Read Birifor, Malba Miilfʋ Sɛbɛ 13 Bible Online

Miilfʋ Sɛbɛ 13 - Birifor, Malba bible

Miilfʋ Sɛbɛ 13

¹Ɩ̃ lɛ nyɛ na wɛ-dʋ̃ɔ na yire a man pʋɔ ɩ̃ tɛrɛ ɩlɛ pie nɩ jur anuu-nʼayi, ɩ̃ kpa *sɛlmɛ sapir a ʋ ɩlɛ pie jur, ɩ̃ mɩ tɛrɛ yoe na kpɛrɛ a Naaŋmɩn a ʋ jurɩ̃.

²A wɛ-dʋ̃ɔ ʋlɔ ɩ̃ na nyɛ wɔ̃ na taa nɩ ꞌwʋbaa, ɩ̃-cɛ a ʋ gbɛɛ bɛrmɛ na, ma tɛrɛ kpɛ̃w ɩɛ wa, ɩ̃ a nʋɔr wɔ̃ taa nɩ gbeen nʋɔr. A gbãgbacol de na a ʋ fãgã kʋ ʋ, ɩ̃ mɩ kʋ ʋ a ʋ naa-dakɔw, nɩ a ʋ tʋɔfʋ ʋ na tɛrɛ a jiir a jaa.

³Ɩ̃ nyɛ na a ʋ juu kãw ba na dãa cɛ cɛ ŋma, ʋ ta a kũu, ɩ̃-cɛ a ŋmafʋ ala lɛ ɓɔ̃ na, ɩ̃ a tẽw nɩbɛ ba jaa nʋɔr ko ba na a ba tuure a ʋna wɛ-dʋ̃ɔ naa.

⁴A ba jaa pɛwrɛ na a gbãgbacol, a-na-ɩ ʋ de na a ʋ tʋɔfʋ kʋ a wɛ-dʋ̃ɔ, ɩ̃ ba mɩ pɛwrɛ na a wɛ-dʋ̃ɔ yele nɩ: “Ala mɩ be a wɛ-dʋ̃ɔ na kaarɩ̃? Ala na tʋɔ jɛbʼɩ̃ ʋ?”

⁵Ba kʋ ʋ na a sɔr ʋ ƴɛrɛ yo-bɔb ƴɛrɩ̃sɩ mɩ kpɛrɛ nɩ a Naaŋmɩn, ɩ̃ mɩ kʋ ʋ sɔr ʋ na maal a ala, maalʼɩ̃ cur lɩjaayi nʼayi.

⁶Ʋ nyɔw na ɩ̃ kpɛrɛ a Naaŋmɩn, mɩ kpɛrɛ nɩ a ʋ yuor, nɩ a jie ʋlɔ ʋ na be, nɩ a bala na be a be a saa juu.

⁷Ba kʋ ʋ na a sɔr ʋ na jɛbʼɩ̃ a Naaŋmɩn nɩbɛ tʋɔ ba, ɩ̃ mɩ kʋ ʋ a tʋɔfʋ a bal-bʋrɔ bʋrɔ jie, nɩ a nɩ-bʋrɔ bʋrɔ, nɩ a ƴɛr-bʋrɔ bʋrɔ, nɩ a ten a jaa jie.

⁸A tẽw pʋɔ nɩbɛ ba jaa, a bala a ba yoe na ma sɛb a baafʋ sɛbɛ pʋɔ wa, nɔɔ gbure na a dume puoro ʋ, a lɛ yelʼã a bala yoe na ma sɛb a Péle sɛbɛ pʋɔ wa, a ʋlɔ ba na dãa kú a tẽw nyɔwfʋ daar jaa.

⁹“A ʋlɔ na tɛrɛ a tobo wono nɩ, ú bɔ̃w cɛlɛ a asɩmɛ.

¹⁰A ala ɩ ba hiinʼã nɩrɛ a sama-deme ɩnɛ, a sama-deme na sɩrɩ̃ de ʋ cenʼɩ̃. Ɩ̃ a ala ɩ ba hiinʼã nɩrɛ a ba na kú nɩ ʋ a sɔ-bãjɩnɛ, a sɔ-bãjɩnɛ ba na sɩrɩ̃ kú nɩ ʋ. Ala-ɩ̃-sɔ a sɛw a Naaŋmɩn deme na tɛrɛ su-nyɔwraa, tɛrɛ nɩ a ƴɔ̃w-nyãa.”

¹¹Ɩ̃, ɩ̃ lɛ nyɛ na a wɛ-dʋ̃ɔ ƴen sʋbɔ ʋ yire a tene, ɩ̃ tɛrɛ ɩlɛ a Péle kaarɩ̃, ɩ̃ ƴɛrɛ wɔ̃ taa nɩ gbãgbacol.

¹²Ʋ tɛrɛ na a dãdãw wɛ-dʋ̃ɔ tʋɔfʋ a jaa, tʋnɔ nɩ a tʋmɔ a ʋ nii-sɔw. Ʋ fɛrʼã a tẽw pʋɔ nɩbɛ ba jaa a ba pɛwrɛ a dãdãw wɛ-dʋ̃ɔ ʋlɔ a ŋmafʋ ala na dãa sɛw a kú ʋ, na ɓɔ̃.

¹³A gbɛɛ ayi wɛ-dʋ̃ɔ ʋlɔ maalʼã nɔ-kofʋ tʋ̃-bɛrɛ, mɔɔ tʋɔ maal a vũu a yi a saꞌlon ɩ̃ wa lo a tene a nɩbɛ ba jaa nii-sɔw.

¹⁴Ʋ bɛlɛ na a tẽw pʋɔ nɩbɛ nɩ a ʋ nɔ-kofʋ tʋmɔ ba na kʋ ʋ ʋ maala a dãdãw wɛ-dʋ̃ɔ nii-sɔw. Ʋ yelʼã a tẽw pʋɔ nɩbɛ á bá mɛ bʋtɩb-kpɛ̃ɛ ʋ wɔ̃ taa nɩ a wɛ-dʋ̃ɔ ʋlɔ ba na cɛ cɛ nɩ a sɔ-bãjɩnɛ, ɩ̃-cɛ ʋ lɛ nɩ̃ɛ.

¹⁵Ɩ̃ a gbɛɛ ayi wɛ-dʋ̃ɔ pɔw na a tʋɔfʋ na maal a bʋtɩɩb ʋlɔ ʋ vʋʋrɔ, a mɩnɛ ʋ na mɩ tʋɔ ƴɛrɛ a ƴɛrɩ̃sɩ, ɩ̃ mɩ tʋɔ maal a ba kú a bala ba jaa na ma sɔw pɛwrɛ ʋ wa.

¹⁶Ʋ fɛrʼã a nɩ-bɛrɛ nɩ a nɩ-kɔmsɩ, a nãw deme nɩ a naabsɩ, a gbãgbaar nɩ a bala na sɔ a ba mɩ̃ɛ, a ba jaa na pɔw a jɩbaa a ba dʋrɩ̃ nuu pʋɔ, mɩɩ a ba diirɩ̃.

¹⁷Nɩrɛ ma tɛrɛ sɔr na da bom wa, a ala ma ɩ ʋ tɛrɛ na a ʋna jɩbaa naa wa; a lɛ yelʼã a wɛ-dʋ̃ɔ ʋlɔ yuor, mɩɩ a ʋ yuor sɛb-bie nʋɔr.

¹⁸A ka, a sɛw na a nɩrɛ na tɛrɛ kpaarfʋ. A ʋlɔ na tɛrɛ a yɛ̃ ú sɔr a wɛ-dʋ̃ɔ ʋlɔ sɛb-bie nʋɔr, a-na-ɩ ʋ na sɔrʼã nyɛ daba yuor. A sɔrfʋ nʋɔr ɩ na kɔɔr ayʋɔb dɔɔl lɩjaata nʼayʋɔb.