Read Birifor, Malba Miilfʋ Sɛbɛ 7 Bible Online

Miilfʋ Sɛbɛ 7 - Birifor, Malba bible

Miilfʋ Sɛbɛ 7

¹A ala ɩ̃ baar, ɩ̃ nyɛ na a sɩ-tʋnɩsɩ anaan na ɩraa a tẽw jiir anaan, ɩ̃ nyɔw a jiir ala anaan sɛsɛb tɛɛlɛ, a mɩnɛ a sɛsɛb bir kɔ̃ fu ka a tẽw juu, nɩ a man juu, mɩɩ a tɩ-bõ-ƴen juu wa.

²Ɩ̃ ɩ̃ nyɛ na a sɩ-tʋnaa ƴen sʋbɔ ʋ yi a tẽw parɩ̃ ɩ̃ tɛrɛ a Naaŋmɩn-mimir jɩbaa waara nɩ. Ɩ̃ ʋ wuurʼã nɩ kɔkɩr kpɛ̃w yele nɩ a sɩ-tʋnɩsɩ anaan bala ba na kʋ a sɔr a ba na sãw a tẽw nɩ a man bar:

³“Nyɩ taa maal a tẽw nɩ a man, nɩ a tɩɩr bom sɛr wa, ɩ̃-cɛ nyɩ́ bar wa ta nɩ a lɛdaar sɩ na ƴɔnɔ a Naaŋmɩn tʋ̃tʋnbɔ a jɩbsɩ a ba dibe pʋɔ baara.”

⁴Ɩ̃ ɩ̃ wõ na a bala ba na ƴɔ̃w a jɩbsɩ a dibe pʋɔ nʋɔr. Ba ɩ na ture ture kʋbaa lɩjaayi nʼanaan, na yi a *Ɩsɩrayɛl nɩbɛ bal bʋrɔ bʋrɔ a jaa pʋɔ.

⁵A Juda bal pʋɔ, a bala ba na ƴɔ̃w ɩ na nɩbɛ ture pie-nʼayi; a Urubɛ̃ bal pʋɔ, ba ɩ na nɩbɛ ture pie-nʼayi; a Gadɩ bal pʋɔ, nɩbɛ ture pie-nʼayi; a Asɛɛr bal pʋɔ, nɩbɛ ture pie-nʼayi; a Nɛbtalɩ bal pʋɔ, nɩbɛ ture pie-nʼayi, a Manase bal pʋɔ, nɩbɛ ture pie-nʼayi; a Sɩmẽw bal pʋɔ, nɩbɛ ture pie-nʼayi; a *Levi bal pʋɔ, nɩbɛ ture pie-nʼayi; a Ɩsakaar bal pʋɔ, nɩbɛ ture pie-nʼayi; a Jabʋlɔ̃ bal pʋɔ, nɩbɛ ture pie-nʼayi; a Jojɛfʋ bal pʋɔ, nɩbɛ ture pie-nʼayi; a Bɛ̃jamɛ bal pʋɔ, nɩbɛ ture pie-nʼayi mɩ.

⁹A ala ɩ̃ baar, ɩ̃ ꞌwuorʼã ɩ̃ nyɛ nɩ-yayaw, nɩrɛ na ma tʋɔrɔ sɔrɔ wa. Ba yi na a ten a jaa, nɩ a bal-bʋrɔ bʋrɔ, a nɩ-bʋrɔ bʋrɔ, nɩ a ƴɛr-bʋrɔ bʋrɔ a jaa pʋɔ, ɩ̃ ɩraa a naa-dakɔw nɩ a Naaŋmɩn Péle nii-sɔw, su nɩ a cẽcẽ-pɛlɛ, tɛrɛ nɩ a pã-bie tɩɛ vɛɛ a nuu pʋɔ.

¹⁰Ba wuure na nɩ kɔkɩr kpɛ̃w yele nɩ: “A faafʋ yi na a sɩ Naaŋmɩn ʋlɔ na jɛ a naa-dakɔw juu, nɩ a Naaŋmɩn Péle jie mɩ.”

¹¹A sɩ-tʋnɩsɩ ba jaa ɩraa na pɩɛrɩ̃ kolĩ a naa-dakɔw, nɩ a nɩ-bɛrɛ, nɩ a yel-mimie anaan bala, ɩ̃ gã pɔw a nii-sɔw a tene a naa-dakɔw nii-sɔw, pɛwrɛ a Naaŋmɩn,

¹²yele nɩ a, “*Amɛn! A Naaŋmɩn sɔ a pɛwfʋ, a yo-yifʋ, a kpaarfʋ, a puorfʋ, a ju-kpɛ̃ɛ, a fãgã nɩ a kpɛ̃w a daar a jaa! Amɛn.”

¹³A nɩ-bɛrɛ bala bõ-ƴen soor ma: “A nɩ-babõ nɩ a basɩmɛ na su a cẽcẽ-pɛlɛ, ɩ̃ nyɩnɛ ba yi?”

¹⁴Ɩ̃ yel ʋ: “Nɩ-kpɛ̃ɛ, fʋ̃ʋ ɩ̃ bɔ̃w.” Ʋ yel ma: “Ba ɩ na a bala na yi a hʋʋr pʋɔ, ɩ̃ pɛw a ba cẽcene, ɩ̃ maal ba a ba pɛlɩ̃ a Naaŋmɩn Péle jɩ̃ɩ pʋɔ.

¹⁵Ala-ɩ̃-sɔ a ba ɩraa a Naaŋmɩn naa-dakɔw nii-sɔw, tʋnɔ a ʋ tʋmɔ a mɔtɔ̃w nɩ a tɩsɔw a be a maa Naaŋmɩn puor-yir kpɛ̃ɛ pɔʋ ʋ yir pʋɔ, ɩ̃ a ʋlɔ na jɛ a naa-dakɔw juu mɩ̃ɛ na piw ba na tɛɛlɛ.

¹⁶A kɔ̃ nɩ a kʋ̃ɔ-nyuur ma lɔɔ nyɔwrɔ ba go wa. Mɔtɔ̃w ma lɔɔ wono ba wa. Susuur ma mɩ lɔɔ kʋrɔ ba wa.

¹⁷A-na-ɩ a Naaŋmɩn Péle ʋlɔ na be a naa-dakɔw pulẽe na lɩɛbʼã ɩ a ba dɔ-cɩɩnaa, cere nɩ a kʋ̃ɔ bunaa jie, ɩ̃ a Naaŋmɩn na fɛ na a ba mɔtɔ̃-kʋ̃ɔ bar a ba mimie pʋɔ.”