Read Birifor, Malba Judi Sɛbɛ 1 Bible Online

Judi Sɛbɛ 1 - Birifor, Malba bible

Judi Sɛbɛ 1

¹A maa Judi na ɩ a *Jeeju-Kirisi tʋ̃tʋnɔ, ɩ̃ mɩ ɩ a Jakɩ yɛbɛ ɩ̃ tɩɩrɛ a sɛbɛ na kʋrɔ a bala a Sãa Naaŋmɩn na nʋ, ɩ̃ bʋɔl gu tɛɛlɛ a Jeeju-Kirisi ɩnɛ.

²A nã-bɔ̃wfʋ, a pɩɛnfʋ nɩ a nʋfʋ á lɛ dɔɔl a nyɩ jie.

³Ɩ̃ badɛɛ, ɩ̃ dãa na tɩɩ bʋɔrɔ ɩ̃ sɛb nyɩ a ala na ɩ a faafʋ ʋlɔ a sɩ jaa na pɔw, ɩ̃ a ƴɛ̃ƴɛrɩ̃, a sɛw na ɩ̃ na sɛb nyɩ a sɛbɛ na, kʋ nyɩ a ꞌlafʋ a nyɩ jɛbɛ a jaanfʋ ʋlɔ ɩnɛ a Naaŋmɩn na tɩɩr kʋ a ʋ nɩbɛ a gbɛ-daa a daar a jaa ɩnɛ.

⁴A-na-ɩ nɩ-kpansɩ ŋmɛɛ sɔɔlɩ̃ na fʋr kpɛ a nyɩ sɔ̃w. Ba ma nyɔw na a Naaŋmɩn wɩɛfʋ ƴɛrɩ̃ par lɩɛb mana nɩ a ba burbur maalfʋ, ɩ̃ jaara a *Jeeju-Kirisi na ɩ a sɩ Nɩ-kpɛ̃ɛ bõ-ƴen tẽtẽ na sɔ sɩ. Ɩ̃ a korĩ-cɛ jaa a Naaŋmɩn gɔrʼã sɛb a ƴɛrɩ̃ ʋlɔ nɔɔ nyɔwrɔ ba.

⁵A mɩnɛ nyɩ na saarɩ̃ bɔ̃w a asɩmɛ a jaa, ɩ̃-cɛ ɩ̃ cãa na bʋɔrɔ ɩ̃ jaw nyɩ a mɩnɛ a Nɩ-kpɛ̃ɛ na faa a *Ɩsɩrayɛl nɩbɛ a Ejibti-tẽw pʋɔ, ɩ̃ pãa bũburĩ a to-wõwbo bar.

⁶A sɩ-tʋnɩsɩ mɩ, na ma dãa sɔw ɩraa a fãgã ʋlɔ pʋɔ a Naaŋmɩn na dãa kʋ ba wa, ɩ̃ bar a ba jie, a Naaŋmɩn lũ ba na nɩ a bɔ̃jɔrɩ̃-kpɛ̃w bin a libe pʋɔ, cɛlɛ nɩ a ƴɛrɩ̃ guorfʋ bibir kpɛ̃ɛ.

⁷Nyɩ mɩ cãa bɔ̃w nɩ a *Sɔdɔm nɩ a *Gɔmɔɔr ten, nɩ a ana ten na dãa cɛɛl kolĩ ba. A bana ten nɩbɛ mɩ dãa na maal a sɩ-tʋnɩsɩ bala kaarɩ̃. A gã-ta-burbur dãa na be a ba sɔ̃w na ma mɩ ɩ bõ-maalaa wa, ɩ̃-cɛ a vũu na ma tɛrɛ kpiinfʋ wa dɩ ba na bũburĩ bar, ɩ bõ-miilaa a nɩbɛ ba jaa jie.

⁸A lɛ a mɩ wɔ̃ nɩ a bana jir-ŋma-jaanba naa. A ba tɩɛrɩ̃sɩ ma taw ba na bɔrʼɩ̃, a ba maala a fãa sãwna nɩ a ba ɩ̃gana. Ba ma jaarʼã a Nɩ-kpɛ̃ɛ ƴɛrɩ̃ bar, ɩ̃ ma mɩ kpɛrɛ a bala na nyɩlɛ a saa juu.

⁹A Mɩsɛl[1] na ɩ a Naaŋmɩn sɩ-tʋ̃-nɩ-kpɛ̃ɛ ma ꞌla tʋɔ maal a lɛ wa. A mɩnɛ a ʋlɔ nɩ a Satã na cɩɩrɛ taa, á ala na de a Mowisi a lɛ ʋ na kpi, ꞌwaa ꞌla tʋ ʋ wa, ɩ̃-cɛ ʋ yelʼã tɛw: “A Nɩ-kpɛ̃ɛ, ú kpãa fʋ.”

¹⁰A nɩbɛ bala ma kpɛrɛ na a ala ba na ma bɔ̃w a par wa. Ɩ̃ a ala a ba mɩ̃ɛ na bɔ̃w a wɛ-yele kaarɩ̃, a ala ɩ̃ na saa a ba wɛ.

¹¹Nabier na nyɔw ba na, a-na-ɩ ba de na sɔr bõ-ƴen nɩ a Kayɩ̃, ɩ̃ mɩ de a ba mɩ̃ɛ ƴɔ̃w a Balam burbur pʋɔ a libie ɩnɛ. Ba wɛ na, a-na-ɩ ba maalʼã a Koore kaarɩ̃ na dãa jaar a Mowisi nʋɔr.

¹²Bala waara nɩ a sãwfʋ a nyɩ lãa-taa-dɩb dɩfʋ daar. Ba ma dɩrɛ na, maa mɩ bɛr nɩrɛ wa. Ba wɔ̃ na taa nɩ dɔ̃dɔrɩ̃sɩ a sɛsɛb na de ɩ̃ ma ɩ saa wa, ɩ̃ lɛ wɔ̃ taa nɩ tɩɩr na ta a wɔ̃fʋ ɩ̃ ma lɛ wɔ̃ wa, ɩ̃ kpi daadaa a ba vɔ̃ ba bar.

¹³A ba vĩ maalfʋ wɔ̃ na taa nɩ a man kʋ̃ɔ a sɛsɛb kpɛ̃ɛ na ŋmeere ʋ fure a fube. Ba mɩ wɔ̃ na taa nɩ ŋmarbie na bɔrɔ yʋɔrɔ, a Naaŋmɩn na gbɛɛrɩ̃ a ji-liwraa na nyɩrɩ̃ liw gbɛb, a ba na be a be a daar a jaa.

¹⁴Nyɛ a mɩnɛ a ɛnɔkɩ, na ɩ a *Adã yãw par anuu-nʼayi na dãa hier yel a nɩbɛ bala ɩnɛ: “Nyɩ́ nyɛ! A Nɩ-kpɛ̃ɛ na tɛrɛ na a ʋ sɩ-tʋnɩsɩ ture ture na ʋ wa nɩ a nɩbɛ ba jaa ƴɛrɩ̃ guorfʋ ɩnɛ, ƴɔ̃w nɩ a nɩ-kpansɩ ba jaa a ƴɛrɩ̃ a ba maal-kpansɩ ɩnɛ a jaa ba na maal jaarʼĩ a Naaŋmɩn bar, nɩ a ba ƴɛr-bebe ɩnɛ a bana nɩ-faar nɩ a bana nɩ-kpansɩ na ƴɔ̃w a Naaŋmɩn.”

¹⁶A nɩbɛ bala ma hũhune na, waala nɩ a daar a jaa. A ba ɩ̃gan buur bɔb tɛw ɩnɛ ba be ka a tẽw pʋɔ. A yo-bɔb ƴɛrɩ̃sɩ ba ma ƴɛrɛ dɔrɔ nɩ a nɩbɛ a ba yele ɩnɛ.

¹⁷Ɩ̃-cɛ ɩ̃ badɛɛ, nyɩ́ cãa bɔ̃w nɩ a ala a sɩ Nɩ-kpɛ̃ɛ *Jeeju-Kirisi *nɩ-tʋnɩsɩ na dãa yel a korĩ-cɛ.

¹⁸A-na-ɩ ba dãa na yel nyɩ, áa baarfʋ daar, á nɩbɛ bala na tuure a ba ɩ̃gan buur bɔb kpansɩ na wa na laara nyɩ.

¹⁹Bala mɩ waara nɩ a kpee kpee ŋmafʋ. Baa tɛrɛ Naaŋmɩn Sɩɛ wa; a tẽw pʋɔ tɩɛrɩ̃sɩ ba tɛrɛ.

²⁰Ɩ̃-cɛ ɩ̃ badɛɛ, nyɩ́ ɩraa cĩcĩ a Naaŋmɩn ƴɛr-cɛcɛ ba na jaan nyɩ pʋɔ, karɛɛ nɩ dɔɔlɔ. Nyɩ́ sʋɔrɔ a Naaŋmɩn nɩ a ʋ Sɩɛ kpɛ̃w,

²¹bɔ̃w jɩnaa nɩ a ʋ nʋfʋ pʋɔ, cɛlɛ nɩ a Nɩ-kpɛ̃ɛ Jeeju-Kirisi ʋ wa kʋ nyɩ a baa-kɔ̃-tɛw a ʋ nã-bɔ̃wfʋ ɩnɛ.

²²Nyɩ́ tɛrɛ nã-bɔ̃wfʋ a bala na baala jie,

²³ɩ̃ faa a ŋmɛɛ yi nɩ a Naaŋmɩn su-tuo pʋɔ. A nɩŋmɛɛ jie go, nyɩ́ tɛrɛ nɩ ba nã-bɔ̃wfʋ, cãa jɔrɔ nɩ a Naaŋmɩn, ꞌlaarʼɩ̃ a ba burbur wa kpɛ nɩ a ba cẽcene sɩɩrfʋ pʋɔ, na mɩ sãw a ba burbur ɩnɛ.

²⁴Naaŋmɩn sɔ pɛwfʋ, a ʋlɔ na tʋɔrɔ gure nyɩ a lofʋ pʋɔ a jiir a jaa, ɩ̃ mɩ maala nyɩ a nyɩ ɩrɛɛ a ʋ yo-yifʋ nii-sɔw nɩ nʋ̃ɔ kpɛ̃ɛ, kɔ̃ tɛrɛ cɛfʋ jie wa.

²⁵A ʋna Naaŋmɩn bõ-ƴen tɛw na ɩ a sɩ Fafaara a sɩ Nɩ-kpɛ̃ɛ *Jeeju-Kirisi ɩnɛ, ú sɔ a yo-yifʋ, a kpɛ̃w, a tʋɔfʋ nɩ a fãw ʋ jaa, a tẽkorĩ, a ƴɛ̃ƴɛrɩ̃, nɩ a daar a jaa. *Amɛn.