Read Birifor, Malba Jakɩ Sɛbɛ 5 Bible Online

Jakɩ Sɛbɛ 5 - Birifor, Malba bible

Jakɩ Sɛbɛ 5

¹A ƴɛ̃ƴɛrɩ̃ na, a nyɩmɩ na mɩ le, nyɩ́ cɛlɛ ma! Nyɩ́ kono wuure nɩ a na-bebe ala nɔɔ tara nyɩ ɩnɛ.

²A nyɩ na-yele pʋ̃ɔ na. A pɛpɛlɛ dɛlɩ̃ na a nyɩ cẽcene sãw bar.

³A nyɩ sɛlmɛ nɩ a nyɩ libie lo na bajɩ̃ɩ, ɩ̃ a ba bajɩ̃ɩ lofʋ nɔɔ ƴɔ̃w nyɩ na ƴɛrɩ̃, ɩ̃ dɩ nyɩ vũu kaarɩ̃. A ɩ na a baarfʋ daar, ɩ̃-cɛ nyɩ woorʼã a na-yele bin.

⁴Nyɩ́ nyɛ, a bala nyɩ na de a ba cɛ nyɩ a ci, ɩ̃-cɛ a nyɩ ŋmaa ba a yafʋ, a ba yar ŋmeere na cɛlɩ̃sɩ, ɩ̃ a ci-cɩɛrbɛ wuurfʋ cenʼã na ta a Naaŋmɩn na ɩ a fãwsɩ a jaa Nɩ-kpɛ̃ɛ jie.

⁵Nyɩ dɩ na nʋ̃ɔ ka a tẽw pʋɔ, maalʼɩ̃ a ala nyɩ na bʋɔrɔ. Ɩ̃-cɛ a mɩnɛ nyɩ na ƴɔw a nyɩ mɩ̃ɛ, a ɩ na a kúfʋ ɩnɛ a nii kaarɩ̃.

⁶Nyɩ ƴɔ̃w na a bala na tor a ƴɛrɩ̃, na nyɩ kú ba, ɩ̃ baa maal bom wa.

⁷Ala-ɩ̃-sɔ yɛɛr, nyɩ́ nyɔw suur wa ta nɩ a Nɩ-kpɛ̃ɛ waa daar. Nyɩ́ nyɛ a kʋɔraa. Ʋ ma nyɔw na suur ɩ̃ cɛlɛ a wɔ̃-sono ala na yire a ʋ puo pʋɔ. Ʋ ma cɛlɛ na a sa-jʋbaa nɩ a lamɩ na tʋɔ tɔl baar.

⁸A nyɩmɩ mɩ, nyɩ́ tɛrɛ su-nyɔwraa ɩraa nɩ cĩcĩ, a-na-ɩ a Nɩ-kpɛ̃ɛ waa pɩɛlʼã.

⁹Yɛɛr, nyɩ taa hũhune taa wa, a mɩnɛ a Naaŋmɩn kɔ̃ wa ƴɔ̃w nyɩ ƴɛrɩ̃ wa. Nyɩ́ nyɛ, a Ƴɛr-guoro be na a dɔ̃dɔr nʋɔr.

¹⁰Yɛɛr, nyɩ́ tɩɛrʼɩ̃ a Naaŋmɩn ƴɛr-hierbe na dãa de a Nɩ-kpɛ̃ɛ yuor ƴɛrʼɩ̃, a mɩnɛ a ba won nɩ a ba su-nyɔwraa na dãa be, ɩ̃ de ba a ba ɩ nyɩ bõ-tɔɔnsɩ.

¹¹Nyɩ bɔ̃w ka a bala na dãa tɛrɛ a su-nyɔwraa ɩraa nɩ, bala sɩ de a ba ɩ a nʋ̃ɔ deme. Nyɩ wõ na a Jɔb su-nyɔwraa ƴɛrɩ̃, ɩ̃ mɩ nyɛ a ala a Nɩ-kpɛ̃ɛ na maal ʋ a baarfʋ daar. A-na-ɩ a Nɩ-kpɛ̃ɛ ɩ na pʋ-pɩlaa sʋbɔ, tɛrɛ nɩ nã-bɔ̃wfʋ.

¹²Ɩ̃ yɛɛr, a ala na ɩ a kpɛ̃ɛ ɩ na, nyɩ taa wa pɔrɔ wa. Nyɩ taa wa pɔrɔ nɩ a saꞌlon, mɩɩ a tene, mɩɩ bõ-kpee kãw wa. Ɩ̃ nyɩ́ ma yel a “Ɔɔ,” a ala ɩ sɩrɛ ʋ, ɩ̃ yel a “Kpee,” a ala ma ɩ sɩrɛ ʋ wa, a mɩnɛ a nyɩ kɔ̃ wa pɔw ƴɛrɩ̃ a ƴɛrɩ̃ guorfʋ daar wa.

¹³Nɩrɛ kãw be na a nyɩ sɔ̃w ɩ̃ be won pʋɔ mɩɩ? ṹ sʋɔrɔ Naaŋmɩn. Nɩrɛ be na be na be a nʋ̃ɔ pʋɔ mɩɩ? ṹ cɩɛrɛ a yele pɛwrɛ nɩ a Naaŋmɩn.

¹⁴Nɩrɛ be na a nyɩ sɔ̃w a ꞌwɔbɔ ʋ mɩɩ? ṹ bʋɔl a duo-puor-ni-dierbe a ba wɩ sʋɔr a Naaŋmɩn, pʋrʼɩ̃ ʋ kãa, bʋɔlʼɩ̃ a Nɩ-kpɛ̃ɛ yuor ƴɔ̃w ʋ.

¹⁵A sʋɔrfʋ ʋlɔ ba na sʋɔrɔ nɩ a ƴɔ̃w-nyãa na kpaarʼã a wʋlɩ̃ sʋbɔ, ɩ̃ a Nɩ-kpɛ̃ɛ na maal ʋ na ʋ ir. A ʋlɔ dãa maal faar, ʋ na de na bar kʋ ʋ.

¹⁶Ala-ɩ̃-sɔ, nyɩ́ caala a nyɩ maal-fãa kʋrɔ taa, ɩ̃ mɩ sʋɔrɔ a Naaŋmɩn ƴɔnɔ taa, a mɩnɛ a nyɩ na tʋɔ kpaar a nyɩ wʋlɩ̃sɩ pʋɔ. A nɩ-toraa Naaŋmɩn sʋɔrfʋ tɛrɛ na fãgã na maal bom.

¹⁷A Eli dãa na ɩ nɩrɛ a sɩ kaarɩ̃, ɩ̃-cɛ ʋ marʼã a Naaŋmɩn sʋɔrfʋ a mɩnɛ a saa na ŋmaa a war yomo ata nɩ ŋmãa.

¹⁸A ala ɩ̃ baar, ʋ lɛ sʋɔrʼã a Naaŋmɩn, ɩ̃ a saa wa na, a yele bɩ a tẽw juu.

¹⁹Ɩ̃ yɛɛr, a ala ɩ bõ-ƴen a nyɩ sɔ̃w bɔrʼã jãa taa nɩ a yel-mɩ̃ɛ, ɩ̃ a nɩrɛ lɛ lɩɛb ʋ wa nɩ,

²⁰nyɩ́ bɔ̃w nɩ a asɩmɛ: a ʋlɔ maal a maal-fãa sʋbɔ na bɔr ʋ lɩɛb wa a sɔr son pʋɔ, ʋ na wɩɛ ʋ na a kũu ɩnɛ, ɩ̃ a Naaŋmɩn na fɛ na a maal-faar yaw bar.