Read Birifor, Malba Miilfʋ Sɛbɛ 12 Bible Online

Miilfʋ Sɛbɛ 12 - Birifor, Malba bible

Miilfʋ Sɛbɛ 12

¹Ɩ̃ nyɛ na nɔ-kofʋ bõ-miilaa ʋ nyɩr a saꞌlon: pɔw na su a mɔtɔ̃w a cẽcen kaarɩ̃, ɩ̃ dɔɔl a ʋ gbɛɛ a cuu juu, ɩ̃ mɩ kpa ŋmarbie pie-nʼayi a *sɛlmɛ sapi kaarɩ̃.

²Pʋɔ ʋ tɛrɛ dɔwrɔ, a wono ʋ, ʋ wuure.

³Ɩ̃ ɩ̃ lɛ nyɛ na bõ-miilaa ƴen sʋbɔ na nyɩr a saꞌlon: gbãgba-col-jɩ̃-kpɛ̃ɛ ʋ, na tɛrɛ jur anuu-nʼayi, nɩ ɩlɛ pie, ɩ̃ mɩ kpa sɛlmɛ sapir a ʋ jur a jaa pʋɔ.

⁴Ʋ pɩɩrʼã a ŋmarbie ji-bõ-ƴen jiir ata nɩ a ʋ jʋʋr a saꞌlon lɔb a tene, ɩ̃ ir ɩraa a pɔw ʋlɔ na dɔwrɔ nii-sɔw, bʋɔrɔ ʋ vɔl a ʋ bie a lɛdaar ʋ na dɔwrɔ kpara.

⁵A pɔw dɔw na dabile, nɔɔ tɛrɛɛ a ten a jaa nɩ a kpɛ̃w ʋlɔ na wɔ̃ a kur kaarɩ̃. Ɩ̃-cɛ ba jalʼã a bie do nɩ a Naaŋmɩn sɛ̃, a ʋ naa-dakɔw par.

⁶Ɩ̃ a pɔw jɔ kpɛ a wɛkar pʋɔ, a jie a Naaŋmɩn na gbɛɛrɩ̃ ʋ, a ba na guol ʋ maalʼɩ̃ bibie tur nɩ kɔɔr ayi dɔɔl lɩjaata.

⁷Ala ɩ̃ baar, jɛb lo na a saa juu. A Mɩsɛl[1] nɩ a ʋ sɩ-tʋnɩsɩ jɛbʼɩ̃ na a gbãgbacol, ɩ̃ a gbãgbacol nɩ a ʋ sɩ-tʋnɩsɩ mɩ jɛbɛ nɩ ba.

⁸Ɩ-cɛ ꞌwaa tʋɔ ba wa, ɩ̃ ꞌwaa mɩ lɛ cãa tɛrɛ wɩɛr a ʋlɔ nɩ a ʋ sɩ-tʋnɩsɩ na lɛ be a be a saa juu wa.

⁹Ɩ̃ ba lɔbʼã a gbãgbacol kpɛ̃ɛ ʋlɔ bar a yẽw, a ʋlɔ na ɩ a tẽkorĩ waab, ba na bʋɔlɔ a cicile, nɩ a Satã, na bɛlɛ a tẽw nɩbɛ ba jaa. Ba lɔb ʋ na bar a ka a tẽw pʋɔ, nɩ a ʋ sɩ-tʋnɩsɩ ba jaa.

¹⁰Ɩ̃ lɛ wõ na kɔkɩr kpɛ̃w a saꞌlon na yel: “A ƴɛ̃ƴɛrɩ̃ na, a faafʋ daar pãa na ta. A sɩ Naaŋmɩn miil sɩ na a ʋ kpɛ̃w nɩ a mɩnɛ ʋ na ɩ a Jamana, nɩ a mɩnɛ a ʋ *Kirisi na tɛrɛ a tʋɔfʋ mɩ, a-na-ɩ ʋ lɔbʼã a sɩ yɛɛr cicile bar a tene, a ʋlɔ na ma dãa ɩraa a Naaŋmɩn nii-sɔw a mɔtɔ̃w nɩ a tɩsɔw cile ba.

¹¹A sɩ yɛɛr bala tʋɔ na a cicile ʋlɔ, a yi a Naaŋmɩn Péle jɩ̃ɩ ɩnɛ, nɩ a mɩnɛ ba na man a Naaŋmɩn ƴɛrɩ̃ a cãa pʋɔ. Ba sɔw na a kũu. Baa de a ba baafʋ ʋ ɩ ba bom wa.

¹²Saa juu, nɩ a nyɩmɩ na mɩ be a be, nyɩ́ cɩlɛ a ala ɩnɛ. Nabier na be na a tẽw juu nɩ a man juu, a-na-ɩ a Satã nyɛ na su-kpɛ̃ɛ, suu nɩ a be a nyɩ jie, a-na-ɩ ʋ bɔ̃w ka a ʋ daar ma cãa waa wa.”

¹³Ɩ̃ a lɛ a gbãgbacol na nyɛ bɔ̃w ka ba lɔb ʋ na bar a tene, ʋ nyɔw na ɩ̃ diwre a pɔw ʋlɔ na dɔw a dabile.

¹⁴Ɩ̃-cɛ a pɔw pɔw na tuu-kpɛ̃ɛ pɩrɛ ayi aw nɩ, cen na ta a ʋ jaajie a wɛkar pʋɔ, a ba na guol ʋ a be, maalʼɩ̃ yomo ata nɩ bõ-ŋmãa, a waab kɔ̃ tʋɔ pɔw ʋ wa.

¹⁵Ɩ̃ a waab cɩrʼã a kʋ̃ɔ a man kʋ̃ɔ kaarɩ̃, a cen na ta a pɔw par a mɩnɛ a na tʋɔ de ʋ.

¹⁶Ɩ̃-cɛ a tene haa na a nʋɔr sũo nɩ a pɔw, ɩ̃ vɔl a kʋ̃ɔ ala a gbãgbacol na cɩr bar.

¹⁷A gbãgbacol nyɛ na su-kpɛ̃ɛ ƴɔ̃w a pɔw, ɩ̃ lɩɛb cen na jɛbʼɩ̃ a ʋ bibiir ŋmɛɛ na cɛ, a bala ba jaa na jɔrɔ a *Naaŋmɩn ƴɛr-kpɛn, ɩ̃ mɩ ɩ dẽdẽ a *Jeeju yel-mɩ̃ɛ pʋɔ.

¹⁸Ɩ̃ a gbãgbacol ɩraa a man gbẽgbere nʋɔr.