Read Birifor, Malba Miilfʋ Sɛbɛ 17 Bible Online

Miilfʋ Sɛbɛ 17 - Birifor, Malba bible

Miilfʋ Sɛbɛ 17

¹A ala ɩ̃ baar, a sɩ-tʋnɩsɩ bala anuu-nʼayi na tɛrɛ a lara anuu-nʼayi, bõ-ƴen a ba pʋɔ wa na yel ma: “Wa, ɩ̃ na miil fʋ na a kpãafʋ ʋlɔ na tara a pɔw-baa na na yi a yuor, a lɛ yelʼã a tẽw ʋlɔ na ɩraa a kʋl-yaw gbẽgbere nɔɛ.

²A tẽw jamansɩ maalʼɩ̃ ʋ na a burbur, ɩ̃ a ʋ burbur maalfʋ kú na a tẽw ʋ jaa nɩbɛ a dɩvɛ̃ kaarɩ̃.”

³Ɩ̃ a sɩ-tʋnaa ɓɔw ma na a sɩɛ pʋɔ kpɛ nɩ wɛkar pʋɔ, ɩ̃ nyɛ a pɔw na jɛ a wɛ-dʋ̃-jɩ̃ɛw kpakpa juu ba na sɛb a yoe ala na kpɛrɛ a Naaŋmɩn pɔw a ʋ ɩ̃gan, na tɛrɛ jur anuu-nʼayi, nɩ ɩlɛ pie.

⁴A pɔw ʋlɔ vaarʼã cẽcen jɩ̃ɛw kpakpa na kpɛmɛ a dafʋ, ɩ̃ parɩ̃sɩ yele ba na maalʼɩ̃ a sɛlmɛ, nɩ a kubi-nyɩlɩsɩ nɩ a lɛr-kpɛn. Ʋ tɛrɛ na a sɛlmɛ laa a ʋ nuu pʋɔ a maal-kpansɩ na sɛw, nɩ a tʋ̃-kpansɩ ala na yi a ʋ burbur pʋɔ.

⁵Ba sɛbʼã yuor na ɩ a sʋkpa a ʋ diir pʋɔ na yel: “A *Babɩlɔ̃ na yi a yuor, a ʋlɔ na ɩ a pɔw-baar mã, nɩ a tẽw pʋɔ maal-kpansɩ mã.”

⁶Ɩ̃ nyɛ na a pɔw ʋlɔ ʋ nyɩrɩ̃ kú a Naaŋmɩn deme, nɩ a bala na ɩ a *Jeeju yel-mɩ̃ɛ ƴɛr-manba, a nʋ̃ɔ lɩɛb kú ʋ a dãa kaarɩ̃, a ba jɩ̃ɩ na deer ɩnɛ. A mɩnɛ ɩ̃ na nyɛ ʋ, nʋɔr ko ma na,

⁷a sɩ-tʋnaa yel ma: “Bõ ɩ a nʋɔr ko fʋ? Ɩ̃ na man fʋ na a fʋ bɔ̃w a pɔw ʋlɔ par, nɩ a wɛ-dʋ̃ɔ ʋlɔ na tɛrɛ a jur anuu-nʼayi nɩ a ɩlɛ pie.

⁸A wɛ-dʋ̃ɔ ʋlɔ fʋ na nyɛ, dãa na be ka, ɩ̃ ꞌwaa lɛ cãa wa, ɩ̃ ʋ nɔɔ lɛ yi na a bɔw ʋlɔ pʋɔ na ma tɛrɛ a bɛwfʋ wa, cen a wɛfʋ jie. A tẽw nɩbɛ bala yoe ba na ma sɛb ƴɔ̃w a baafʋ sɛbɛ pʋɔ a tẽw nyɔwfʋ daar jaa wa, a nʋɔr na ko ba na, a mɩnɛ ba na nyɛrɛ a wɛ-dʋ̃ɔ ʋlɔ, a-na-ɩ ʋ dãa na be ka, ɩ̃ ma lɛ cãa wa, ɩ̃-cɛ ʋ na lɛ wa na.

⁹“A ka sɛw na fʋ tɛrɛ yɛ̃ nɩ kpaarfʋ bɔ̃w nɩ a ƴɛrɩ̃ na par. A jur anuu-nʼayi ala miile na tan anuu-nʼayi, a jie ʋlɔ a pɔw na jɩnaa. A jur ala mɩ miile na jamansɩ anuu-nʼayi.

¹⁰Anuu a ba sɔ̃w lo na, a bõ-ƴen cãa na ɩ a jamana, ɩ̃ a kãw ma wa sɛr wa. A ʋlɔ wa wa, a sɛw na ʋ na kam fɩ̃ɩ.

¹¹A wɛ-dʋ̃ɔ ʋlɔ na dãa be, ɩ̃ ma lɛ cãa wa, ɩ na a jamansɩ bala anuu-nʼata sʋbɔ, ɩ̃ mɩ lɛ be a anuu-nʼayi bala pʋɔ, cere a wɛfʋ jie.

¹²“A ɩlɛ pie bala fʋ na nyɛ miile na jamansɩ pie na ma nyɔw a ba tʋmɔ sɛr wa, ɩ̃-cɛ ba na pɔw na a tʋɔfʋ ɩ nɩ a jamansɩ daar fɩ̃ɩ pʋɔ tɛw, lãa nɩ a wɛ-dʋ̃ɔ ʋlɔ.

¹³A ba jaa fɛw tɛrɛ na tɩɛrʋ̃ bõ-ƴen, ɩ̃ de a ba kpɛ̃w nɩ a ba tʋɔfʋ ƴɔ̃w a wɛ-dʋ̃ɔ tʋmɔ pʋɔ.

¹⁴Ba nɔɔ jɛbɛ nɩ na a Naaŋmɩn Péle, ɩ̃-cɛ a Péle na tʋɔ ba na, a-na-ɩ ʋlɔ ɩ̃ ɩ a nɩ-bɛrɛ Nɩ-kpɛ̃ɛ nɩ a jamansɩ Jamana. A ʋ nɩbɛ mɩ ʋ na bʋɔl, ɩ̃ mɩ vɛl ir, na mɩ ɩ a dẽdẽ, nɔɔ mɩ lãa na pɔw nɩ ʋ a tʋɔfʋ.”

¹⁵A sɩ-tʋnaa lɛ yel ma na go: “A kʋ̃ɔsɩ ala fu na nyɛ, a jie a pɔw-baa na jɛ, miile na a nɩ-bʋlsɩ, a nɩ-yaw na duo a ji-gbulĩsɩ, a tẽ-bʋrɔ bʋrɔ nɩ a ƴɛr-bʋrɔ bʋrɔ nɩbɛ.

¹⁶A ɩlɛ pie fu na nyɛ, nɩ a wɛ-dʋ̃ɔ, nɔɔ ꞌlaarʼã a pɔw-baa. Ba na sãw na a ʋ yele a jaa bar, ɩ̃ cɛ ʋ bar nɩ salĩɓuor. Ba na ꞌwɔb v na ɩ̃ cɛ ƴɔ̃w a vũu pʋɔ.

¹⁷A-na-ɩ a mɩnɛ a Naaŋmɩn na ƴɔ̃w a ba sube puur a ba na maal a v pʋ-tɩɛrʋ̃, ba na tɛrɛ na nɔ-bõ-ƴen de nɩ a ba tʋɔfʋ ƴɔ̃w a wɛ-dʋ̃ɔ tʋmɔ pʋɔ, wa ta nɩ a lɛdaar a Naaŋmɩn ƴɛrɩ̃sɩ na maala baara.

¹⁸“Ɩ̃ a pɔw ʋlɔ fu na nyɛ miile na a tẽ-kpɛ̃ɛ ʋlɔ na tɛrɛ a tʋɔfʋ a tẽw jamansɩ jie.”