Read Birifor, Malba Miilfʋ Sɛbɛ 15 Bible Online

Miilfʋ Sɛbɛ 15 - Birifor, Malba bible

Miilfʋ Sɛbɛ 15

¹Ɩ̃ lɛ nyɛ na bõ-kpɛ̃ɛ kãw na ɩ bõ-miilaa a saꞌlon na ko ma nʋɔr: a ɩ na a sɩ-tʋnɩsɩ anuu-nʼayi na tɛrɛ jãjĩ-yele anuu-nʼayi. A baarfʋ daar yele ʋ, a-na-ɩ a ala pʋɔ a Naaŋmɩn su-tuo baara.

²Ɩ̃ lɛ nyɛ na a bom na wɔ̃ taa nɩ man kʋ̃ɔ na ɩ wɩl-wɩl na nyanyaa nɩ vũu. Ɩ̃ mɩ lɛ nyɛ na a bala na dãa tʋɔ a wɛ-dʋ̃ɔ, nɩ a ʋ bʋtɩɩb, nɩ a sɔr-bie ala na miile a ʋ yuor, a ba tɛrɛ a korĩjomsɩ ala a Naaŋmɩn na kʋ ba, ɩraa nɩ a man kʋ̃ɔ wɩl-wɩl gbẽgbere nʋɔr.

³Ba cɩɛrɛ na a Naaŋmɩn tʋ̃tʋnɔ Mowisi yele, nɩ a Naaŋmɩn Péle yele a nɔhɔ̃: “Nɩ-kpɛ̃ɛ Naaŋmɩn na ɩ a kpɛ̃w a jaa Sʋbɔ, a fʋ tʋmɔ bɛrmɛ na, ɩ̃ mɩ koro nʋɔr. Ten a jaa Jamana, a fʋ maal-bie torʼã, ɩ̃ mɩ ɩ a yel-mɩ̃ɛ.

⁴Nɩ-kpɛ̃ɛ, ala ɩ̃ be be kɔ̃ jɔrɔ fʋ wa? Ala ɩ̃ be be kɔ̃ maal a fʋ yuor ʋ yire wa? A-na-ɩ fʋ̃ʋ tɛw ɩ̃ ɩ a cɛcɛ. A ten a jaa nɩbɛ na wa na gbure a dume a fʋ nii-sɔw, a-na-ɩ a fʋ maal-bie torʼã, ɩ̃ nyɩr cãa pʋɔ.”

⁵A ala ɩ̃ baar, ɩ̃ lɛ nyɛ na a Naaŋmɩn puor-yir na ɩ a ʋ *pʋlɩ̃-taa di-ciiraa ʋ yuo a saꞌlon,

⁶ɩ̃ a sɩ-tʋnɩsɩ bala anuu-nʼayi na tɛrɛ a jãjĩ-yele anuu-nʼayi, a ba su a cẽcẽ-pɛlɛ na nyɩlɛ, sɛ nɩ sɛlmɛ gana a ba nyãa juu, yire nɩ a be a Naaŋmɩn yir ʋlɔ pʋɔ.

⁷A yel-mimie anaan bala ƴen sʋbɔ de na a sɛlmɛ laa na sɛw nɩ a Naaŋmɩn ʋlɔ na be a daar a jaa su-tuo, kʋ a sɩ-tʋnɩsɩ bala anuu-nʼayi.

⁸A Naaŋmɩn yo-yifʋ nɩ a ʋ kpɛ̃w ɩnɛ, a jʋʋr sɛw na a *puorfʋ yir ʋlɔ ɩ̃ nɩrɛ ma tʋɔrɔ kpɛɛrɛ a be, wa tara nɩ a lɛdaar a sɩ-tʋnɩsɩ anuu-nʼayi jãjĩ-yele anuu-nʼayi na maala baara wa.