Read Birifor, Malba Miilfʋ Sɛbɛ 4 Bible Online

Miilfʋ Sɛbɛ 4 - Birifor, Malba bible

Miilfʋ Sɛbɛ 4

¹A ala ɩ̃ baar, ɩ̃ ꞌwuorʼã ɩ̃ nyɛ a dɔ̃dɔr nʋɔr ba na yuo bar a saa juu, ɩ̃ a kɔkɩr ʋlɔ ɩ̃ na dãa wõ a korĩ-cɛ yire na ɩl-pɛɛlfʋ kaarɩ̃ yele ma: “Do wa ɩ̃ miil fu a yele ala na sɛw a ta, a lɛ a yele asɩmɛ nɔɔ tɔlɔ baara.”

²A jie naan a Naaŋmɩn Sɩɛ de ma na, ɩ̃ a be a saꞌlon, ɩ̃ nyɛ na naa-dakɔw na jɛ, ɩ̃ a nɩ-sʋbɔ mɩ jɛ a ʋ juu.

³Ɩ̃ nyɛ na a nɩ-sʋbɔ ʋlɔ ʋ wɔ̃ taa nɩ kubi-nyɩ́lɩsɩ ba na buɔlɔ a jasɩpɩ nɩ a sardɔn, ɩ̃ a sa-sʋɔ na wɔ̃ taa nɩ a ɛmɛrɔdɩ na mɩ ɩ a kubi-nyɩlaa kãw dãa viirĩ kolĩ a naa-dakɔw.

⁴Ɩ̃ mɩ nyɛ na a naa-dakɔɔr lɩjɛrʼɩ̃ anaan a ba pɩɛrɩ̃ kolĩ a naa-dakɔw ʋlɔ, ɩ̃ a nɩ-bɛrɛ lɩjɛrʼɩ̃ anaan na su a cẽcẽ-pɛlɛ mɩ kpa nɩ a *sɛlmɛ sapir mɩ jɛ a ana dakɔɔr jur.

⁵A saa-nyɩɩlɩ̃fʋ, a kɔkɩɛ, nɩ a tanfʋ ɩ̃ yire a naa-dakɔw ʋlɔ jie, ɩ̃ a lãpar anuu-nʼayi ꞌlere a ʋna dakɔw par. Ba ɩ na a Naaŋmɩn sɩɩr anuu-nʼayi.

⁶A naa-dakɔw nii-sɔw bom be na be na wɔ̃ taa nɩ man kʋ̃ɔ na ɩ wɩl-wɩl-wɩl, nyɩlɛ a caaraa kaarɩ̃. A yel-mimie anaan na tɛrɛ a mimie a jiir a jaa, a nii-sɔw nɩ a puo-sɔw, ɩ̃ be a naa-dakɔw pulẽe, tiw kolĩ ʋ.

⁷A dãdãw bõ-mimir wɔ̃ na taa nɩ gbeen, ɩ̃ a gbɛɛ ayi subɔ wɔ̃ taa nɩ narale; a gbɛɛ ata subɔ nii-sɔw wɔ̃ taa nɩ nɩrɛ; ɩ̃ a gbɛɛ anaan subɔ wɔ̃ taa nɩ tuu-aaraa.

⁸A bana yel-mimie anaan dãa na tɛrɛ pɩrɛ ayuɔb ba jaa, ɩ̃ a mimie dãa na pɔw ba a jiir a jaa, a pʋ̃ɔ nɩ a yene. A mɔtɔ̃w nɩ a tɩsɔw, ba ma cɩɛrɛ na a yele ma gala wa, yele nɩ: “A Nɩ-kpɛ̃ɛ Naaŋmɩn na ɩ a kpɛ̃w a jaa Subɔ, na ɩ, na dãa ɩ, nɔɔ mɩ waara, ʋ ɩ na cɛcɛ, cɛcɛ, a cɛcɛ.”

⁹A lɛdaar a yel-mimie bala na ma puoro a ʋlɔ na be a be a daar a jaa, na jɛ a naa-dakɔw juu, kʋrɔ nɩ ʋ a yo-yifʋ, nɩ a ju-kpɛ̃ɛ,

¹⁰a nɩ-bɛrɛ lɩjɛrʼɩ̃ anaan bala ma mɩ gbure na a dume a ʋlɔ na jɛ a naa-dakɔw juu nii-sɔw, ɩ̃ pɛwrɛ a ʋlɔ na be a be a daar a jaa. Ba ma binʼã a ba sɛlmɛ sapir a naa-dakɔw nii-sɔw ɩ̃ yele:

¹¹“A sɩ Nɩ-kpɛ̃ɛ nɩ a sɩ Naaŋmɩn, fu sɛw na a ba na maal a fu yuor ʋ yire, kʋrɔ nɩ fu a ju-kpɛ̃ɛ, nɩ a kpɛ̃w, a-na-ɩ a fʋ̃u ir a yele a jaa. A yi na a fu pʋ-tɩɛrʋ̃ pʋɔ a fu ir ba.”