɛ a bana popuorbo sube a ba ɩrɛ cɛcɛ wa.

¹⁰A-na-ɩ a ɩ na a ɩ̃gan buur ƴɛrɩ̃sɩ tɛw, na ɩ a bõ-dɩrɩsɩ, a bõ-nyuursɩ, a yele pɛɛrfʋ, nɩ a kʋ̃ɔ sofʋ, ba na ƴɔ̃w wa tara nɩ a yele cɔɔrɩ̃fʋ daar.

¹¹Ɩ̃-cɛ a *Kirisi wa na ɩ a baar-lo-nɩ-kpɛ̃ɛ mɩ tɛrɛ nɩ a yel-vɛlɛ ala na be ka a ƴɛ̃ƴɛrɩ̃. A gan-yir ʋlɔ pʋɔ ʋ na tʋ̃ a ʋ tʋn, vɩɛlɛ na, ɩ̃ mɩ ɩ cɛcɛ gãw a ka a tẽw pʋɔ ben. Aa ɩ nɩbɛ ɩ̃ ƴɔ̃w ʋ wa, a-na-ɩ ꞌwaa ɩ tẽw pʋɔ bom wa.

¹²Ɩ̃ a mɩnɛ a Kirisi na kpɛ a di-ciiraa pʋɔ a gbɛ-daa a daar a jaa ɩnɛ, ꞌwaa kpɛ nɩ a bʋdɛɛ nɩ a narali jɩ̃ɩ wa, ɩ̃-cɛ a ʋ mɩ̃ɛ jɩ̃ɩ ʋ kpɛ nɩ, a mɩnɛ ʋ na da sɩ faa a daadaa.

¹³A bʋdɛɛ nɩ a nadɛɛ jɩ̃ɩ, nɩ a nasabile ba na gbɔw ʋ dɩ ɩ a tãpɛlɩ̃, ba ma de mɩr a bala na sãw, a na cɔɔrɩ̃ a ba ɩ̃gan, ʋ lɩɛb ɩ a bõ-son.

¹⁴A ala ɩ a lɛ ʋ, nyɛ a mɩnɛ a Kirisi jɩ̃ɩ na nyɩrɩ̃ ɩ a bõ-son! A Naaŋmɩn Sɩɛ na ma tɛrɛ a baarfʋ daar wa, tɔw ʋ na, ʋ lɩɛb ɩ a baar-lo-bom cɛcɛ a Naaŋmɩn nii-sɔw, a ʋ jɩ̃ɩ na pɛw na a sɩ tɩɛrɩ̃sɩ a sɩ tʋ̃-pɔrsɩ na sãw, a sɩ na tʋɔ puoro a Naaŋmɩn-mimir.

¹⁵Ala-ɩ̃-sɔ, a Kirisi ɩ na a pʋlɩ̃-ta-paalaa *lɔlʋɔrɔ, a mɩnɛ a bala a Naaŋmɩn na bʋɔl na pɔw a yel-sono ala na ma tɛrɛ a baarfʋ wa, a Naaŋmɩn na pʋlɩ̃ nɩ ba. Ba na tʋɔ na pɔw a ala, a-na-ɩ a Kirisi kpi na, na tʋɔ faa a bala na dãa sãw a ƴɛr-kpɛn a dãdãw pʋlɩ̃-taa daar.

¹⁶A ala ɩ a nɩrɛ ƴɛrʼã a nʋɔr biin a ʋ bibiir ɩnɛ, a sɛw na a ba na bɔ̃w, áa sʋbɔ kpi na, ɩ̃ pãa tɛrɛ a bom ʋlɔ.

¹⁷A-na-ɩ a nʋɔr biinfʋ ma ɩ bom wa a lɛ a ʋlɔ na biin a nʋɔr na cãa, ɩ̃-cɛ a lɛ ʋ na kpi baar, lɛ ʋ ɩ a bom.

¹⁸Ala-ɩ̃-sɔ, a nʋɔr ʋlɔ a Naaŋmɩn na dãa ƴɛr biin ʋ ɩ a dãdãw pʋlɩ̃-taa ma dãa ɩ bom wa, ɩ̃ a ala ma ɩ a jɩ̃ɩ na dãa deer wa.

¹⁹A mɩnɛ a Mowisi na dãa man a ƴɛr-kpɛn ƴɛr-bie a jaa kʋ a nɩbɛ ba jaa baar, ʋ de na nali jɩ̃ɩ nɩ a kʋ̃ɔ, ɩ̃ lɛ de a pɛr jɩ̃ɛw kɔbɔ, nɩ a tɩɛ dale ba na bʋɔlɔ a *ɩsɔb, mɩrʼɩ̃ a ƴɛr-kpɛn sɛbɛ, nɩ a nɩbɛ ba jaa,

²⁰yele nɩ: “A nanɩ ɩ na a jɩ̃ɩ na gbɛɛrɩ̃ a pʋlɩ̃-taa a Naaŋmɩn na kʋ nyɩ a nyɩ na ɩraa dẽdẽ a ʋ pʋɔ.”

²¹A Mowisi mɩ de na a jɩ̃ɩ mɩr a gan-yir nɩ a puorfʋ yele a jaa.

²²A-na-ɩ a ƴɛr-kpɛn pʋɔ, a wɔ̃ na taa nɩ a jɩ̃ɩ ma cɔɔrɩ̃ a yele a jaa, ɩ̃ a jɩ̃ɩ ma deer wa, a maal-fãa de-barfʋ ma be wa.

²³A dãa na sɩrɩ̃ sɛw a ba na cɔɔrɩ̃ a saa juu yele ala ba na tɔɔn a nɔhɔ̃, ɩ̃-cɛ, a ala na ɩ a saa juu yele mɩ̃ɛ, a bʋɔrɔ na a baar-lo-yele ala na gãw a dãdãw ben.

²⁴A-na-ɩ a *Kirisi ma kpɛ a ji-cɛcɛ ʋlɔ pʋɔ a nɩbɛ na maal, na ɩ a saa juu bõ-son bõ-tɔɔnaa wa, ɩ̃-cɛ a saa juu tɔr ʋ do, a jie ʋlɔ ʋ na ɩraa a ƴɛ̃ƴɛrɩ̃ a Naaŋmɩn nii-sɔw a sɩ ɩnɛ.

²⁵A ala ɩ a Jufisɩ *baar-lo-nɩ-kpɛ̃ɛ ʋ, ʋ ma kpɛ nɩ na a dʋ̃ɔ jɩ̃ɩ a di-ciiraa pʋɔ a yomo a jaa, ɩ̃-cɛ a Kirisi ma kpɛ gbɛɛ yayaw a ʋ mɩ̃ɛ tɩɩrfʋ ɩnɛ wa.

²⁶A ala dãa ɩ a lɛ ʋ, ʋ naa dãa na nyɛ a hʋʋr gbɛɛ yayaw, wa nyɔw nɩ a tẽw maalfʋ daar wa ta nɩ a ƴɛ̃ƴɛrɩ̃. Ɩ̃-cɛ a mɩnɛ a baarfʋ daar na pɩɛlɛ, a Naaŋmɩn miilʼɩ̃ ʋ na a gbɛ-daa a daar a jaa ɩnɛ, ʋ na hɛl a maal-fãa a ʋ mɩ̃ɛ ʋ na lo nɩ a baar ɩnɛ.

²⁷A be na a nɩbɛ ba jaa jie a ba na kpi gbɛ-daa; a ala ɩ̃ baar, a ƴɛrɩ̃ guorfʋ na pãa tu.

²⁸A lɛ ʋ mɩ a Kirisi lɩɛbʼã ɩ a gbɛ-daa baar-lo-bom a nɩ-yaw maal-faar de-barfʋ ɩnɛ. Ɩ̃ sɩ na lɛ nyɛ ʋ na gbɛɛ ayi pʋɔ, a kɔ̃ lɛ ɩ a maal-fãa de-barfʋ ɩnɛ ʋ wa, ɩ̃-cɛ a bala na cɛlɛ ʋ faafʋ ɩnɛ ʋ na wa.