Read Birifor, Malba 1 Pɩɛr Sɛbɛ 3 Bible Online

1 Pɩɛr Sɛbɛ 3 - Birifor, Malba bible

1 Pɩɛr Sɛbɛ 3

¹A nyɩmɩ pɔɔbɔ mɩ, nyɩ́ wur a nyɩ mɩ̃ɛ a nyɩ sɩrbɛ jie, a mɩnɛ a ŋmɛɛ wa wõw a Naaŋmɩn ƴɛrɩ̃ a toor, ba na nyɛ na a nyɩ maal-bie ɩ̃ lɩɛb puoro ʋ a ala ɩnɛ. Nyɩ kɔ̃ bʋɔrɔ nyɩ haa nʋɔr ƴɛrʼɩ̃ ba a ala wa,

²a-na-ɩ ba na nyɛ na a mɩnɛ a nyɩ maalfʋ na ɩ a cɛcɛ, nɩ a mɩnɛ nyɩ na cʋ ba.

³Nyɩ taa ɩ a nyɩ vɩlaafʋ ʋ yi a yene yele pʋɔ wa, wɔ̃ taa nɩ a juu wobfʋ, a sɛlmɛ yele ƴɔ̃wfʋ, nɩ a cẽcẽ-vɛlɛ sufʋ.

⁴Ɩ̃-cɛ a nyɩ vɩlaafʋ ʋ̃ ɩ a ala na ma tɛrɛ a sãwfʋ wa, a yele ala na yi a nyɩ pʋ̃ɔ, a suur na ɩ a hɛlɛlɛ nɩ a jom… A ala ɩ̃ ɩ a kpɛ̃ɛ a Naaŋmɩn nii-sɔw.

⁵A nɔhɔ̃, a ma-ma pɔɔ-popuorbo bala na dãa tɩɛrɛ a Naaŋmɩn na dãa gbɛɛrɛ a ba mɩ̃ɛ, mɩ cʋrɔ nɩ a ba sɩrbɛ.

⁶A lɛ a Sara mɩ dãa wɔ̃. Ʋ dãa na wono a Abʋraham a toor, bʋɔlɔ nɩ ʋ a ʋ nɩ-kpɛ̃ɛ. Nyɩ ɩ na a ʋ bi-pɔɔbɔ a ƴɛ̃ƴɛrɩ̃ a nyɩ maal-vɩlaa ɩnɛ, ɩ̃ a ala ɩ nyaa jɔrɔ bõ-kãw dãbɩ̃ɛ wa.

⁷A nyɩmɩ sɩrbɛ mɩ, nyɩ́ bɔ̃w jɛ nɩ a nyɩ pɔɔbɔ, bɔ̃w nɩ a mɩnɛ ba na ɩ a pɔɔbɔ, bal gãw nyɩ. Nyɩ́ ƴɔnɔ ba, a mɩnɛ a nyɩ na lãa pɔw a Naaŋmɩn bõ-son ʋlɔ na ɩ a baafʋ. A nɔhɔ̃, bõ-kãw kɔ̃ var a nyɩ Naaŋmɩn sʋɔrfʋ wa.

⁸A ƴɛr-baaraa ɩ̃ na ƴɛrɛ nyɩ ɩ na: a nyɩ jaa fɛw, nyɩ́ tɛrɛ tɩɛrʋ̃ bõ-ƴen, cɛlɛ nɩ taa, mɩ nʋnɔ nɩ taa a mɩnɛ nyɩ na ɩ a yɛɛr. Nyɩ́ tɛrɛ taa a nã-bɔ̃wfʋ, pabʼɩ̃ a nyɩ mɩ̃ɛ a ŋmɛɛ jie.

⁹Nyɩ taa lɩɛb maal a bier ya a bier ba na maal nyɩ wa, mɩɩ de a tʋ-bir tʋ ya a ʋlɔ na tʋ fʋ wa, ɩ̃ nyɩ́ ɛ̃ɛ ƴɛr nason ƴɔ̃w a sʋbɔ, a-na-ɩ a nason pɔwfʋ ɩnɛ a Naaŋmɩn bʋɔl nyɩ.

¹⁰A mɩnɛ a Naaŋmɩn Sɛbɛ na yel: “A ʋlɔ na bʋɔrɔ ʋ pɔw nʋ̃ɔ a ʋ baafʋ pʋɔ, ɩ̃ mɩ nyɛ a bibi-vɛlɛ, sɛw na ʋ bar a fãa ƴɛrfʋ, ɩ̃ mɩ mɔ̃w a ʋ nʋɔr, kɔ̃ wa ƴɛr ƴɛrɩ̃ bɛlɩ̃ nɩ nɩrɛ wa.

¹¹Ʋ sɛw na ʋ ŋmaa yi a bier maalfʋ pʋɔ, ɩ̃ maala a vɩlaa, mɩ bʋɔrɔ nɩ a pɩɛnfʋ tuure nɩ ʋ a daar a jaa.

¹²A-na-ɩ a Nɩ-kpɛ̃ɛ ma ꞌwuoro na a bala na tor, ɩ̃ ma cɛlɛ a ba sʋɔrfʋ a daar a jaa, ɩ̃-cɛ ʋ ma ŋmelĩ na a puo-sɔw cɔw a bala na maala a bier.”

¹³A ala ɩ nyɩ tʋlɔ na a son maalfʋ ɩnɛ, ala be be na maal nyɩ a bier?

¹⁴Ɩ̃-cɛ a ala saarɩ̃ ɩ nyɩ pɔw na a won a nyɩ torfʋ ɩnɛ, nʋ̃ɔ na be na a nyɩ jie. Nyɩ taa jɔrɔ nɩrɛ dãbɩ̃ɛ wa. Nyɩ taa mɩ ɩ a ba maalfʋ dama nyɩ wa.

¹⁵Nyɩ́ ƴɔnɔ a *Kirisi a nyɩ suur pʋɔ ʋ ɩ a nyɩ Nɩ-kpɛ̃ɛ. A daar a jaa a ala ɩ a nɩrɛ wa soor nyɩ na a nyɩ tɩɛrʋ̃ son ʋlɔ nyɩ na tɛrɛ a nyɩ suur pʋɔ ɩnɛ, nyɩ́ sɔw man ʋ a par,

¹⁶ɩ̃-cɛ nyɩ́ maalʼɩ̃ su-ɓaar nɩ ƴɔ̃wfʋ. Nyɩ́ ɩ a nyɩ mɩ̃ɛ bɔ̃wfʋ ʋ ɩ cɛcɛ, a mɩnɛ a bala na ma kpɛrɛ nyɩ, wa bʋɔrɔ ba ƴɔnɔ nyɩ ƴɛrɩ̃, ɩ̃-cɛ a ba na nyɛ nyɩ a nyɩ ɩ a Kirisi nɩbɛ a nyɩ maal-bi-vɛlɛ pʋɔ, a vĩ kpɛ ba.

¹⁷A ala wa ɩ a Naaŋmɩn pʋ-tɩɛrʋ̃ ʋ a fʋ na nyɛrɛ a won a maal-vɩlaa ɩnɛ, a sa na gãw a won fʋ na nyɛrɛ a bier maalfʋ ɩnɛ.

¹⁸A-na-ɩ a Kirisi mɩ̃ɛ kpi na gbɛ-daa a nyɩ maal-fãa ɩnɛ. A ʋlɔ na dãa tor kpi na a bala na ma tor wa ɩnɛ, a mɩnɛ ʋ na tʋɔ wa nɩ nyɩ a Naaŋmɩn sɛ̃. Ba kú ʋ na a ɩ̃gan buur pʋɔ, ɩ̃-cɛ a Naaŋmɩn Sɩɛ lɛ maal ʋ ʋ ir a kũu pʋɔ.

¹⁹A ʋna Sɩɛ ʋ mɩ dãa cenʼɩ̃ na hier a ʋ ƴɛrɩ̃ kʋ a sɩɩr bala na be a kasu pʋɔ,

²⁰na dãa wõw a Naaŋmɩn ƴɛrɩ̃ a toor a lɛdaar ʋ na dãa nyɔw a suur cɛlɛ nɩ, ɩ̃ a Nowe mɩ dãa kpal a gbor. A ʋna gbor pʋɔ, nɩ-fɩ̃ɩ tɛw, a lɛ yelʼã nɩbɛ anuu-nʼata ɩ̃ pɔw a faafʋ a kʋ̃ɔ kpɛ̃ɛ ɩnɛ.

²¹A kʋ̃ɔ kpɛ̃ɛ ʋlɔ miile na a kʋ̃ɔ mʋrfʋ na faara nyɩ a ƴɛ̃ƴɛrɩ̃ na. A ʋna kʋ̃ɔ mʋrfʋ ma pɛwrɛ a nɩrɛ ɩ̃gan buur deer wa, ɩ̃-cɛ ʋ ɩ na a pʋlɩ̃fʋ a nɩrɛ na pʋlɩ̃ nɩ a Naaŋmɩn, na yi a ʋ mɩ̃ɛ bɔ̃wfʋ cɛcɛ pʋɔ. A kʋ̃ɔ mʋrfʋ ʋlɔ faara nyɩ na a ƴɛ̃ƴɛrɩ̃ a *Jeeju-Kirisi kũu-pʋɔ-irfʋ ɩnɛ,

²²a ʋlɔ na do a saa juu jɛ a Naaŋmɩn dʋrɩ̃ lõboorɩ̃, a sɩ-tʋnɩsɩ nɩ a saꞌlon fãgãsɩ nɩ a kpɛn a jaa na be a ʋ pulẽe.