Read Birifor, Malba Miilfʋ Sɛbɛ 20 Bible Online

Miilfʋ Sɛbɛ 20 - Birifor, Malba bible

Miilfʋ Sɛbɛ 20

¹A ala ɩ̃ baar, ɩ̃ lɛ nyɛ na sɩ-tʋnaa ʋ yi a saꞌlon suu ɩ̃ tɛrɛ a bɔw ʋlɔ na ma tɛrɛ a bɛwfʋ wa nakili a ʋ nuu pʋɔ, nɩ a bɔ̃jɔrɩ̃ gbol.

²Ʋ nyɔw na a gbãgbacol na ɩ a wa-kʋraa, a lɛ yelʼã a ʋlɔ na ɩ a cicile, mɩɩ a Satã, ɩ̃ lũ nɩ ʋ a ʋ bɔ̃jɔrɩ̃ gbol, ʋ na maal yomo tur.

³Ʋ de ʋ na lɔb ƴɔ̃w a bɔw ʋlɔ pʋɔ na ma tɛrɛ a bɛwfʋ wa, ɩ̃ kpal ƴɔ̃w nɩ a jɩbaa, a mɩnɛ ʋ kɔ̃ lɛ tʋɔ cãa bɛlɛ a tẽw nɩbɛ wa ta nɩ a yomo tur ala na tɔlɔ. A ala ɩ̃ tɔl baar, a sɛw na a ba na ꞌlor ʋ bar daar fɩ̃ɩ pʋɔ.

⁴Ɩ̃ lɛ nyɛ na naa-dakɔɔr, ɩ̃ a bala na jɛ a ba jur, ba kʋ ba na a sɔr a ba guor a ƴɛrɩ̃sɩ. Ɩ̃ a bala na dãa mana a *Jeeju yel-mɩ̃ɛ nɩ a Naaŋmɩn ƴɛrɩ̃ a ba ŋma ba a jur, ɩ̃ nyɛ na a ba sɩɩr. A bala, baa dãa pɛwrɛ a wɛ-dʋ̃ɔ nɩ a ʋ bʋtɩɩb wa. Baa mɩ dãa pɔw a ʋ jɩbaa a diirɩ̃ mɩɩ a nuu pʋɔ wa. Ba irʼã a kũu pʋɔ lãa jɛ nɩ a *Kirisi a ʋ fãw pʋɔ maalʼɩ̃ yomo tur.

⁵A nanɩ ɩ na a dãdãw kũu-pʋɔ-irfʋ, ɩ̃ a bala na cɛ ma ir a kũu pʋɔ ɩ̃ a ala ma ɩ a lɛ a yomo tur na tɔl baar wa.

⁶A na ɩ na nʋ̃ɔ a Naaŋmɩn deme bala jie na be a dãdãw kũusɩ irfʋ pʋɔ. A gbɛɛ ayi kũu ma lɛ tʋɔrɔ ba wa. Ba na ɩ na a Naaŋmɩn nɩ a Kirisi baar-lorbo, lãa jɛ nɩ a Kirisi a ʋ fãw pʋɔ maalʼɩ̃ yomo tur.

⁷Ɩ̃ a yomo tur ala wa tɔl baar, ba na ꞌlorʼã a Satã bar, ʋ yi a kasu pʋɔ,

⁸na ʋ cen na bɛlɩ̃ a ten bʋrɔ bʋrɔ a lõbobo a jaa, ba na bʋɔlɔ a Gɔgɩ nɩ a Magɔgɩ, kpaarɩ̃ ba taa a jɛb ɩnɛ. Ba na waa na jɛ̃ taa nɩ a man gbẽgbere nʋɔr biire.

⁹Ba yɛrʼã pɔw a tẽw ʋ jaa, ɩ̃ mɩ jilĩ kolĩ a Naaŋmɩn deme wɩɛr, nɩ a tẽw ʋlɔ a Naaŋmɩn na nʋ, ɩ̃-cɛ a vũu yi na a saꞌlon ɩ̃ lo dɩ ba.

¹⁰Ba lɔbʼã a cicile ʋlɔ na dãa bɛlɛ a tẽw nɩbɛ, ƴɔ̃w a vũu bɔw pʋɔ, a jie ʋlɔ a kʋsɩ-ꞌlerisɩ na dɩrɛ, a be a wɛ-dʋ̃ɔ nɩ a jir-ŋma-ƴɛr-hiere na be, a ba na kpow ba a mɔtɔ̃w nɩ a tɩsɔw a yomo a jaa fɛw.

¹¹Ɩ̃ ɩ̃ lɛ nyɛ na naa-dakɔw kpɛ̃ɛ na pɛlɩ̃, nɩ a ʋlɔ na jɛ a ʋ juu, ɩ̃ a tene nɩ a saꞌlon nurɩ̃ a ʋ nii-sɔw, ɩ̃ a baa lɛ nyɛrɛ ba wa.

¹²Ala ɩ̃ baar, ɩ̃ nyɛ na a bibiir nɩ a nɩ-bɛrɛ bala na dãa kpi, a ba ɩraa a naa-dakɔw nii-sɔw, ɩ̃ a ba yuo sɛbsɩ bin, ɩ̃ lɛ yuo sɛb-kpee na ɩ a baafʋ sɛbɛ. Ba guorʼã a kũusɩ bala ƴɛrɩ̃ tu nɩ a ala ba na dãa maal, a ba sɛb ƴɔ̃w a sɛbsɩ pʋʋr.

¹³A man tɩɩrʼã a kũusɩ bala ʋ na dãa tɛrɛ. A kũu nɩ a kpɩɩn tẽw mɩ tɩɩr a kũusɩ bala ba na mɩ dãa tɛrɛ, ɩ̃ a ba guor a ba ƴɛrɩ̃ ba jaa bõ-ƴene-ƴene, tu nɩ a ala ba na dãa maal.

¹⁴Ba lɔbʼã a kũu nɩ a kpɩɩn tẽw ƴɔ̃w a vũu bɔw pʋɔ. A vũu bɔw ʋlɔ ɩ na a gbɛɛ ayi kũu.

¹⁵Ɩ̃ ba mɩ lɔbʼã a nɩrɛ lɛ na ma tɛrɛ a ʋ yuor a baafʋ sɛbɛ pʋɔ wa ƴɔ̃w a vũu bɔw pʋɔ.