Read Birifor, Malba Miilfʋ Sɛbɛ 6 Bible Online

Miilfʋ Sɛbɛ 6 - Birifor, Malba bible

Miilfʋ Sɛbɛ 6

¹A ala ɩ̃ baar, ɩ̃ lɛ nyɛ na a Péle ʋ ka a jɩbsɩ anuu-nʼayi ala bõ-dãdãw, ɩ̃ ɩ̃ wõ a yel-mimie bala kãw kɔkɩr na yi a saa tanfʋ kɔkɩr kaarɩ̃ na yel: “Wa!”

²Ɩ̃ ꞌwuor ɩ̃ nyɛ a wi-pɩlaa, ɩ̃ a ʋlɔ na do ʋ ʋ gbã a tam, ɩ̃ a ba kʋ ʋ *sɛlmɛ sapi. A tʋɔfʋ sʋbɔ ʋ ɩ, ɩ̃ lɛ yi cen a tʋɔfʋ ɩnɛ.

³A mɩnɛ a Péle na ka a gbɛɛ ayi jɩbaa, ɩ̃ wõ na a yel-mimie ayi sʋbɔ ʋ yel: “Wa!”

⁴Ɩ̃ a wi-jɩ̃ɛw kãw yi na, ɩ̃ a ʋlɔ na do ʋ, ba kʋ ʋ na sɔr ʋ na maal a tẽw ʋ jaa ʋ be a jɛb pʋɔ, a mɩnɛ a nɩbɛ na tʋɔ kúrɔ taa. Ɩ̃ a ba kʋ ʋ a sɔ-bãjɩn-kpɛ̃ɛ.

⁵A mɩnɛ a Péle na ka a gbɛɛ ata jɩbaa, ɩ̃ wõ na a yel-mimie ata sʋbɔ ʋ yel: “Wa!” Ɩ̃ ꞌwuor ɩ̃ nyɛ a wi-salaa, ɩ̃ a ʋlɔ na do ʋ tɛrɛ na bõ-mɩɩnaa a nuumɩ.

⁶Ɩ̃ wõ na kɔkɩr kãw a wɔ̃ taa nɩ a yel-mimie bala anaan sɔ̃w ʋ yi, na yele: “Ci bõ-mɩɩnaa nɔ-bõ-ƴen a ɩ a bibir bõ-ƴen tʋn yar. Kpĩci bõ-mɩɩnaa nɔɛ ata a mɩ ɩ a bibir bõ-ƴen tʋn yar. Ɩ̃-cɛ taa wa sãwna a kãa nɩ a dãa ʋlɔ wa!”

⁷A mɩnɛ ʋ na ka a gbɛɛ anaan jɩbaa, ɩ̃ wõ na a yel-mimie anaan sʋbɔ ʋ yel: “Wa!”

⁸Ɩ̃ ꞌwuor ɩ̃ nyɛ a wi-ꞌwɔlɔnɔ. A ʋlɔ na do ʋ yuor dɩ na a Kũu, ɩ̃ a ʋlɔ na tuure ʋ ɩ na a Kpɩɩn tẽw. Ba kʋ ba na sɔr a ba na de a sɔ-bãjɩnɛ, nɩ a kɔ̃-kpɛ̃ɛ, a wʋlɩ̃ nɩ a tẽw wɛ-dʋn, kʋrɔ nɩ a nɩbɛ a ji-bõ-ƴen a tẽw jiir anaan pʋɔ.

⁹A mɩnɛ ʋ na ka a gbɛɛ anuu jɩbaa, ɩ̃ nyɛ na a nɩbɛ bala ba na kú sɩɩr a baar lofʋ jie pulẽe, a bala ba na dãa kú a Naaŋmɩn ƴɛrɩ̃ ƴɛrfʋ nɩ a ba yel-mɩ̃ɛ manfʋ ɩnɛ,

¹⁰a ba wuure nɩ kɔkɩr kpɛn yele nɩ: “Nɩ-kpɛ̃ɛ na ɩ a cɛcɛ nɩ a Yel-mɩ̃ɛ Subɔ, wa ta nɩ dabor fʋ na bar, ma guoro a sɩ ƴɛrɩ̃, yaara a sɩ kũu san a tẽw pʋɔ nɩbɛ jie wa?”

¹¹Ba kʋ ba na cẽcẽ-pɛlɛ ba jaa bõ-ƴene-ƴene, ɩ̃ yel ba a ba lɛ cãa nyɔw suur fɩ̃ɩ, wa ta nɩ a lɛdaar ba na kúrɔ a ba yɛɛr nɩ a ba lãa-tʋnbɔ a ba kaarɩ̃ baara.

¹²Ɩ̃ ɩ̃ lɛ nyɛ na a mɩnɛ a Péle na ka a gbɛɛ ayʋɔb jɩbaa, a tẽw ɓĩi na nɩ fãgã, a mɔtɔ̃w lɩɛb ɩ bõ-salaa wɔ̃ taa nɩ cẽcen salaa lukpuru, ɩ̃ a cuu ʋ jaa lɩɛb mʋ̃ɔ jɩ̃ɩ kaarɩ̃,

¹³a ŋmarbie yi a saꞌlon ɩ̃ so lo a tene wɔ̃ taa nɩ kãkama wɔ̃-kara a sɛsɛb kpɛ̃ɛ na fu a so lo.

¹⁴A saꞌlon nyɩ na wɔ̃ sɛbɛ ba na pile, ɩ̃ a tan a jaa, nɩ a ten a jaa a kʋ̃ɔ na jilĩ kolĩ viirʼã cen na lo ji-kpee.

¹⁵Ɩ a tẽw pʋɔ jamansɩ, a tẽw nɩ-bɛrɛ, a fãgã deme, a naabsɩ, a gãdar, a bala na ɩ a gbãgbaar, nɩ a bala na sɔ a ba mɩ̃ɛ ba jaa, jɔ na sɔɔlɩ̃ a bɔɔr kpolsɩ pʋɔ, nɩ a tan kʋsɩɛ bɔɔr pʋɔ,

¹⁶ɩ̃ yele a tan nɩ a kʋsɩpana: “Nyɩ́ lo pɔw sɩ, piw sɩ tɛɛlɛ, a sɩ kɔ̃ nyɛ a ʋlɔ na jɛ a naa-dakɔw juu, ɩ̃ a mɩnɛ a Naaŋmɩn Péle su-tuo kɔ̃ pɔw sɩ wa

¹⁷A-na-ɩ a ba su-tuo bibir kpɛ̃ɛ ta na. Ala na tʋɔ ɩraa a ba nii-sɔw?”