Read Birifor, Malba 2 Pɩɛr Sɛbɛ 3 Bible Online

2 Pɩɛr Sɛbɛ 3 - Birifor, Malba bible

2 Pɩɛr Sɛbɛ 3

¹Ɩ̃ badɛɛ, nyɩ́ nyɛ a ƴɛ̃ƴɛrɩ̃ a gbɛɛ ayi sɛbɛ ɩ̃ na sɛb nyɩ. A jaa ayi pʋɔ ɩ̃ bʋɔrɔ na ɩ̃ jaw nyɩ a nyɩ cãa bɔ̃w tɛrɛ a tɩɛrʋ̃ ʋlɔ na tor,

²ɩ̃ mɩ cãa bɔ̃wnaa a ana ƴɛrɩ̃sɩ a ƴɛr-hier-sono na dãa ƴɛrɛ a korĩ-cɛ, nɩ a ƴɛr-manɩsɩ ala na yi a Nɩ-kpɛ̃ɛ nɩ a Fafaara jie, a nyɩ *nɩ-tʋnɩsɩ na dãa man nyɩ.

³Nyɩ́ bɔ̃wnaa sɛr, áa baarfʋ daar a bala na tuure a ba ɩ̃gan buur bɔb na wa na laara nyɩ,

⁴yele nɩ: “ꞌWaa pʋlɩ̃ nɩ nyɩ á ʋ na wa na wa…? Ɩ̃ nyɩnɛ ʋ lɛ be? A sɩ saanba gɔrʼã kpi, ɩ̃-cɛ a yele a jaa cãa a lɛ a mɩnɛ a na dãa be a nyɔwfʋ daar.”

⁵Ba ma bɛlɩ̃ na maal wɔ̃ taa nɩ ba hiinʼã a mɩnɛ a Naaŋmɩn na ƴɛr a ƴɛrɩ̃ a korĩ-cɛ jaa maalʼɩ̃ a saꞌlon nɩ a tene. A tene yi na a kʋ̃ɔ pʋɔ, ɩ̃ a kʋ̃ɔ ba mɩ de maalʼɩ̃ a tene.

⁶A tẽkorĩ, a kʋ̃ɔ ɩ̃ mɩ dãa wa pɔw a tẽw wɛl a yele a jaa bar.

⁷Ɩ̃-cɛ a ƴɛ̃ƴɛrɩ̃ saꞌlon nɩ a ƴɛ̃ƴɛrɩ̃ tẽw, a Naaŋmɩn de na a ʋ ƴɛrɩ̃ biinʼɩ̃ ba a vũu dɩfʋ ɩnɛ, cɛlɛ nɩ a ƴɛrɩ̃ guorfʋ bibir a lɛdaar ba na wɛlɛ a nɩ-kpansɩ bara.

⁸Ɩ̃ badɛɛ, bom kãw be na be nyɩ na ma sɛw nyɩ baala wa. A-na-ɩ a Nɩ-kpɛ̃ɛ jie, a bibir bõ-ƴen wɔ̃ na taa nɩ yomo tur, ɩ̃-cɛ a yomo tur mɩ wɔ̃ taa nɩ bibir bõ-ƴen.

⁹A Nɩ-kpɛ̃ɛ ma gɔwrɔ a ʋ pʋlɩ̃fʋ maalfʋ wa, a mɩnɛ a nɩŋmɛɛ na tɩɛrɛ, ɩ̃-cɛ su-nyɔwraa ʋ tɛrɛ nɩ nyɩ, a-na-ɩ ꞌwaa bʋɔrɔ nɩrɛ lɛ ʋ wɛ wa, ɩ̃ ʋ ɛ̃ɛ na bʋɔrɔ a nɩbɛ ba jaa ba lɩɛb a ba yɛ̃.

¹⁰Ɩ̃-cɛ a Nɩ-kpɛ̃ɛ lɛwaa bibir na ta na nyanyuur waa kaarɩ̃. A ʋna bibir, a saꞌlon na tɔlʼã nɩ damfʋ na kʋrɔ dãbɩ̃ɛ, a saꞌlon yele na nyɩlʼã a tʋlɩ̃ pʋɔ, ɩ̃ a tene nɩ a yele ala a jaa na be ka a tẽw pʋɔ na dɩ na.

¹¹A ala ɩ a yele a jaa na dɩ na a nɔhɔ̃, nɩ-wɔ̃-mɩnɛ nyɩ sɛw nyɩ ɩ? A sɛw na a nyɩ maalfʋ a ɩ cɛcɛ, a nyɩ ƴɔnɔ nɩ a Naaŋmɩn,

¹²a mɩnɛ nyɩ na cãa cɛlɛ a ʋ bibir tafʋ, ɓĩɓine nɩ. A ʋna bibir, a saꞌlon na dɩ na, ɩ̃ a saꞌlon yele na mɩ nyɩlʼã a vũu tʋlɩ̃ pʋɔ.

¹³Ɩ̃-cɛ a Naaŋmɩn pʋlɩ̃ nɩ sɩ na a saꞌlon paalaa nɩ a tẽ-paalaa, a jie a torfʋ nɔɔ beree. A ala sɩ cɛlɛ.

¹⁴Ala-ɩ̃-sɔ ɩ̃ badɛɛ, a mɩnɛ nyɩ na cãa cɛlɛ a ʋna bibir, nyɩ́ ƴɔ̃w fãgã kɔ̃ tɛrɛ cɛfʋ jie nɩ mabfʋ jie a Naaŋmɩn nii-sɔw wa, a mɩnɛ ʋ na wa pɔw nyɩ a pɩɛnfʋ pʋɔ.

¹⁵Nyɩ́ de a Nɩ-kpɛ̃ɛ su-nyɔwraa ʋlɔ ʋ ɩ nyɩ daar ʋlɔ nyɩ na pɔwrɔ a faafʋ, a mɩnɛ a sɩ yɛb-nʋnaa Pol na mɩ dãa sɛb nyɩ nɩ a kpaarfʋ ʋlɔ a Naaŋmɩn na dãa kʋ ʋ.

¹⁶A lɛ ʋ ma dãa sɛb man nyɩ a ʋ sɛbsɩ a jaa pʋʋr, a lɛdaar ʋ na ƴɛrɛ nyɩ a ƴɛrɩ̃sɩ ala. A ʋ sɛbsɩ pʋʋr, jiir ŋmɛɛ be na be na kpɛmɛ a par bɔ̃wfʋ, ɩ̃ a nɩbɛ bala na ma bɔ̃w bom wa, ɩ̃ ma mɩ bɔ̃w ɩraa a cĩcĩ wa, ma lɩɛbɛ a par, wɔ̃ taa nɩ a mɩnɛ ba na ma mɩ lɩɛbɛ a Naaŋmɩn Sɛbɛ ƴɛr-bie ŋmɛɛ. A ba mɩ̃ɛ wɛfʋ ba maala biine a lɛ.

¹⁷Ala-ɩ̃-sɔ ɩ̃ badɛɛ, a mɩnɛ nyɩ na gɔr bɔ̃w a ala nɔɔ tara, nyɩ́ tɛrɛ nyɩ mɩ̃ɛ, kɔ̃ bar a nɩ-kpansɩ wa bɛlɛ nyɩ a nyɩ faa lo ɩ̃ cɛ a nyɩ iraafʋ jie bar wa.

¹⁸Ɩ̃-cɛ nyɩ́ cãa kara dɔɔlɔ a Naaŋmɩn maal-vɩlaa pʋɔ, nɩ a *Jeeju-Kirisi na ɩ a sɩ Nɩ-kpɛ̃ɛ nɩ a sɩ Fafaara bɔ̃wfʋ pʋɔ. ṹ tɛrɛ a yo-yifʋ a ƴɛ̃ƴɛrɩ̃ na, nɩ a daar a jaa. *Amɛn.