Read Birifor, Malba Jakɩ Sɛbɛ 3 Bible Online

Jakɩ Sɛbɛ 3 - Birifor, Malba bible

Jakɩ Sɛbɛ 3

¹Ɩ̃ yɛɛr, a nyɩ sɔ̃w, nyɩ taa waa na nyɩ bʋɔrɔ nyɩ ɩ a jãjaanba wa, a-na-ɩ nyɩ bɔ̃w ka a sɩmɩ na ɩ a jãjaanba, a sɩ ƴɛrɩ̃ guorfʋ na bɛlɩ̃ na gãw a ŋmɛɛ ben.

²Sɩ jaa ma tule na dɩmɛ-dɩmɛ. A ala ɩ a nɩrɛ be na be maa tulĩ a ʋ ƴɛrɩ̃ ƴɛrfʋ pʋɔ wa, a nɩrɛ ʋlɔ ma tɛrɛ cɛfʋ jie wa, ɩ̃ mɩ tʋɔrɔ nyɔwrɔ a ʋ mɩ̃ɛ ʋ jaa tɛrɛɛ.

³A ala ɩ sɩ ma ƴɔ̃w na a kure a wibe nɔɛ pʋʋr a ba na wono sɩ a toor, sɩ na mɩ tʋɔ na gɔr a ba ɩ̃gana a jaa cere nɩ a jiir ala sɩ na bʋɔrɔ.

⁴Mɩɩ, nyɩ tɩɛrʼɩ̃ a gbor-bɛrɛ ala na be a man-bɛrɛ jur, a mɩnɛ ba na ma saarɩ̃ bɛrmɛ, ɩ̃ a sɛsɛb ma tɔrɔ ba na nɩ fãgã, bõ-bile jaa fɩ̃ɩ ba ma de mɔnɔ nɩ ba, vɩrɛ nɩ ba a mɩnɛ ba na bʋɔrɔ.

⁵A lɛ a mɩ be nɩ a dɛlɩ̃bir. Ʋ pabʼã a ɩ̃gan pʋɔ, ɩ̃ waa yo-bɔb ma ɩ wa. Nyɩ tɩɛrʼɩ̃ a vũu bile na ma tʋɔ nyɔw a mɔ-kpɛ̃ɛ na gã cere, na ʋ dɩ ʋ jaa.

⁶A dɛlɩ̃bir mɩ, vũu ʋ. Ʋ mɩ ɩ na a burbur tẽw na be a sɩ ɩ̃gan ɓãbie pʋɔ, sɔbɔ a sɩ ɩ̃gan ʋ jaa. Ʋ nyɔw na a sɩ baafʋ ʋ jaa sɩ na tɛrɛ ka a tẽw pʋɔ, ɩ̃ dɩrɛ nɩ a vũu ʋlɔ na yi a wɛfʋ vũu pʋɔ.

⁷A nɩrɛ na tʋɔ na maal a wɛ-dʋn bʋrɔ bʋrɔ, nɩ a wɛ-lili, a yel-vurisɩ, nɩ a kʋ̃ɔ pʋɔ dʋn a ba bal a ʋ jie, ɩ̃ a lɛ a nɩbɛ ma maal.

⁸Ɩ̃-cɛ a dɛlɩ̃bir, nɩrɛ ma be na tʋɔ maal ʋ ʋ bal wa. Ʋ ɩ na a bõ-bier na ma be tʋɔfʋ jie wa. A mɩ wɔ̃ na taa nɩ ba jɛl ʋ na ʋ jaa nɩ a lɔw ʋlɔ na kúrɔ.

⁹A ʋlɔ naa sɩ ma de pɛwrɛ nɩ a Nɩ-kpɛ̃ɛ na ɩ a sɩ Sãa, ɩ̃ ma lɛ de ʋ lɩɛb tʋrɔ nɩ a nɩbɛ a Naaŋmɩn na mɛ a ba wɔ̃ taa nɩ ʋ.

¹⁰A ʋna nɔ-bõ-ƴen naa pʋɔ a pɛwfʋ nɩ a tʋ-bie ma yire. Ɩ̃ yɛɛr, aa sɛw a na be a lɛ wa.

¹¹A kʋ̃ɔ nʋ̃ɔ nɩ a kʋ̃ɔ tuo na tʋɔ na lãw bune yire a bɔw bõ-ƴen pʋɔ mɩ?

¹²Ɩ̃ yɛɛr, a fɩgɩ tɩɛ na tʋɔ na wɔ̃ a olivi bie mɩɩ? Mɩɩ a dɩvɛ̃ tɩɛ na tʋɔ na wɔ̃ a fɩgɩ mɩ? A lɛ ʋ mɩ, a bɔw ʋlɔ pʋɔ a kʋ̃ɔ na tɛrɛ a nasõ na bune yire, kʋ̃ɔ nʋ̃ɔ ma mɩ tʋɔrɔ tuure a ʋna bɔw yire wa.

¹³Nɩrɛ be na a nyɩ sɔ̃w na kpaar, mɩ tɛrɛ nɩ a bɔ̃wfʋ mɩɩ? A sɛw na a ʋ yɛ̃ son á miil a ʋ maal-bie pʋɔ ʋ na maala nɩ a hɛlɛlɛ yɛ̃ nɩ a kpaarfʋ.

¹⁴A ala ɩ a nyɩ sube pʋʋr a nyuur kʋrɔ nyɩ na faara, ɩ̃ a nyɩ ma faara taa bʋɔrɔ nɩ a ju-kpɛ̃ɛ, nyɩ taa bʋɔrɔ a yuor sãwna nɩ a yel-mɩ̃ɛ bara wa.

¹⁵A ʋna kpaarfʋ naa ma yi a Naaŋmɩn jie wa. Ka tẽw pʋɔ kpaarfʋ ʋ a nɩsaa salaa na tɛrɛ, a yi a kɔ̃tɔn jie.

¹⁶A-na-ɩ a jie ʋlɔ a nyuur nɩ a faa-tar na be, be a nyanyaafʋ nɩ a tʋ̃-kpansɩ bʋrɔ bʋrɔ ma mɩ be.

¹⁷Ɩ̃-cɛ a nɩrɛ ʋlɔ na tɛrɛ a kpaarfʋ ʋlɔ na yi a Naaŋmɩn jie ma ɩ na cɛcɛ sɛr, ɩ̃ pãa tɛrɛ a su-ɓaar, nɩ hɛlɛlɛ yɛ̃. Ʋ̃ ma balʼã, tɛrɛ nɩ a nã-bɔ̃wfʋ, maala nɩ a vɩlaa. ꞌWaa tuure wa, ɩ̃ ma ɩ poe ayi sʋbɔ wa.

¹⁸A bala na bʋɔrɔ a pɩɛnfʋ a ba sɔ̃w ma tʋnɔ nɩ na a su-ɓaar, na ba pɔw a baafʋ ʋlɔ na tor.