Read Birifor, Malba Jakɩ Sɛbɛ 4 Bible Online

Jakɩ Sɛbɛ 4 - Birifor, Malba bible

Jakɩ Sɛbɛ 4

¹Bõ ma waara nɩ a faa-taa nɩ a jɛb a nyɩ sɔ̃w? Má a yele ala vɩláa na ma yɛbɛ ƴɛbɛ nyɩ a ɩ̃gana, ala jie a ma yi.

²A yele vɩláa ma nyɔw nyɩ na, ɩ̃ a nyɩ maa pɔw wa; ala-ɩ̃-sɔ a nyɩ ma kúrɔ taa. Nyɩ ma tɛrɛ na a nyuur a bom ɩnɛ, ɩ̃ nyɩ maa tʋɔ pɔw wa; ala-ɩ̃-sɔ a nyɩ ma jɛbɛ faara nɩ taa. Nyɩ maa pɔwrɔ wa, a-na-ɩ nyɩ maa sʋɔr a Naaŋmɩn jie wa.

³Nyɩ ma sʋɔrʼã ɩ̃ maa pɔw wa, a-na-ɩ nyɩ maa bɔ̃w sʋɔr a mɩnɛ a na sɛw wa. Ɩ̃-cɛ nyɩ ma sʋɔrʼã na tʋɔ maalʼɩ̃ a ala vɩláa na nyɔw nyɩ.

⁴A nyɩna nɩ-gõgolĩsɩ naa! Nyaa bɔ̃w ka a tẽw pʋɔ yele nʋfʋ ma wa nɩ na a ꞌlaarfʋ a nɩrɛ nɩ a Naaŋmɩn jie wa mɩɩ? A nɩrɛ ʋlɔ na bʋɔrɔ ʋ nʋ a tẽw na pʋɔ yele ma lɩɛbʼã ɩ a Naaŋmɩn san-sʋbɔ.

⁵Aa ɩ pɔrɔ a Naaŋmɩn Sɛbɛ yel, áa Naaŋmɩn ma ɓĩi na tɔ a sɩɛ ʋlɔ ʋ na ƴɔ̃w sɩ.

⁶Ɩ̃-cɛ a Naaŋmɩn sũofʋ bɛrmɛ na ma ɩ wa. Ala-ɩ̃-sɔ a Naaŋmɩn Sɛbɛ yelʼã: “A Naaŋmɩn ma varʼã a yo-bʋɔrbɔ a sɔr, ɩ̃ ma sũo a bala na wur a ba mɩ̃ɛ.”

⁷Ala-ɩ̃-sɔ, nyɩ́ bal a nyɩ mɩ̃ɛ a Naaŋmɩn jie. Nyɩ taa kʋ a Satã a sɔr fɩ̃ɩ wa, ɩ̃ ʋ na jɔ na jãa ɩ̃ cɛ nyɩ bar.

⁸Nyɩ́ pɩɛlɛ a Naaŋmɩn, ɩ̃ ʋ na mɩ pɩɛlʼɩ̃ nyɩ na. Nyɩna maal-faar deme naa, nyɩ́ pɔl a nyɩ nur! Nyɩna poe ayi deme naa, nyɩ́ cɔɔrɩ̃ a nyɩ sube!

⁹Nyɩ́ waala a nãw! Nyɩ́ be ni-sɔbaa pʋɔ na nyɩ cire nɩ mɔtɔ̃-kʋ̃ɔ. Nyɩ́ ɩ a nyɩ laar lɩɛb ɩ ni-sɔbaa, a nyɩ nʋ̃ɔ mɩ lɩɛb ɩ su-sãwfʋ.

¹⁰Nyɩ́ wur a nyɩ mɩ̃ɛ a Nɩ-kpɛ̃ɛ nii-sɔw, ɩ̃ ʋ na jɛw nyɩ na a nyɩ do.

¹¹Ɩ̃ yɛɛr, nyɩ taa sãwna taa yoe wa. A nɩrɛ ɩ̃ sãwna a ʋ yɛbɛ kãw yuor, mɩɩ jɛ guoro a ʋ ƴɛrɩ̃, a Naaŋmɩn ƴɛr-kpɛn ʋ guoro a lɛ, ƴɛrɛ nɩ a bier ƴɔnɔ ʋ. Ɩ̃-cɛ a ala ɩ fʋ guoro na a ala a ƴɛr-kpɛn na yele, a miilʼã a faa ɩ a ʋlɔ na jɔrɔ a ƴɛr-kpɛn wa, ɩ̃ fʋ ɩ na a ƴɛr-kpɛn-guoro.

¹²Naaŋmɩn tɛw ɩ̃ ɩ a ƴɛr-kpɛn-tɩɩrɛ, nɩ a ƴɛr-guoro, a ʋlɔ na tʋɔrɔ faara a nɩrɛ, mɩɩ maala a nɩrɛ ʋ wɛrɛ. Ɩ̃-cɛ a fʋ̃ʋ, ala fʋ mɩ ɩ na fʋ guoro a fʋ tɔ sʋbɔ ben?

¹³A ƴɛ̃ƴɛrɩ̃ na, a nyɩmɩ na ma yele, a dɩnaa mɩɩ a bio, a nyɩ na cenʼã tẽw kãw maal yõ-bõ-ƴen, na nyɩ ƴab pɔw dɔɔlaa, nyɩ́ cɛlɛ ma!

¹⁴A nyɩmɩ na ma bɔ̃w a mɩnɛ a nyɩ baafʋ na beree a bio wa, bõ a nyɩ baafʋ ɩ? Nyɩ wɔ̃ na taa nɩ a uulũu na ma nyɩr a jie naan, ɩ̃ lɛ bũburĩ a wɩɛrʼãa.

¹⁵Ɩ̃ nyɩ ɛ̃ɛ na sɛw nyɩ ma yel: “A ala ɩ a Nɩ-kpɛ̃ɛ sɔw na, a sɩ cãa, sɩ na maalʼã asɩmɛ mɩɩ a nyaa.”

¹⁶Ɩ̃-cɛ a ƴɛ̃ƴɛrɩ̃ na, nyɩ ma bʋɔrɔ na a yuor miile nɩ a nyɩ mɩ̃ɛ. A ʋna yo-bɔb bʋrɔ naa ɩ na bier.

¹⁷Ala-ɩ̃-sɔ, a nɩrɛ lɛ na bɔ̃w a son maalfʋ ɩ̃ ma maal wa, fãa ʋ maal.