Read Birifor, Malba Miilfʋ Sɛbɛ 3 Bible Online

Miilfʋ Sɛbɛ 3 - Birifor, Malba bible

Miilfʋ Sɛbɛ 3

¹“Sɛb a nɔhɔ̃ tɩɩr kʋ a Sardɛsɩ-tẽw *duo-puorbo sɩ-tʋnaa: “A ʋlɔ na tɛrɛ a Naaŋmɩn sɩɩr anuu-nʼayi, nɩ a ŋmarbie anuu-nʼayi ƴɛrɩ̃sɩ nɩ a asɩmɛ. Ɩ̃ bɔ̃w na a fʋ tʋmɔ a jaa. Ɩ̃ bɔ̃w na ka a nɩbɛ yele na a fʋ cãa na mimir, ɩ̃-cɛ a ɩ fʋ kpi na.

²Jaw ir, ɩ̃ maal a ala na cɛ na kpiire, a lɛ kpɛmɛ. A-na-ɩ ɩ̃ jʋʋrʼã nyɛ a fʋ maalfʋ a ɓɔr a ɩ̃ Naaŋmɩn nii-sɔw.

³Ala-ɩ̃-sɔ, cãa bɔ̃w nɩ a ʋna jaanfʋ fʋ na dãa pɔw, nɩ a mɩnɛ fʋ na dãa wõ ʋ. Tɛrɛ a jaanfʋ ʋlɔ ɩ̃ lɩɛb a fʋ yɛ̃. A fʋ̃ʋ ma jaw ir wa, ɩ̃ na wɩ na nyanyuur kaarɩ̃, ɩ̃ a fʋ kɔ̃ bɔ̃w a daar ʋlɔ ɩ̃ na duune nɩ fʋ wa.

⁴Ɩ̃-cɛ fʋ tɛrɛ na a ŋmɛɛ a be a Sardɛsɩ-tẽw pʋɔ na ma sɔb a ba cẽcene wa. Ba nɔɔ su na a cẽcẽ-pɛlɛ a sɩ lãa cere taa, a-na-ɩ ba sɛw nɩ na.

⁵A ʋlɔ na ɩrɛɛ a tʋɔfʋ sʋbɔ na mɩ su na cẽcẽ-pɛlɛ a ba kaarɩ̃, ɩ̃ maa sãwna a ʋ yuor a baafʋ sɛbɛ pʋɔ bara wa. Ɩ̃ ɩ̃ na cã na yel a ɩ̃ Sãa nii-sɔw nɩ a ʋ sɩ-tʋnɩsɩ nii-sɔw, a ʋ ɩ na a ɩ̃ ben.

⁶“A ʋlɔ na tɛrɛ a tobo wono nɩ, ú bɔ̃w cɛlɛ a ala a Naaŋmɩn Sɩɛ na yele a duo-puorbo.

⁷“Sɛb a nɔhɔ̃ tɩɩr kʋ a Fɩladɛlfɩ-tẽw *duo-puorbo sɩ-tʋnaa: “A ʋlɔ na ɩ a Cɛcɛ Sʋbɔ, nɩ a Yel-mɩ̃ɛ Sʋbɔ, na mɩ tɛrɛ a jamana Davɩtɩ nakili, ƴɛrɩ̃sɩ nɩ a asɩmɛ. Ɩ̃ ɩ na a ʋlɔ na ma yuo, ɩ̃-cɛ a nɩrɛ ma be na tʋɔ pɔw wa, nɩ a ʋlɔ na ma pɔw, ɩ̃-cɛ a nɩrɛ ma be na tʋɔ yuo wa.

⁸Ɩ̃ bɔ̃w na a fʋ tʋmɔ a jaa. Ɩ̃ bɔ̃w na ka a fʋ fãgã pabʼã, ɩ̃-cɛ fʋ cãa na tɛrɛ a ɩ̃ ƴɛrɩ̃, mɩ ɩraa nɩ a ɩ̃ pʋɔ dẽdẽ. Ala-ɩ̃-sɔ ɩ̃ yuo na pan bar a fʋ nii-sɔw nɩrɛ na ma tʋɔrɔ pɔwrɔ wa.

⁹Ŋmɛɛ be na be na ɩ a Satã duo-puorbo na ma bɛlɩ̃ yele á Jufisɩ ba ɩ, ɩ̃-cɛ a ɩ jiri ʋ. Ɩ̃ na maal ba na a ba wa lo gburĩ dume a fʋ nii-sɔw puoro fʋ, a ba bɔ̃w ka ɩ̃ nʋnɔ fʋ na.

¹⁰A mɩnɛ fʋ na sɔw a ʋna ƴɛrɩ̃ ɩ̃ na dãa ƴɛr fʋ a fʋ tɛrɛ a su-nyɔwraa, a maa mɩ, ɩ̃ na gu fʋ na a lɛdaar a bɩɩrfʋ na pɔwrɔ a tẽw ʋ jaa, bɩɩrɛ a nɩbɛ a jiir a jaa.

¹¹Maa yaarɩ̃ wɩɛrɛ wa. Bɔ̃w nyɔw a ala fʋ na tɛrɛ cĩcĩ, a mɩnɛ a nɩrɛ kɔ̃ wa de a fʋ tʋɔfʋ bom wa.

¹²A ʋlɔ na ɩrɛɛ a tʋɔfʋ sʋbɔ, ɩ̃ na maal ʋ na ʋ ɩ a ɩ̃ Naaŋmɩn puor-yir kpɛ̃ɛ luur, ɩ̃ ꞌwaa lɛ be na lɛ yi go wa. Ɩ̃ na sɛbʼã a ɩ̃ Naaŋmɩn yuor a ʋ juu, nɩ a ɩ̃ Naaŋmɩn tẽw yuor na ɩ a Jerujalɛm paalaa, a tẽw ʋlɔ a ɩ̃ Naaŋmɩn na bara ʋ yire a saa juu ɩ̃ suure. Ɩ̃ ɩ̃ na mɩ sɛbʼã a ɩ̃ yo-paalaa a ʋ juu.

¹³“A ʋlɔ na tɛrɛ a tobo wono nɩ, ú bɔ̃w cɛlɛ a ala a Naaŋmɩn Sɩɛ na yele a duo-puorbo.

¹⁴“Sɛb a nɔhɔ̃ tɩɩr kʋ a Lawdise-tẽw *duo-puorbo sɩ-tʋnaa: “A ʋlɔ na ɩ a *Amɛn, na mɩ ɩ a yel-mɩ̃ɛ ƴɛr-man-dẽdẽ nɩ a Yel-mɩ̃ɛ Sʋbɔ, ƴɛrɩ̃sɩ nɩ a asɩmɛ. Ʋ mɩ ɩ na a yele ala a jaa a Naaŋmɩn na mɛ nyɔwfʋ jie.

¹⁵Ɩ̃ bɔ̃w na a fʋ tʋmɔ a jaa. Ɩ bɔ̃w na ka faa ɓãa wa, ɩ̃ ma mɩ tʋlɔ wa. A naa dãa na nʋmɔ ma a ala ɩ fʋ dãa na ɓãa, mɩɩ fʋ dãa na tʋlɔ.

¹⁶Ɩ̃-cɛ a mɩnɛ fʋ na ɩ a ꞌwɔlɔ ꞌwɔlɔ, ɩ̃ ma tʋlɔ wa, ma mɩ lɛ ɓãa wa, ɩ̃ na ti fʋ na bar.

¹⁷Fʋ ma yele na á fʋ le na; á fʋ tɛraa na; á bom kãw ma ɓɔr fʋ wa. Ɩ-cɛ faa bɔ̃w ka fʋ ɩ na nãw sʋbɔ na tɛrɛ won, ɩ nɩ a nɩ-kɔmɔ, tɛrɛ nɩ a salĩɓuor, ɩ̃ mɩ jɔ̃w wa.

¹⁸Ala-ɩ̃-sɔ, ɩ̃ bʋɔrɔ ɩ̃ miil fʋ a fʋ da sɛlmɛ ba na cɔɔrɩ̃ bar a vũu pʋɔ a ɩ̃ jie, a mɩnɛ a fʋ na tʋɔ le. A fʋ na mɩ da cẽcẽ-pɛlɛ na tʋɔ su pɔw a fʋ vĩ salĩɓuor, mɩ da nɩ mimie tɩ̃ɩ, ƴɔ̃w a fʋ mimie pʋɔ na tʋɔ nyɛrɛ.

¹⁹Ɩ̃ ma galʼã ɩ̃ mɩ kpãa a bala ba jaa ɩ̃ na nʋnɔ. Ala-ɩ̃-sɔ ƴɔ̃w kpɛ̃w ɩ̃ lɩɛb a fʋ yɛ̃.

²⁰Nyɛ, ɩ̃ ɩraa na a dɔ̃dɔr nʋɔr ŋmeere a pan. A ʋlɔ na wõ a ɩ̃ kɔkɩr ɩ̃ yuo a pan, ɩ̃ na kpɛ na a ʋ jie, a ʋlɔ nɩ a maa a sɩ lãa dɩ.

²¹A ʋlɔ na ɩrɛɛ a tʋɔfʋ sʋbɔ ɩ̃ na ƴɔ̃w ʋ na ʋ lãa jɛ nɩ ma a ɩ̃ naa-dakɔw juu, a mɩnɛ ɩ̃ na mɩ dãa pɔw a tʋɔfʋ ɩ̃ mɩ lãa jɛ nɩ a ɩ̃ Sãa a ʋ naa-dakɔw juu.

²²“A ʋlɔ na tɛrɛ a tobo wono nɩ, ú bɔ̃w cɛlɛ a ala a Naaŋmɩn Sɩɛ na yele a duo-puorbo.”