Read Birifor, Malba Miilfʋ Sɛbɛ 10 Bible Online

Miilfʋ Sɛbɛ 10 - Birifor, Malba bible

Miilfʋ Sɛbɛ 10

¹Ɩ̃ nyɛ na sɩ-tʋ̃-gãdaa ƴen sʋbɔ go na yi a saꞌlon ɩ̃ suure, ɩ̃ vilĩ a dɔ̃dɔrɩ̃sɩ a cẽcen kaarɩ̃, ɩ̃ mɩ tɛrɛ a sa-sʋɔ a ʋ ju-sɔ̃w. A ʋ nii-sɔw wɔ̃ na taa nɩ mɔtɔ̃w, ɩ̃ a ʋ gbɛɛ mɩ wɔ̃ taa nɩ vũu daar na ꞌlere,

²ɩ̃ tɛrɛ sɛb-bile na yuo a ʋ nuu pʋɔ. Ʋ binʼã a ʋ dʋrɩ̃ gbɛr a man juu, ɩ̃ bin a gʋbaa gbɛr a tene juu,

³ɩ̃ wuur nɩ kɔkɩr kpɛ̃w wɔ̃ gbeen na kono. A mɩnɛ ʋ na wuur a lɛ, a sa-tanɩsɩ anuu-nʼayi bala, mɩ tanʼã ƴɛr.

⁴Ɩ̃ a mɩnɛ ba na ƴɛr baar, ɩ̃ dãa na yele ɩ sɛb; ɩ̃-cɛ ɩ̃ wõ na kɔkɩr a be a saꞌlon na yel ma: “Taa sɛb wa. Ƴɔ̃w a ala a sa-tanɩsɩ anuu-nʼayi na yel a fʋ pʋ̃ɔ.”

⁵Ɩ̃ a sɩ-tʋnaa ʋlɔ ɩ̃ na dãa nyɛ ʋ ɩraa a man nɩ a tene juu, turʼã a ʋ dʋrɩ̃ nuu a saꞌlon,

⁶ɩ̃ pɔ nɩ a Naaŋmɩn ʋlɔ yuor na be a daar a jaa, na ir a saꞌlon, a tene, nɩ a man, nɩ a ala a jaa na be tɔ, yele nɩ: “Daar ma lɛ cãa be be go wa.

⁷A lɛdaar ba na wono a gbɛɛ anuu-nʼayi sɩ-tʋnaa ʋ pɛɛlɛ a ʋ ú, a Naaŋmɩn tʋ̃-sɔɔlaa na pãa na maal, tu nɩ a mɩnɛ ʋ na dãa man kʋ a ʋ tʋ̃tʋnbɔ na ɩ a ʋ ƴɛr-hierbe.”

⁸Ɩ̃ a ʋna kɔkɩr ɩ̃ na dãa wõ ʋ yi a saꞌlon lɛ yel ma na a nɔhɔ̃: “Cen, de a sɛb-bile na yuo a sɩ-tʋnaa nuumɩ, a ʋlɔ na ɩraa a man juu nɩ a tene juu.”

⁹Ɩ̃ cenʼã a sɩ-tʋnaa sɛ̃ na sʋɔr a ʋ kʋ ma a sɛb-bile. Ʋ yel ma: “De ꞌwɔb. Ʋ na tomo na a fʋ pʋ̃ɔ, ɩ̃-cɛ a fʋ nʋɔr pʋɔ ʋ na nʋmɔ na sɩɩr kaarɩ̃.”

¹⁰Ɩ̃ de na a sɛb-bile a sɩ-tʋnaa nuu pʋɔ ꞌwɔb. A ɩ̃ nʋɔr pʋɔ, ʋ nʋmɔ na sɩɩr kaarɩ̃, ɩ̃-cɛ a mɩnɛ ɩ̃ na vɔl baar, ʋ tomo na a ɩ̃ pʋ̃ɔ.

¹¹Ɩ̃ a ba yel ma: “A sɛw na a fʋ na lɛ hier a Naaŋmɩn ƴɛrɩ̃ na, na ba a nɩ-bʋrɔ bʋrɔ, a ten-bʋrɔ bʋrɔ, a ƴɛr-bʋrɔ bʋrɔ, nɩ a jamansɩ yaw.”