Read Birifor, Malba 1 Pɩɛr Sɛbɛ 1 Bible Online

1 Pɩɛr Sɛbɛ 1 - Birifor, Malba bible

1 Pɩɛr Sɛbɛ 1

¹A maa Pɩɛr na ɩ a *Jeeju-Kirisi *nɩ-tʋnaa ɩ̃ tɩɩrɛ a sɛbɛ na kʋrɔ a nyɩmɩ a Naaŋmɩn na vɛl ir, na ɩ a saanba yɛ̃yɛlɩ̃ be a Pɔ̃, a Galatɩ, a Kapadɔsɩ, a Ajɩ nɩ a Bitini wɛɛ.

²A sɩ Sãa Naaŋmɩn de na nĩe bɔ̃w nyɩ, a ʋ Sɩɛ na ow nyɩ a nyɩ ɩ a cɛcɛ, a nyɩ na mɩ wono a Jeeju-Kirisi a toor, ɩ̃ ʋ na mɩ mɩr nyɩ a ʋ jĩɩ. A sũofʋ nɩ a pɩɛnfʋ á lɛ dɔɔl a nyɩ jie.

³A Naaŋmɩn na ɩ a sɩ Nɩ-kpɛ̃ɛ *Jeeju-Kirisi Sãa ɩ̃ sɔ pɛwfʋ! A mɩnɛ ʋ na maal a Jeeju-Kirisi ʋ ir a kũu pʋɔ, ʋ bɔ̃w sɩ na a nãw ɩ̃ dɔw sɩ a dɔw-paalaa, a sɩ na tʋɔ tɛrɛ a tɩɛrʋ̃ son a ʋna baafʋ pʋɔ,

⁴cɛlɛ nɩ a yel-sono ala a Naaŋmɩn na gbɛɛrɩ̃ bin sɩ a saa juu, na ma tɛrɛ sãwfʋ mɩɩ a sɔbfʋ wa, ɩ̃ ma mɩ tʋɔrɔ kpooro wa.

⁵A ɩ na a nyɩmɩ na tɛrɛ a ƴɔ̃w-nyãa, a Naaŋmɩn kpɛ̃w na mɩ gure, nɔɔ pɔwrɔ a faafʋ ʋlɔ ʋ na gbɛɛrɩ̃ bin na nyɩrɛ a baarfʋ daar.

⁶A ala ɩnɛ nyɩ cɩlɛ, a ala saarɩ̃ ɩ a sɛw na a nyɩ na be a won bʋrɔ bʋrɔ pʋɔ, sɔbɔ nɩ a nii-sɔw a daar ŋmãa na pʋɔ.

⁷A maalʼã a lɛ a na miile a nyɩ ƴɔ̃w-nyãa ɩ na yel-mɩ̃ɛ. A sɛlmɛ tɛrɛ na baarfʋ, ɩ̃-cɛ ba ma dʋʋlɩ̃ ʋ na a vũu pʋɔ na ba ir a saba bar. A nyɩ ƴɔ̃w-nyãa ba na bɩɩrɛ gãw na a sɛlmɛ, a-na-ɩ a na lɩɛbʼã ɩ a pɛwfʋ, a yo-yifʋ, nɩ a ju-kpɛ̃ɛ a nyɩ jie a lɛdaar a Jeeju-Kirisi na wa nyɩrɛ.

⁸A mɩnɛ nyɩ na ma saarɩ̃ nyɛ ʋ wa, ɩ̃-cɛ nyɩ nʋnɔ ʋ na. A mɩnɛ nyɩ na ma saarɩ̃ nyɛ ʋ a ƴɛ̃ƴɛrɩ̃ wa, ɩ̃ nyɩ ƴɔ̃w ʋ na a nyãa, mɩ tɛrɛ nɩ a nʋ̃ɔ ʋlɔ na ƴala nyɩ, a nɩrɛ na ma tʋɔrɔ mana wa,

⁹a mɩnɛ nyɩ na pɔwrɔ a nyɩ ƴɔ̃w-nyãa bom, na ɩ a nyɩ faafʋ.

¹⁰A Naaŋmɩn ƴɛr-hierbe bala na dãa de nĩe hier a ʋna faafʋ ƴɛrɩ̃ nɔɔ tara nyɩ, ba mɩ dãa na ꞌwuoro cɛ̃pɛnɛ, bʋɔrɔ nɩ ba bɔ̃w a ʋna faafʋ naa par.

¹¹A mɩnɛ a *Kirisi Sɩɛ na dãa be a ba pʋ̃ɔ, na dãa de nĩe man ba a Kirisi won, nɩ a na-yele nɔɔ tuure, ba lã na bʋɔrɔ ba bɔ̃w a dabor a ana yele ʋ na miil ba na tara, nɩ a mɩnɛ a na ɩrɛ ɩ̃ tara.

¹²A Naaŋmɩn miilʼã a ƴɛr-hierbe bala áa tʋn ala ba na tʋnɔ ma ɩ a ba ben wa, ɩ̃-cɛ a nyɩmɩ sɔ. A Naaŋmɩn Sɩɛ na yi a saa juu be nɩ na a ƴɛr-son-ƴɛrbɛ a ba hiere a ʋna ƴɛrɩ̃ naa kʋrɔ nyɩ a ƴɛ̃ƴɛrɩ̃, ɩ̃ a Naaŋmɩn sɩ-tʋnɩsɩ mɩ bʋɔrɔ ba mɩ muul wõ a ana ƴɛrɩ̃sɩ naa.

¹³Ala-ɩ̃-sɔ, nyɩ́ gbɛɛrɩ̃ a nyɩ mɩ̃ɛ a tʋmɔ ɩnɛ, bɔ̃w jʋʋrɔ nɩ. Nyɩ́ de a nyɩ tɩɛrɩ̃sɩ a jaa dɔɔl a ʋna faafʋ juu a *Jeeju-Kirisi na tɛrɛ kʋrɔ nyɩ a ʋ nyɩrfʋ daar.

¹⁴Nyɩ́ wono a Naaŋmɩn toor, ɩ̃ nyɩ taa cãa maala a korĩ-cɛ maal-bie ala nyɩ na dãa maala tuure nɩ a nyɩ ɩ̃gan buur yele bɔfʋ, a mɩnɛ nyɩ na ma dãa bɔ̃w a Naaŋmɩn sɛr wa.

¹⁵Ɩ̃-cɛ nyɩ́ mɩ ɩ cɛcɛ a nyɩ maalfʋ pʋɔ a jaa, wɔ̃ taa nɩ a ʋlɔ na bʋɔl nyɩ na ɩ a cɛcɛ,

¹⁶a mɩnɛ a Naaŋmɩn Sɛbɛ na yel: “Nyɩ́ ɩ cɛcɛ, a-na-ɩ ɩ̃ ɩ na cɛcɛ.”

¹⁷A ala ɩ a nyɩ sʋɔrfʋ pʋɔ nyɩ ma bʋɔlɔ na a Naaŋmɩn a Sãa, a ʋlɔ na ma ꞌwuoro a nɩbɛ kpee kpee wa, ɩ̃ ma guoro a ba ƴɛrɩ̃sɩ tuure nɩ a ba maalfʋ, nyɩ́ bɔ̃w jɔrɔ ʋ a lɛ nyɩ na cãa ɩ a saanba a ka a tẽw pʋɔ.

¹⁸A-na-ɩ nyɩ bɔ̃w na bɔ̃w ka aa ɩ a yel-saansɩ wɔ̃ taa nɩ a libi-kur, mɩɩ a sɛlmɛ ba da nɩ nyɩ, faa nyɩ a sɔr kpana ʋlɔ a nyɩ saanba na dãa tu ɩ̃ cɛ kʋ nyɩ wa.

¹⁹Ɩ̃-cɛ ba da nyɩ na nɩ a *Kirisi jɩ̃-son, a mɩnɛ ʋ na lɩɛb wɔ̃ a baar-lo-pele kaarɩ̃, ma tɛrɛ sãwfʋ jie nɩ cɛfʋ jie wa.

²⁰A Naaŋmɩn dãa na vɛl ʋ ir a ala ɩnɛ, ɩ̃-cɛ a tẽw wa bɩɛr maal, ɩ̃ lɛ ir ʋ bar a cãa pʋɔ a nyɩ ɩnɛ a daarʼãa pʋɔ na ɩ a baarfʋ daar.

²¹A ʋlɔ ɩnɛ nyɩ sɔw de a Naaŋmɩn na maal ʋ ʋ ir a kũu pʋɔ, kʋ nɩ ʋ a ju-kpɛ̃ɛ. A nɔhɔ̃ a nyɩ ƴɔ̃w-nyãa nɩ a nyɩ tɩɛrʋ̃ son be na a Naaŋmɩn jie.

²²Nyɩ lɩɛbʼã ɩ a cɛcɛ a mɩnɛ nyɩ na jɔrɔ a yel-mɩ̃ɛ, a nyɩ na tʋɔ bɔ̃w nʋnɔ taa. Ala-ɩ̃-sɔ nyɩ́ lana nʋnɔ taa bõ-ƴene-ƴene nɩ a nyɩ suur ʋ jaa.

²³A-na-ɩ a nyɩ Sãa Naaŋmɩn na dɔw nyɩ a dɔw-paalaa ma ɩ nɩ-kpiiraa wa, ɩ̃-cɛ ʋ be na be a daar a jaa. A ʋ ƴɛrɩ̃ ʋlɔ na tɩɩrɛ a baafʋ, na ma mɩ tɛrɛ a bɛwfʋ daar wa, ʋlɔ ʋ dɔw nɩ nyɩ.

²⁴A mɩnɛ a Naaŋmɩn Sɛbɛ na yel: “A nɩbɛ ba jaa wɔ̃ na taa nɩ a mʋ̃ɔ, ɩ̃ a ba na-yele a jaa mɩ wɔ̃ taa nɩ a mɔɔpʋɔ tɩ-pube. A mʋ̃ɔ ma jʋɔlɩ̃ na, a pube so lo,

²⁵ɩ̃-cɛ a Nɩ-kpɛ̃ɛ ƴɛrɩ̃ be na be a daar a jaa.” A ƴɛrɩ̃ ʋlɔ ɩ na a ƴɛr-son ʋlɔ sɩ na ƴɛr kʋ nyɩ.