Read Birifor, Malba Miilfʋ Sɛbɛ 8 Bible Online

Miilfʋ Sɛbɛ 8 - Birifor, Malba bible

Miilfʋ Sɛbɛ 8

¹A lɛdaar a Péle na ka a gbɛɛ anuu-nʼayi jɩbaa, a saa juu deme ŋma na vʋʋrʋ̃ wa ta nɩ daar fɩ̃ɩ pʋɔ.

²Ɩ̃ nyɛ na a sɩ-tʋnɩsɩ anuu-nʼayi na ɩraa a Naaŋmɩn nii-sɔw, a ba kʋ ba ɩlɛ anuu-nʼayi.

³Ɩ̃ a sɩ-tʋnaa ƴen sʋbɔ wa na ɩraa a baar lofʋ jie nii-sɔw, tɛrɛ a *tɩ̃ɩ-nyu-vɩlaa sɛlmɛ laa, ɩ̃ ba kʋ ʋ na tɩ̃ɩ-nyu-vɩlaa yaw ʋ na de lãw nɩ a Naaŋmɩn deme ba jaa sʋɔrfʋ tɩɩr kʋrɔ a Naaŋmɩn a baar lofʋ jie ʋlɔ na be a naa-dakɔw nii-sɔw.

⁴A tɩ̃ɩ-nyu-vɩlaa jʋʋr, nɩ a Naaŋmɩn deme sʋɔrfʋ yi na a sɩ-tʋnaa nuu pʋɔ, ɩ̃ duoro a Naaŋmɩn nii-sɔw.

⁵Ɩ̃ a sɩ-tʋnaa de na a sɛlmɛ laa ʋlɔ, sɛw nɩ a baar lofʋ jie vũu, ɩ̃ gbã ʋ bar a tẽw juu, a saa tana nyɩɩlɛ nɩ, a gɔ̃-pɔɔr yire, ɩ̃ a tẽw mɩ ɓĩi.

⁶A bana sɩ-tʋnɩsɩ anuu-nʼayi na tɛrɛ a ɩlɛ gbɛɛrɩ̃ na a ba pɛɛlfʋ.

⁷A dãdãw sʋbɔ pɛɛlʼã a ʋ ɩl, ɩ̃ a ba lɔb sa-kubie nɩ vũu na nyanyaa nɩ jɩ̃ɩ, a lo pɔw a tene, ɩ̃ a vũu wɛlʼã a tẽw ji-bõ-ƴen jiir ata pʋɔ bar, ɩ̃ mɩ dɩ a tẽw tɩɩr ji-bõ-ƴen jiir ata pʋɔ, ɩ̃ mɩ dɩ a mɔ-ɓaara a jaa.

⁸A gbɛɛ ayi sɩ-tʋnaa pɛɛlʼã a ʋ ɩl, ɩ̃ a ba lɔb bom kãw na wɔ̃ taa nɩ a tã-kpɛ̃ɛ na nyɔw vũu, ʋ yi a be ɩ̃ lo a man pʋɔ, ɩ̃ a man ji-bõ-ƴen jiir ata pʋɔ lɩɛb ɩ a jɩ̃ɩ,

⁹a man pʋɔ yel-mimie ji-bõ-ƴen jiir ata pʋɔ kpi, ɩ̃ a gbor-bɛrɛ ji-bõ-ƴen jiir ata pʋɔ wɛ.

¹⁰A gbɛɛ ata sɩ-tʋnaa pɛɛlʼã a ʋ ɩl, ɩ̃ a ŋmarbir kpɛ̃ɛ a vũu na dɩrɛ lãpa kaarɩ̃ yi na a saꞌlon ɩ̃ lo. Ʋ lo na a mana ji-bõ-ƴen jiir ata pʋɔ juu, nɩ a kʋ̃ɔ bunisɩ jiir.

¹¹A ʋna ŋmarbir dɩ na a Bõ-tuo. A kʋ̃ɔ ji-bõ-ƴen jiir ata lɩɛbʼã tomo, ɩ̃ nɩ-yaw kpi na a-na-ɩ ba nyu na a ʋna kʋ̃ɔ tuo.

¹²A gbɛɛ anaan sɩ-tʋnaa pɛɛlʼã a ʋ ɩl, ɩ̃ ba ŋme na a mɔtɔ̃w ji-bõ-ƴen jiir ata, nɩ a cuu ji-bõ-ƴen jiir ata, nɩ a ŋmarbie ji-bõ-ƴen jiir ata, a mɩnɛ a ba caarɩ̃fʋ ji-bõ-ƴen jiir ata na sãw. Ɩ a bibir cãa ŋmaa na ji-bõ-ƴen jiir ata pʋɔ, ɩ̃ a tɩsɔw cãa mɩ ŋmaa a lɛ.

¹³Ɩ̃ lɛ ꞌwuorʼã ɩ̃ wõ a kɔkɩr na yi a tuu jie na aw do a saꞌlon iin na yele nɩ kpɛ̃w: “Nabier, nabier, nabier na ta na a tẽw nɩbɛ jie, a lɛdaar a sɩ-tʋnɩsɩ bala ata na cɛ nɔɔ pɛɛlɛ a ba ɩlɛ.”