Read Birifor, Malba 1 Pɩɛr Sɛbɛ 5 Bible Online

1 Pɩɛr Sɛbɛ 5 - Birifor, Malba bible

1 Pɩɛr Sɛbɛ 5

¹A ƴɛ̃ƴɛrɩ̃ na, a bala na ɩ a ni-dierbe a nyɩ sɔ̃w ɩ̃ bʋɔrɔ ɩ̃ ƴɛrʼɩ̃, a maa na mɩ ɩ a ni-diere a ba kaarɩ̃, na mɩ nyɛ a *Kirisi hʋʋr ʋ na dãa nyɛ, ɩ̃ mɔɔ beree a cãa kpɛ̃ɛ ʋlɔ pʋɔ nɔɔ nyɩrɛ.

²Ɩ̃ kpãkpana nyɩ na a nyɩ na bɔ̃w cɩɩnɛ a Naaŋmɩn dʋn ʋ na kʋ nyɩ, a na nʋmɔ nyɩ a mɩnɛ a Naaŋmɩn na bʋɔrɔ, ɩ̃ a kɔ̃ ɩ ba fɛr nyɩ na wa. Nyɩ taa tʋnɔ a nyɩ tʋmɔ a libie pɔwfʋ ɩnɛ wa, ɩ̃-cɛ a na yi a nyɩ su-tɩɛrɩ̃sɩ pʋɔ a jaa.

³Nyɩ taa bʋɔrɔ nyɩ fule a bala ba na kʋ nyɩ a nyɩ ꞌwuoro wa, ɩ̃-cɛ Nyɩ́ ɩ nɩ-tɔɔnsɩ a Naaŋmɩn dʋn bala jie,

⁴ɩ̃ a lɛdaar a Dɔ-cɩ̃ɩ-Nɩ-kpɛ̃ɛ nɔɔ waara a sɩ nyɛrɛ ʋ, ʋ na kʋ nyɩ na a yo-yifʋ sapi ʋlɔ na ma kpooro wa.

⁵A nyɩmɩ pɔlɔ mɩ, Nyɩ́ pab a nyɩ mɩ̃ɛ a nɩ-bɛrɛ jie. Ɩ̃ a nyɩ jaa fɛw, Nyɩ́ wur a nyɩ mɩ̃ɛ tʋnɔ nɩ a tʋmɔ kʋrɔ taa, a-na-ɩ a yelʼã a Naaŋmɩn Sɛbɛ pʋɔ, áa Naaŋmɩn ma jɛbɛ nɩ na a yo-bʋɔrbɔ, ɩ̃ ma sũono a bala na wur a ba mɩ̃ɛ.

⁶Ala-ɩ̃-sɔ, Nyɩ́ wur a nyɩ mɩ̃ɛ a Naaŋmɩn ʋlɔ na tɛrɛ a kpɛ̃w nuumɩ, a mɩnɛ ʋ na tʋɔ jɛw nyɩ a daar ʋlɔ pʋɔ ʋ na ƴɔ̃w.

⁷Nyɩ́ tow a nyɩ dɛn a jaa dɔɔl ʋ, a-na-ɩ ʋ ma tɩɛrɛ nɩ nyɩ na.

⁸Nyɩ́ bɔ̃w tɛrɛ a nyɩ mɩ̃ɛ jʋʋrɔ nɩ, a-na-ɩ a nyɩ san-sʋbɔ, Satã, kono na yʋɔrɔ nɩ gbeen kaarɩ̃, bʋɔrɔ a nɩrɛ ʋlɔ ʋ na pɔwrɔ ɓomo.

⁹Nyɩ́ ɩraa cĩcĩ a nyɩ ƴɔ̃w-nyãa pʋɔ jɛbɛ nɩ ʋ, bɔ̃w nɩ ka a bala na ɩ a nyɩ yɛɛr na be a ka a tẽw pʋɔ mɩ pɔwrɔ na a ʋna nãw.

¹⁰Ɩ̃-cɛ, a lɛdaar nyɩ na nyɛrɛ a nãw a daar fɩ̃ɩ pʋɔ baara, a Naaŋmɩn ʋlɔ jie a sũofʋ a jaa na yire, na mɩ dãa bʋɔl nyɩ a nyɩ na be a Kirisi pʋɔ lãa pɔw nɩ ʋ a yo-yifʋ ʋlɔ na ma baara wa, a ʋlɔ mɩ̃ɛ na cɔɔrɩ̃ nyɩ na, kʋ nɩ nyɩ a kpɛ̃w, a nyɩ na ɩraa cĩcĩ kɔ̃ tɛrɛ damfʋ jie wa.

¹¹A ʋlɔ ɩ̃ sɔ a tʋɔfʋ a daar a jaa! *Amɛn.

¹²A Sɩlasɩ na ɩ ma a yɛb-dẽdẽ ɩ̃ sũo ma ɩ̃ sɛb nyɩ a sɛb-ŋmãa na kpãkpana nɩ nyɩ, miile nɩ nyɩ áa lɛ a Naaŋmɩn wɩɛfʋ sɩrɩ̃ be. Nyɩ́ bɔ̃w ɩraa a be cĩcĩ.

¹³A *duo-puorbo bala na be a *Babɩlɔ̃-tẽw a Naaŋmɩn na vɛl ir a nyɩ kaarɩ̃, nɩ a ɩ̃ bi-daba Markɩ, puoro nyɩ na.

¹⁴Nyɩ́ puoro taa, woro nɩ taa nɩ a Nɩ-kpɛ̃ɛ yuor. A pɩɛnfʋ ú be a nyɩmɩ nyɩ jaa na be a *Kirisi pʋɔ jie.