Read Birifor, Malba Miilfʋ Sɛbɛ 11 Bible Online

Miilfʋ Sɛbɛ 11 - Birifor, Malba bible

Miilfʋ Sɛbɛ 11

¹Ba de na kakɩr na wɔ̃ taa nɩ dãɓɩl-mɩɩnaa kʋ ma, ɩ̃ yel ma: “Ir cen na mɩɩn a Naaŋmɩn yir nɩ a baar lofʋ jie, ɩ̃ sɔr a bala na puoro a be.

²Ɩ̃-cɛ bar a yene dɔ̃dɔr. Taa wa mɩɩnɛ wa, a-na-ɩ be ba kʋ a nɩ-bʋlsɩ nɔɔ sãsarɛɛ a Naaŋmɩn tẽ-son maala nɩ cur lɩjaayi nʼayi.

³Ɩ̃ ɩ̃ na tʋ̃ na a ɩ̃ yel-mɩ̃ɛ ƴɛr-manba ayi a ba wɩ, su cẽcen lukpursɩ, na ba hier a Naaŋmɩn ƴɛrɩ̃ maalʼɩ̃ bibie tur nɩ kɔɔr ayi dɔɔl lɩjaata.”

⁴A bana ƴɛr-manba ayi ɩ na a olivi-tɩɩr ayi nɩ a lãpar ayi na ɩraa a ten ʋ jaa Nɩ-kpɛ̃ɛ nii-sɔw.

⁵A ala ɩ a nɩrɛ bʋɔrɔ na ʋ maal ba bier, a vũu na yi na a ba nɔɛ pʋɔ, ɩ̃ dɩ a ba sama deme. A nɩrɛ kãw wa bʋɔrɔ ʋ maal ba bier, lɛ ɩ̃ sɛw a ba na kú ʋ.

⁶A ƴɛr-manba bala tɛrɛ na sɔr na nyɔw a saa tɛɛlɛ, a mɩnɛ ʋ kɔ̃ wa wa, a lɛdaar ba na hiere a Naaŋmɩn ƴɛrɩ̃ wa. Ba mɩ tɛrɛ na sɔr na lɩɛb a kʋ̃ɔ ʋ ɩ a jɩ̃ɩ, ɩ̃ lɛ tɛrɛ a sɔr na tʋɔ sãw nɩ a tẽw nɩ a jãjĩ-yele bʋrɔ bʋrɔ a jaa, a daar lɛ ba na bʋɔrɔ.

⁷Ɩ̃-cɛ, a lɛdaar ba nɔɔ mana a Naaŋmɩn ƴɛrɩ̃ baara, a wɛ-dʋ̃ɔ ʋlɔ na yire a bɔw ʋlɔ pʋɔ na ma tɛrɛ a bɛwfʋ wa, na jɛbɛ nɩ ba na. Ʋ na jɛbʼɩ̃ ba na, tʋɔ ba kú.

⁸A ba kũusɩ na gã na a tẽ-kpɛ̃ɛ sɔr pɛlaa juu, a tẽw ʋlɔ pʋɔ ba na kpa a ba Nɩ-kpɛ̃ɛ a nɩ-kʋ-daa juu, a ʋna tẽw ba na bʋɔlɔ, lɔbɔ nɩ a sʋkpa, a *Sɔdɔm, mɩɩ a Ejibti.

⁹A nɩbɛ bala na ɩ a nɩ-bʋrɔ bʋrɔ, nɩ a bal-bʋrɔ bʋrɔ, nɩ a ƴɛr-bʋrɔ bʋrɔ, ɩ̃ mɩ yi a ten-bʋrɔ bʋrɔ na ꞌwuorʼã a ana kũusɩ, maalʼɩ̃ bibie ata nɩ bõ-ŋmãa, ɩ̃ kɔ̃ sɔw a ba ũu ba wa.

¹⁰Nʋ̃ɔ na nyɔw na a tẽw nɩbɛ, a ba cɩlɛ a bana nɩbɛ naa kũu ɩnɛ, tɩɩrɛ nɩ a yele kʋrɔ taa, a-na-ɩ ba dãa na pɔw kpowfʋ a bana nɩbɛ naa jie.

¹¹Ɩ̃ a lɛ a ana bibie ata nɩ bõ-ŋmãa na tɔl baar, a Naaŋmɩn vʋʋrʼã a baafʋ vʋʋrʋ̃, ʋ kpɛ ba a ba lɛ ir ɩraa, ɩ̃ a dãbɩ̃-kpɛ̃ɛ nyɔw a bala ba jaa na ꞌwuoro ba.

¹²A bana ƴɛr-hierbe ayi, ba wõ na kɔkɩr kpɛ̃w na yi a saꞌlon ɩ̃ yel ba: “Nyɩ́ do wa ka!” a ba duoro a saꞌlon a dɔ̃dɔrɩ̃ma pʋɔ, a lɛdaar a ba sama-deme na ɩraa ꞌwuoro ba.

¹³A wɩɛrʼãa, a tẽw ɓĩi na nɩ kpɛ̃w, a tẽw yie jiir pie ji-bõ-ƴen lo na pʋ̃pʋrɩ̃, ɩ̃ a nɩbɛ ture ture anuu-nʼayi kpi a ʋna tẽw ɓĩifʋ ɩnɛ, ɩ̃ a dãbɩ̃ɛ nyɔw a bala na cɛ, a ba pɛwrɛ a saa juu Naaŋmɩn.

¹⁴A gbɛɛ ayi nabier tɔlʼã; ɩ̃-cɛ, a gbɛɛ ata nabier pɔwrɔ na waara.

¹⁵A gbɛɛ anuu-nʼayi sɩ-tʋnaa mɩ pɛɛlʼã a ʋ ɩl, a kɔkɩ-kpɛn yire a saꞌlon yele: “A naa ɩfʋ a ka a tẽw ʋ jaa pʋɔ lɩɛbʼã ɩ a sɩ Nɩ-kpɛ̃ɛ nɩ a ʋ *Kirisi ben, ɩ̃ ʋ na ɩ na a naa a daar a jaa.”

¹⁶A nɩ-bɛrɛ lɩjɛrʼɩ̃ anaan na jɛ a ba naa-dakɔɔr jur a Naaŋmɩn nii-sɔw lo na kpa pɔw a nii-sɔɔr a tene, pɛwrɛ a Naaŋmɩn,

¹⁷yele nɩ: “Nɩ-kpɛ̃ɛ Naaŋmɩn na ɩ a kpɛ̃w a jaa Sʋbɔ, na ɩ, na mɩ dãa ɩ, fʋ̃ʋ sɔ puorfʋ a mɩnɛ fʋ na nyɔw a fʋ fãw kpɛ̃ɛ tɛrɛ nɩ a tʋɔfʋ.

¹⁸A tẽ-bʋrɔ bʋrɔ nɩbɛ dãa na nyɛ nɩ fʋ a suur, ɩ̃-cɛ a fʋ su-tuo daar ta na, a fʋ na guor a kũusɩ ƴɛrɩ̃, a fʋ na mɩ ya a fʋ tʋ̃tʋnbɔ bala na ɩ a fʋ ƴɛr-hierbe, lãa nɩ a fʋ nɩbɛ ba jaa, a bala ba jaa na bɛrmɛ, mɩɩ na pab, na jɔrɔ fʋ. A daar ta fʋ na mɩ wɛlɛ a bala na wɛlɛ a tẽw bara.”

¹⁹Ɩ̃ a Naaŋmɩn yir na be a saꞌlon yuo na, ɩ̃ a ba nyɛ a *pʋlɩ̃-taa daw a ʋ yir pʋɔ. Ɩ̃ a lɛdaar, ba nyɛ na a saa nyɩɩlɩ̃fʋ, wõ nɩ a kɔkɩɛ nɩ a saa tanfʋ, a tẽw mɩ ɓĩi, ɩ̃ a sa-kubie yaw mɩ yi a saꞌlon lo.