Read Birifor, Malba 1 Jã Sɛbɛ 2 Bible Online

1 Jã Sɛbɛ 2 - Birifor, Malba bible

1 Jã Sɛbɛ 2

¹Ɩ̃ bibiir, ɩ̃ sɛbɛ nyɩ na a asɩmɛ a mɩnɛ a nyɩ kɔ̃ maal fãa wa. Ɩ̃-cɛ a nɩrɛ wa maal a fãa, sɩ tɛrɛ na a *lɔlʋɔrɔ a Sãa sɛ̃ na tor, na ɩ a *Jeeju-Kirisi.

²Ʋ ɩ na a ʋlɔ na lɩɛb ɩ a baar-lo-bom na tʋɔ ir a sɩ maal-fãa bar; ɩ̃ aa ɩrɛ a sɩ ben tɛw ʋ wa, ɩ̃-cɛ a nɩbɛ ba jaa maal-fãa ʋ mɩ.

³A sɩmɩ jɔrɔ a *Naaŋmɩn ƴɛr-kpɛn, sɩ na bɔ̃w na ka sɩ bɔ̃w ʋ na.

⁴A ala ɩ a nɩrɛ yelʼã: “Ɩ̃ bɔ̃w ʋ na,” ɩ̃ ma jɔrɔ a ʋ ƴɛr-kpɛn wa, ʋ ɩ na jir-ŋmara; yel-mɩ̃ɛ ma be a ʋ pʋɔ wa.

⁵Ɩ̃-cɛ a ʋlɔ na jɔrɔ a ʋ ƴɛrɩ̃, bom ma sɩrɩ̃ ɓɔr a ʋ Naaŋmɩn nʋfʋ pʋɔ wa. Nyɛ a mɩnɛ sɩ na tʋɔrɔ bɔ̃wnɔ á sɩ ɩ na a Naaŋmɩn ben:

⁶a ʋlɔ na yel á ʋ ɩ na a Naaŋmɩn ben, a ʋ baafʋ sɛw na ʋ wɔ̃ a mɩnɛ a *Kirisi baafʋ na dãa be.

⁷Ɩ̃ badɛɛ, aa ɩ ƴɛr-kpɛ̃w paalaa ɩ̃ sɛbɛ nyɩ wa, ɩ̃-cɛ a ɩ na a bõ-kʋraa ʋlɔ nyɩ na pɔw a korĩ-cɛ jaa. A ƴɛr-kpɛ̃w kʋraa ɩ na a ƴɛrɩ̃ ʋlɔ nyɩ na dãa wõ.

⁸Ɩ̃-cɛ a cãa na ɩ a ƴɛr-kpɛ̃w paalaa ɩ̃ sɛbɛ nyɩ, ɩ̃ a ʋ yel-mɩ̃ɛ miile na a *Kirisi jie, nɩ a nyɩ jie mɩ, a-na-ɩ a libe tɔlɔ na ɩ̃ a yel-mɩ̃ɛ cãa gɔr caara.

⁹A ʋlɔ na yel á ʋ be na a cãa pʋɔ, ɩ̃ cãa ꞌlaar a ʋ yɛbɛ, ʋ cãa na be a libe pʋɔ.

¹⁰Ɩ̃ a ʋlɔ na nʋnɔ a ʋ yɛbɛ be na a cãa pʋɔ, ɩ̃ bom ma be a ʋ jie na maala nɩrɛ ʋ loro wa.

¹¹Ɩ̃-cɛ a ʋlɔ na ꞌlaar a ʋ yɛbɛ be na a libe pʋɔ. Ʋ cere na a libe pʋɔ, ɩ̃ ma mɩ bɔ̃w a jie ʋ na cere wa, a-na-ɩ a libe jɔ̃w ʋ na bar.

¹²Ɩ̃ bibiir, ɩ̃ sɛbɛ nyɩ na a-na-ɩ a Naaŋmɩn de na a nyɩ maal-fãa bar kʋ nyɩ a Kirisi yuor ɩnɛ.

¹³Sãa nʋmɔ, ɩ̃ sɛbɛ nyɩ na a-na-ɩ nyɩ bɔ̃w na a ʋlɔ na be be a korĩ-cɛ jaa. Polbil, ɩ̃ sɛbɛ nyɩ na a-na-ɩ nyɩ tʋɔ na a Fãa Sʋbɔ.

¹⁴Bibiir, ɩ̃ sɛb nyɩ na a-na-ɩ nyɩ bɔ̃w na a Sãa. Sãa nʋmɔ, ɩ̃ sɛb nyɩ na a-na-ɩ nyɩ bɔ̃w na a ʋlɔ na be be a korĩ-cɛ jaa. Polbil, ɩ̃ sɛb nyɩ na a-na-ɩ nyɩ tɛrɛ na kpɛ̃w; a Naaŋmɩn ƴɛrɩ̃ be na a nyɩ pʋɔ, ɩ̃ nyɩ mɩ tʋɔ na a Fãa Sʋbɔ.

¹⁵Nyɩ taa nʋ a tẽw na maal-bie nɩ a ʋ yele wa. A ʋlɔ na nʋnɔ a tẽw na maal-bie ma cãa nʋnɔ a Sãa wa.

¹⁶A-na-ɩ a ala a jaa na be ka a tẽw pʋɔ, wɔ̃ taa nɩ a ɩ̃gan buur yele bɔfʋ, mɩɩ a ala sɩ na ma nyɛ ɩ̃ jɩɛlɛ, mɩɩ a yel-yaw tɛrɛfʋ yo-bɔb, ma yi a Sãa jie wa, ɩ̃-cɛ a tẽw pʋɔ a yi,

¹⁷A tẽw nɩ a ʋ yele a nɩbɛ na ꞌlaar tɔlɔ na, ɩ̃-cɛ a ʋlɔ na maala a Naaŋmɩn pʋ-tɩɛrʋ̃, ʋ na be na be a daar a jaa,

¹⁸Ɩ̃ bibiir, nyɩ́ nyɛ, a tẽw baarfʋ daar tara na. Nyɩ wõ na a ba yel á *Kirisi San-Sʋbɔ waara na. Ɩ̃-cɛ a ƴɛ̃ƴɛrɩ̃, a *Kirisi sama-deme yaw gɔrʼã be ka. Ala ɩ̃ saa a sɩ bɔ̃w ka a tẽw baarfʋ daar tara na.

¹⁹A bana nɩbɛ yi na a sɩ sɔ̃w, ɩ̃ baa dãa ɩ a sɩ nɩbɛ wa. A ala dãa ɩ ba ɩ na a sɩ nɩbɛ, ba naa dãa na cãa be nɩ sɩ. Ba yi na a sɩ sɔ̃w a na miil a bõ-ƴen jaa ma dãa sɩrɩ̃ ɩ a sɩ nɩrɛ wa.

²⁰Ɩ̃-cɛ a nyɩmɩ, nyɩ pɔw na a Sɩɛ ʋlɔ a Kirisi na kʋ nyɩ, ɩ̃ a nyɩ jaa bɔ̃w na a yel-mɩ̃ɛ.

²¹Maa sɛb nyɩ a-na-ɩ nyaa bɔ̃w a yel-mɩ̃ɛ wa, ɩ̃-cɛ a-na-ɩ nyɩ bɔ̃w ʋ na, ɩ̃ mɩ bɔ̃w ka a jiri kãw ma tʋɔrɔ yire a yel-mɩ̃ɛ pʋɔ wa.

²²Ala ʋlɔ ɩ̃ ɩ a jir-ŋmara ɩ̃ ma ɩ a ʋlɔ na cɩɩrɛ áa *Jeeju ma ɩ a Kirisi wa? Ʋ ɩ na a Kirisi San-Sʋbɔ, ɩ̃ ma jaar a Sãa nɩ a Bie jaa bar.

²³A nɩrɛ lɛ na jaar a Bie ma mɩ tɛrɛ a Sãa wa, ɩ̃ a ʋlɔ na sɔw de a Bie mɩ tɛrɛ na a Sãa.

²⁴Ɩ̃ a nyɩmɩ, nyɩ́ bɔ̃w tɛrɛ a nyɩ suur pʋɔ a ala nyɩ na dãa wõ a korĩ-cɛ. A ala ɩ nyɩ bɔ̃w na tɛrɛ a nyɩ suur pʋɔ a ala nyɩ na dãa wõ a korĩ-cɛ, nyɩ na be na a Sãa nɩ a Bie pʋɔ.

²⁵Ɩ̃ a pʋlɩ̃fʋ ʋlɔ a Kirisi na pʋlɩ̃ nɩ sɩ ɩ na a baa-kɔ̃-tɛw.

²⁶Ɩ̃ sɛb nyɩ na a asɩmɛ a bala na bʋɔrɔ ba bɛlɛ nyɩ a nyɩ bɔr ɩnɛ.

²⁷Ɩ̃-cɛ a nyɩmɩ, a Sɩɛ ʋlɔ nyɩ na dãa pɔw a Kirisi sɛ̃ cãa na be a nyɩ pʋ̃ɔ, ɩ̃ nyaa lɛ bʋɔrɔ nɩrɛ ʋ lɛ jaan nyɩ wa. A Sɩɛ ʋlɔ nyɩ na tɛrɛ jaana nyɩ na a yele a jaa, ɩ̃ a ala ʋ na jaana nyɩ ma ɩ jiri wa; yel-mɩ̃ɛ ʋ. Ala-ɩ̃-sɔ, a mɩnɛ ʋ na jaan nyɩ, nyɩ́ bɔ̃w ɩraa a Kirisi pʋɔ.

²⁸Ɩ̃ bibiir, a ƴɛ̃ƴɛrɩ̃ na, nyɩ́ bɔ̃w ɩraa a ʋ pʋɔ a mɩnɛ a ʋlɔ wa nyɩr, a sɩ na tɛrɛ ꞌlafʋ, ɩ̃-cɛ a vĩ kɔ̃ sɛw sɩ a mimie a ʋ waa bibir wa.

²⁹A ala ɩ nyɩ bɔ̃w ka ʋ torʼã, nyɩ mɩ bɔ̃w na áa nɩrɛ ʋlɔ na maala a ala na tor ɩ na a Naaŋmɩn bile.