Read Birifor, Malba Jakɩ Sɛbɛ 2 Bible Online

Jakɩ Sɛbɛ 2 - Birifor, Malba bible

Jakɩ Sɛbɛ 2

¹Ɩ̃ yɛɛr, a mɩnɛ nyɩ na sɔw de a sɩ Nɩ-kpɛ̃ɛ *Jeeju-Kirisi na yi a yuor ma ɩ wa, nyɩ taa tuure a nɩbɛ nʋnɔ wa.

²A ala ɩ a nɩbɛ ayi wɩ na kpɛ a nyɩ duo-taa yir, a bõ-ƴen parɩ̃sɩ, su nɩ a sɛlmɛ nubi-suuraa, ɩ̃ a kãw na ɩ a nɩ-kɔmɔ su a cẽcen kpɔr,

³ɩ̃ a nyɩ lɩɛb a nii-sɔw cɔw a ʋlɔ na parɩ̃sɩ, ɩ̃ yel ʋ: “Wa jɛ ka a jaaji-vɩlaa juu,” ɩ̃ lɩɛb yel a nɩ-kɔmɔ: “Fʋ̃ʋ ʋlɔ, ɩraa ka,” mɩɩ “Jɛ ka a tene a ɩ̃ gbɛɛ pulẽe,”

⁴a ala ɩ a lɛ a be, má a nyɩ sɔ̃w nyɩ tuure na a nɩbɛ nʋnɔ, mɩ guoro nɩ a yele nɩ tɩɛrɩ̃-kpansɩ.

⁵Ɩ̃ yɛ-nʋnɩsɩ, nyɩ́ cɛlɛ! A Naaŋmɩn vɛlʼã ir a bala na ɩ a tẽw na nɩ-kɔmsɩ, a mɩnɛ a ba na le a ƴɔ̃w-nyãa pʋɔ, na ba pɔw a Naaŋmɩn naa-tẽw ʋ na pʋlɩ̃ nɩ a bala na nʋnɔ ʋ.

⁶Ɩ̃-cɛ a nyɩmɩ, nyɩ ma kpɛrɛ na a nɩ-kɔmsɩ! Aa ɩ a bala na le ɩ̃ ma kpowro nyɩ wa…? Aa mɩ ɩ a bala ma tawra nyɩ cere nɩ a ƴɛrɩ̃ guorfʋ jiir wa…?

⁷Aa ɩ a bala ma kpɛrɛ a yo-son ʋlɔ a Naaŋmɩn na kʋ nyɩ wa…?

⁸A ala sɩrɩ̃ ɩ nyɩ maala na tuure nɩ a mɩnɛ a Naaŋmɩn Sɛbɛ ƴɛr-kpɛ̃w juu na yele: “Á fú nʋ a fʋ tɔ sʋbɔ a fʋ mɩ̃ɛ kaarɩ̃,” nyɩ maala na a vɩlaa.

⁹Ɩ̃-cɛ a ala ɩ nyɩ tuure na a nɩbɛ nʋnɔ, a ƴɛr-kpɛn na ƴɔ̃w nyɩ na a ƴɛrɩ̃, a-na-ɩ nyɩ mabʼã a ʋ jie.

¹⁰A ʋlɔ na jɔrɔ a ƴɛr-kpɛn a jaa, ɩ̃ wa mab a bõ-ƴen jie, ʋ sãw na a ƴɛr-kpɛn a jaa jie.

¹¹A ʋlɔ na yel: “Taa wa gana nɩ pɔɔ-kpee mɩɩ dab-kpee wa,” ʋ lɛ yelʼã go: “Taa wa kúrɔ nɩrɛ wa.” Ɩ̃ a ala ɩ faa gã nɩ pɔɔ-kpee mɩɩ dab-kpee wa, ɩ̃ na fʋ kú a nɩrɛ, fʋ mabʼã a ƴɛr-kpɛn jie.

¹²Nyɩ́ ɛ̃ɛ ƴɛrɛ ɩ̃ mɩ maala bɔ̃w nɩ ka ba nɔɔ guorʼã a nyɩ ƴɛrɩ̃ tu nɩ a ƴɛr-kpɛ̃w ʋlɔ na maala a nɩrɛ ʋ sɔrɛɛ a ʋ mɩ̃ɛ.

¹³A-na-ɩ a ƴɛrɩ̃ guorfʋ daar, a ʋna sʋbɔ na ma dãa tɛrɛ nã-bɔ̃wfʋ wa, a Naaŋmɩn kɔ̃ mɩ bɔ̃w ʋ nãw wa. Ɩ̃-cɛ a nɩrɛ nãw bɔ̃wfʋ tɛrɛ na a tʋɔfʋ gãw a ƴɛrɩ̃ guorfʋ.

¹⁴Ɩ̃ yɛɛr, bõ a na ɩ a nɩrɛ yel á ʋ tɛrɛ na a ƴɔ̃w-nyãa, ɩ̃-cɛ a ʋ maal-bie ma miile á ʋ tɛrɛ ʋ na wa? A ƴɔ̃w-nyãa par-bʋrɔ ʋlɔ na tʋɔ na faa ʋ mɩɩ?

¹⁵A ala ɩ a yɛbɛ kãw mɩɩ a yɛ-pɔw kãw tɛrɛ na a salĩɓuor, mɩ faa nɩ a bibie-a-jaa bõ-dɩraa,

¹⁶ɩ̃ a nɩrɛ kãw a nyɩ sɔ̃w yel ʋ: “Cen vɩlaa, kpɛ a ule-ule pʋɔ ɩ̃ dɩ pi,” ɩ̃ ma kʋ ʋ a ala na sɛw nɩ a ɩ̃gan wa, boolo a na sũo?

¹⁷Lɛ a mɩ be nɩ a ƴɔ̃w-nyãa. A ala ɩ ƴɛr-bie tɛw ʋ tɔɔ ɩ, ma tɛrɛ a maal-bie wa, bõ-kũu ʋ.

¹⁸Ɩ̃-cɛ a numɔ-wa-sɔw a nɩrɛ na yelʼã: “A maa, ɩ̃ tɛrɛ na a ƴɔ̃w-nyãa, ɩ̃ a fʋ̃v a fʋ tɛrɛ a maal-bie.” A nɩrɛ yel a lɛ, ɩ̃ na yel ʋ na: “Miil ma a fʋ ƴɔ̃w-nyãa jaalaa ɩ̃ je kãa, ɩ̃ a maa, ɩ̃ na miilʼɩ̃ fʋ na a ɩ̃ maal-bie na miile a ɩ̃ ƴɔ̃w-nyãa ɩ̃ na tɛrɛ.”

¹⁹Fʋ tɛrɛ na ƴɔ̃w-nyãa á Naaŋmɩn bõ-ƴen tɛw ɩ̃ be be…? A vɩlaa na ʋlɔ. A kɔ̃tɔnsɩ mɩ, mɩ tɛrɛ na a ʋna ƴɔ̃w-nyãa naa, jɔrɔ nɩ a dãbɩ̃ɛ, mine nɩ.

²⁰Fʋna nɩ-pɔrɔ naa, fʋ bʋɔrɔ na fʋ bɔ̃w áa ƴɔ̃w-nyã-jaalaa ma tɛrɛ par wa mɩɩ?

²¹A sɩ sãa-kʋmɔ Abʋraham, bõ ɩnɛ a Naaŋmɩn dãa nyɛ ʋ ʋ tor? Aa dãa ɩ a ʋ maal-bie ɩnɛ a lɛdaar ʋ na de a ʋ bi-daba Ɩjakɩ a ʋ lo nɩ a baar kʋ ʋ wa…?

²²Faa nyɛ wa…? A ʋ ƴɔ̃w-nyãa nɩ a maal-bie ma dãa na lãa cere taa, a maal-bie ma maal a ƴɔ̃w-nyãa ʋ bɔ̃w karɩ̃ ta vɩlaa.

²³A lɛ, a maalʼã a ala a Naaŋmɩn Sɛbɛ na yel: “A Abʋraham ƴɔ̃w na a Naaŋmɩn a nyãa, ɩ̃ a ʋ ƴɔ̃w-nyãa ɩnɛ a Naaŋmɩn de ʋ ʋ ɩ nɩ-toraa.” Ɩ̃ a Naaŋmɩn bʋɔlɔ ʋ a ʋ baraa.

²⁴Nyɩ nyɛ na, a nɩrɛ torfʋ a Naaŋmɩn nii-sɔw yire na a ʋ maal-bie jie; aa yire a ʋ ƴɔ̃w-nyã-jaalaa jie tɛw wa.

²⁵Nyɩ́ tɩɛrʼɩ̃ a pɔw-baa ʋlɔ na dɩ a Arahab mɩ. A ʋ maal-bie ɩnɛ mɩ a Naaŋmɩn sɔw de ʋ, ʋ ɩ a nɩ-toraa, a mɩnɛ ʋ na de a Jufisɩ *nɩ-tʋnɩsɩ bala vɩlaa, na ʋ miil ba a sɔr kpee a ba de lɩɛb kul.

²⁶A-na-ɩ a mɩnɛ a ɩ̃gan na ma ɩ a bõ-kũu a ala ɩ ꞌwaa tɛrɛ a sɩɛ wa, lɛ a ƴɔ̃w-nyãa ma mɩ ɩ a bõ-kũu a ala ɩ a maal-bie ma be tɔ wa.