Read Birifor, Malba Miilfʋ Sɛbɛ 21 Bible Online

Miilfʋ Sɛbɛ 21 - Birifor, Malba bible

Miilfʋ Sɛbɛ 21

¹Ala ɩ̃ baar, ɩ̃ nyɛ na saꞌlon paalaa nɩ tẽ-paalaa, a-na-ɩ a dãdãw saꞌlon nɩ a dãdãw tẽw tɔlʼã, ɩ̃ a man ma lɛ be be go wa.

²Ɩ̃ mɩ nyɛ na a tẽ-son na ɩ a Jerujalɛm paalaa a Naaŋmɩn na cɔɔrɩ̃ bar, ʋ yi a saa juu ɩ̃ suure, wɔ̃ taa nɩ pɔsabile na parɩ̃sɩ cere a ʋ sɩrɛ tuorfʋ jie.

³Ɩ̃ wõ na kɔkɩr kpɛ̃w na yi a naa-dakɔw par na yel: “A ƴɛ̃ƴɛrɩ̃ na, a Naaŋmɩn wa na jɛ a nɩbɛ sɔ̃w! Ʋ na jɛ nɩ ba na, ɩ̃ ba na ɩ na a ʋ nɩbɛ. A Naaŋmɩn na be nɩ ba na, ɩ̃ ɩ a ba Naaŋmɩn.

⁴Ʋ na fɛ na a ba mɔtɔ̃-kʋ̃ɔ a jaa bar a ba mimie pʋɔ. Kũu kɔ̃ lɛ be go wa. A nãw nɩ a waalɩ̃fʋ kɔ̃ mɩ lɛ be wa. Bom ma lɛ ꞌwɔbɛɛ nɩrɛ wa, a-na-ɩ a yel-koro tɔlʼã.”

⁵Ɩ̃ a ʋlɔ na jɛ a naa-dakɔw juu yelʼã: “A ƴɛ̃ƴɛrɩ̃ na, ɩ̃ maala na a yele a jaa a ɩrɛɛ yel-paala.” Ʋ lɛ yelʼã go: “Sɛb a ƴɛrɩ̃sɩ asɩmɛ, a-na-ɩ a ɩ na dẽdẽ ɩ̃ mɩ ɩ a yel-mɩ̃ɛ ƴɛrɩ̃.”

⁶Ɩ̃ ʋ yel ma na go: “A maalʼã. A maa ɩ a dãdãw nɩ a bɛwfʋ jie, a nyɔwfʋ jie nɩ a baarfʋ jie. A ʋlɔ a kʋ̃ɔ-nyuur na nyɔw, ɩ̃ na kʋ ʋ na a baafʋ kʋ̃ɔ bunaa a pɔrɔ.

⁷A ʋlɔ na ɩrɛɛ a tʋɔfʋ sʋbɔ na pɔw na a yele ala. Ɩ̃ na ɩ na a ʋ Naaŋmɩn, ɩ̃ ʋ ɩ a ɩ̃ bie.

⁸Ɩ̃-cɛ a ala ɩ a dãbɩ̃-ŋman, nɩ a bala na ma tɛrɛ a ƴɔ̃w-nyãa wa, a nɩ-kpansɩ, a nɩ-kúrbɔ, a gã-ta-burbur deme, a tɩsɔw nɩbɛ, a tɩbɛ deme, nɩ a jir-ŋmarba ba jaa, a ba jie na be na a vũu bɔw pʋɔ, a jie a kʋsɩ-ꞌlerisɩ na dɩrɛ, na ɩ a gbɛɛ ayi kũu.”

⁹A sɩ-tʋnɩsɩ anuu-nʼayi bala na tɛrɛ a lara anuu-nʼayi na sɛw nɩ a jãjĩ-yel-baarsɩ anuu-nʼayi, bõ-ƴen wa na yel ma: “Wa, ɩ̃ na miil fʋ na a Naaŋmɩn Péle pɔw ʋ na kule.”

¹⁰Ɩ̃ a sɩ-tʋnaa ɓɔw ma na a sɩɛ pʋɔ, do nɩ tã-kpɛ̃ɛ juu ɩ̃ miil ma a tẽ-son na ɩ a Jerujalɛm, na yi a Naaŋmɩn sɛ̃ a saa juu ɩ̃ suure,

¹¹nyɩnyɩlɛ nɩ a Naaŋmɩn yo-yifʋ. A ʋ caarɩ̃fʋ wɔ̃ na taa nɩ a kubi-ɓɔmɔ na dɩ jasɩpɩ na nyɩlɛ papar.

¹²Ʋ tɛrɛ na dacĩ-woor ba na mɛ kolĩ ʋ, ʋ do a saꞌlon, ɩ̃ tɛrɛ dɔ̃dɔ-nɔɛ pie-nʼayi ba na sɛb a *Ɩsɩrayɛl nɩbɛ bal pie-nɩʼayi yoe ƴɔ̃w, ɩ̃ a sɩ-tʋnɩsɩ pie-nʼayi na gure.

¹³A dɔ̃dɔɛ ala be na a tẽw lõbobo a jaa: ata be na a tẽw parɩ̃, a ata be a dʋrɩ̃ loor, a ata be a tẽw iin, ɩ̃ a ata mɩ be a gʋbaa loor.

¹⁴Ba mɛ na a dacĩ-woor ʋlɔ dɔɔl a kubie pie-nʼayi jur ba na sɛb a yoe pie-nʼayi ƴɔ̃w, na ɩ a Naaŋmɩn *nɩ-tʋnɩsɩ yoe.

¹⁵A sɩ-tʋnaa ʋlɔ na ƴɛrɛ nɩ ma tɛrɛ na da-mɩɩnaa na ɩ a sɛlmɛ ʋ na mɩɩnʼɩ̃ a tẽw, nɩ a ʋ dɔ̃dɔɛ, nɩ a ʋ dacin,

¹⁶A tẽw womofʋ nɩ a yalɩ̃fʋ jɛ̃ na tar. A sɩ-tʋnaa mɩɩnʼã a tẽw nɩ a ʋ da-mɩɩnaa, a womofʋ ɩ kilo ture ayi dɔɔl kɔɔr ayi. A mɩnɛ ʋ na yalɩ̃ ɩ̃ mɩ womo, lɛ ʋ mɩ do.

¹⁷A ala ɩ̃ baar, ʋ mɩ mɩɩnʼã a dacin, ʋ ta da-mɩɩnaa kʋbaa lɩjaayi nʼanaan. A ʋ da-mɩɩnaa ʋlɔ jɛ̃ na taa nɩ a nɩrɛ nuu kpʋlɩ̃kpʋʋr wa ta nɩ a nubie.

¹⁸Ba mɛ na a dacin nɩ a jasɩpɩ, ɩ̃ mɛ a tẽw nɩ a sɛlmɛ nere na nyɛrɛ caaraa kaarɩ̃.

¹⁹Ba yaarɩ̃ na a dacĩ-kparaa kubi-bɛrɛ nɩ a kʋsɩ-ɓɔmɔ bʋrɔ bʋrɔ. A dãdãw kubir yaarɩ̃fʋ bom ɩ na jasɩpɩ, a gbɛɛ ayi ben ɩ na safɩɩr, a gbɛɛ ata ben ɩ na agatɩ, a gbɛɛ anaan ben ɩ na ɛmɛrɔdɩ,

²⁰a gbɛɛ anuu ben ɩ na onɩsɩ, a gbɛɛ ayʋɔb ben ɩ na sardɔn, a gbɛɛ anuu-nʼayi ben ɩ na kɩrɩsʋlɩtɩ, a gbɛɛ anuu-nʼata ben ɩ na beril, a gbɛɛ pie-for-bir ben ɩ na topajɩ, a gbɛɛ pie ben ɩ na kɩrɩsʋpasɩ, a gbɛɛ pie-nɩ-bõ-ƴen ben ɩ na turkosi, ɩ̃ a gbɛɛ pie-nʼayi ben ɩ a amɛtɩsɩtɩ.

²¹A dɔ̃dɔ-nɔɛ pie-nʼayi ala ɩ na lɛr-bie pie-nʼayi. Lɛr-bir bõ-ƴene-ƴene ba maalʼɩ̃ ba ba jaa. A sɔr ʋlɔ na be a tẽw pʋɔ ɩ na sɛlmɛ nere na nyɛrɛ caaraa kaarɩ̃.

²²Maa nyɛ a *puorfʋ yir a ʋna tẽw pʋɔ wa, a-na-ɩ a Nɩ-kpɛ̃ɛ Naaŋmɩn na ɩ a kpɛ̃w a jaa Sʋbɔ, nɩ a Naaŋmɩn Péle, ɩ̃ ɩ a ʋ puorfʋ yir.

²³A tẽw ʋlɔ ma bʋɔrɔ mɔtɔ̃w mɩɩ cuu a na caara ʋ wa, a-na-ɩ a Naaŋmɩn yo-yifʋ caarɩ̃ ʋ na, ɩ̃ a Naaŋmɩn Péle ɩ̃ ɩ a ʋ lãpa.

²⁴A tẽ-bʋrɔ bʋrɔ nɩbɛ na yʋɔrɔ na a ʋ cãa pʋɔ, ɩ̃ a tẽw pʋɔ jamansɩ na de na a ba na-yele wɩɛrɛ nɩ kʋrɔ ʋ.

²⁵A ʋ dɔ̃dɔ-nɔɛ na yuo na a mɔtɔ̃w a jaa, a-na-ɩ tɩsɔw ma lɛ beree be wa.

²⁶Ba na de na a tẽ-bʋrɔ bʋrɔ na-yele nɩ a ba yo-yifʋ yele wɩ nɩ kpɛ nɩ a be.

²⁷Ɩ̃-cɛ bõ-dɛɛr kãw ma kpɛɛrɛ be fɩ̃ɩ wa. A nɩrɛ lɛ na maala a yel-kpansɩ, mɩɩ na ŋmara a jirsɩ ma mɩ kpɛɛrɛ wa, ɩ̃ a bala a yoe na sɛb a Naaŋmɩn Péle baafʋ sɛbɛ pʋɔ tɛw na kpɛ.