Read Birifor, Malba Miilfʋ Sɛbɛ 22 Bible Online

Miilfʋ Sɛbɛ 22 - Birifor, Malba bible

Miilfʋ Sɛbɛ 22

¹Ɩ̃ a sɩ-tʋnaa miil ma na a baafʋ kʋ̃ɔ kʋlaa, a kʋ̃ɔ na ɩ wɩl-wɩl-wɩl caaraa kaarɩ̃, na yi a Naaŋmɩn nɩ a Péle naa-dakɔw par,

²ɩ̃ jɔrɔ a tẽw sɔr sɔɔlɩ̃sɔw. A baafʋ tɩɛ ɩraa na a kʋlaa lõbobo pʋʋr a jaa, na wɔnɔ a wɔmɔ gbɛɛ pie-nʼayi a yuon pʋɔ, a lɛ yelʼã a gbɛ-daa a cur a jaa pʋɔ. A ʋ vɛɛ ɩ na tɩ̃ɩ, ma kpaara a tẽ-bʋrɔ bʋrɔ nɩbɛ.

³A Naaŋmɩn pɔfʋ ma lɛ beree bom kãw pʋɔ wa. A Naaŋmɩn nɩ a Péle naa-dakɔw na be na be, ɩ̃ a ʋ tʋ̃tʋnbɔ na pɛwrɛ ʋ na.

⁴Ba na nyɛ na a ʋ nii-sɔw, ɩ̃ ʋ na sɛbʼã a ʋ yuor ƴɔ̃w a ba diirɩ̃.

⁵Tɩsɔw ma lɛ beree wa, ɩ̃ baa lɔɔ bʋɔrɔ lãpa cãa, mɩɩ mɔtɔ̃w caarɩ̃fʋ wa, a-na-ɩ a Nɩ-kpɛ̃ɛ Naaŋmɩn na caarɩ̃ ba na nɩ a ʋ cãa, ɩ̃ ba na ɩ na jamansɩ a daar a jaa.

⁶A ala ɩ̃ baar, a sɩ-tʋnaa yel ma na: “A ƴɛrɩ̃sɩ asɩmɛ ɩ na dẽdẽ, ɩ̃ mɩ ɩ a yel-mɩ̃ɛ ƴɛrɩ̃, ɩ̃ a Nɩ-kpɛ̃ɛ Naaŋmɩn na ma tɔwrɔ a ʋ ƴɛr-hierbe a ba sɩɛ pʋɔ, tʋ̃ na a ʋ sɩ-tʋnaa ʋ wa miil a ʋ tʋ̃tʋnbɔ a ala na be a sɔr pʋɔ waara.”

⁷A *Jeeju yelʼã: “Nyɛ, ɩ̃ be na a sɔr pʋɔ wɩɛrɛ. Nʋ̃ɔ ma be na a ʋlɔ jie na jɔrɔ a *Naaŋmɩn pʋ-tɩɛrʋ̃-bʋʋrɔ ƴɛrɩ̃sɩ na be a sɛbɛ na pʋɔ.”

⁸A maa Jã, ɩ̃ wõ na ɩ̃ mɩ nyɛ a ana yele, ɩ̃ a mɩnɛ ɩ̃ na wõ ɩ̃ nyɛ ba baar, ɩ̃ lo na a sɩ-tʋnaa ʋlɔ na miil ma a ana yele gbɛɛ pulẽe bʋɔrɔ ɩ̃ puor ʋ.

⁹Ɩ̃ ʋ yel ma na: “Taa maal a lɛ wa! Ɩ̃ ɩ na a fʋ lãa-tʋnɔ, nɩ a fʋ yɛɛr na ɩ a Naaŋmɩn ƴɛr-hierbe lãa-tʋnɔ, lãa nɩ a bala na jɔrɔ a sɛbɛ na ƴɛrɩ̃sɩ. Pɛwrɛ a Naaŋmɩn!”

¹⁰Ɩ̃ ʋ lɛ yel ma na: “Taa sɔɔlɩ̃ a Naaŋmɩn ƴɛr-hiere ƴɛrɩ̃sɩ na be a sɛbɛ na pʋɔ bar wa, a-na-ɩ a daar ʋlɔ a Naaŋmɩn na ƴɔ̃w pɩɛlɛ na.

¹¹A gõgolĩfʋ sʋbɔ, ú cãa cere nɩ a ʋ gõgolĩfʋ, a nɩ-kpana ú cãa cere nɩ a ʋ maal-kpana, a nɩ-son ú cãa cere nɩ a ʋ son maalfʋ, ɩ̃ a ʋlɔ na ɩ a nɩ-cɛcɛ ú cãa cere nɩ a ʋ cɛcɛ ɩfʋ.”

¹²Ɩ̃ a Jeeju yelʼã: “Nyɛ, ɩ̃ be na a sɔr pʋɔ wɩɛrɛ nɩ a yar ala ɩ̃ na kʋrɔ a nɩbɛ ba jaa bõ-ƴene-ƴene, tuure nɩ a ba tʋ̃-bie.

¹³A maa ɩ a dãdãw nɩ a bɛwfʋ jie, a ni-diere nɩ a par-pɔɔrɔ, a nyɔwfʋ jie nɩ a baarfʋ jie.”

¹⁴Nʋ̃ɔ ma be na a bala jie na ma pɛɛrɛ a ba cẽcene, na tʋɔ tɛrɛ a sɔr ꞌwɔbɔ nɩ a baafʋ tɩɛ wɔmɔ, na mɩ tʋɔ tu a dɔ̃dɔ-nɔɛ kpɛ a tẽw pʋɔ.

¹⁵Ɩ̃-cɛ a nɩ-kpansɩ, a tɩsɔw nɩbɛ, a gã-ta-burbur deme, a nɩ-kúrbɔ, a tɩbɛ deme, nɩ a bala ba jaa na nʋ a jirsɩ ŋmafʋ mɩ maala nɩ a jiri tʋmɔ, ba na ɩraa na be a yẽw.

¹⁶“A maa Jeeju ɩ̃ tʋ̃ a ɩ̃ sɩ-tʋnaa ʋ wɩ man nyɩ a ƴɛrɩ̃sɩ asɩmɛ a *duo-puorbo ɩnɛ. Maa ɩ̃ ɩ a Davɩtɩ bal parvʋɔr bie, nɩ a bi-vɩɛ ŋmarbir na caara.”

¹⁷A Naaŋmɩn Sɩɛ nɩ a Péle Pɔw-kulaa yelʼã: “Wa!” A ʋlɔ na mɩ wonaa, ú mɩ yel: “Wa!” A ʋlɔ a kʋ̃ɔ-nyuur na nyɔw, ú wa; a ʋlɔ na mɩ bʋɔrɔ a baafʋ kʋ̃ɔ, ú wa nyu pɔrɔ.

¹⁸A maa Jã, ɩ̃ kpãkpana na a nɩbɛ ba jaa na wono a *Naaŋmɩn pʋ-tɩɛrʋ̃-bʋʋrɔ ƴɛrɩ̃sɩ na be a sɛbɛ na pʋɔ: a ala ɩ nɩrɛ wa dɔɔlʼã bom a ƴɛrɩ̃sɩ asɩmɛ pʋɔ, a Naaŋmɩn na mɩ dɔɔl ʋ na a jãjĩ-yele ala na be a sɛbɛ na pʋɔ.

¹⁹Ɩ̃ a nɩrɛ wa mɩ ir bom a Naaŋmɩn pʋ-tɩɛrʋ̃-bʋʋrɔ ƴɛrɩ̃sɩ na be a sɛbɛ na pʋɔ, a Naaŋmɩn na mɩ mɔ̃w ʋ na a baafʋ tɩɛ wɔmɔ ꞌwɔbfʋ bar, nɩ a tẽ-son pʋɔ kpɛfʋ na ɩ a ala ba na sɛb ƴɔ̃w a sɛbɛ na pʋɔ.

²⁰A ʋlɔ na mana a yel-mɩ̃ɛ ƴɛrɩ̃sɩ asɩmɛ yele na: “ɔɔ, ɩ̃ be na a sɔr pʋɔ wɩɛrɛ!” *Amɛn! Nɩ-kpɛ̃ɛ *Jeeju, wa!

²¹A Nɩ-kpɛ̃ɛ Jeeju sũofʋ ú be a nɩbɛ ba jaa jie.