Read Birifor, Malba Miilfʋ Sɛbɛ 9 Bible Online

Miilfʋ Sɛbɛ 9 - Birifor, Malba bible

Miilfʋ Sɛbɛ 9

¹Ɩ̃ a gbɛɛ anuu sɩ-tʋnaa pɛɛlʼã a ʋ ɩl, ɩ̃ ɩ̃ nyɛ ŋmarbir na dãa yi a saꞌlon ɩ̃ lo, a ba kʋ ʋ a bɔw ʋlɔ na ma tɛrɛ bɛwfʋ wa nakili.

²A ŋmarbir ʋlɔ yuo na a ʋna bɔw na ma tɛrɛ bɛwfʋ wa, a jʋʋr yi a be wɔ̃ taa nɩ vũu kpɛ̃ɛ jʋʋr. A ʋna jʋʋr na yi a bɔw pʋɔ maalʼã a mɔtɔ̃w nɩ a wɩɛr a liw.

³A tosobo yi na a ʋna jʋʋr pʋɔ yɛr pɔw a tẽw, ɩ̃ ba kʋ ba na fãgã a ba tɛbɛ nɩ a nɩbɛ a tẽw na pʋɔ lan kaarɩ̃.

⁴Ɩ̃ ba yel ba na a ba taa wa maala a mʋ̃ɔ, mɩɩ tɩɛ kãw, mɩɩ bõ-bulaa kãw bom wa. Ɩ̃-cɛ a ba maala a bier a nɩbɛ bala tɛw na ma tɛrɛ a Naaŋmɩn jɩbaa a ba diir pʋɔ wa.

⁵Ba kʋ ba na sɔr a ba na kpow ba maalʼɩ̃ cur anuu, ɩ̃-cɛ a ba taa wa kúrɔ ba wa. A ba kpowfʋ ꞌwɔbfʋ wɔ̃ na taa nɩ a mɩnɛ a lãw na ma tɛ nɩrɛ.

⁶A ana cur anuu naa pʋɔ, a nɩbɛ na bʋɔrɔ na ba kpi, ɩ̃-cɛ ba kɔ̃ tʋɔ kpi wa. Ba na tɩɩ na bʋɔrɔ ba kpi, ɩ̃-cɛ a kũu na jɔ na jãa nɩ ba.

⁷Ɩ̃ nyɛ na a tosobo bala a ba wɔ̃ taa nɩ wibe ba na gbɛɛrɩ̃ a jɛb jie cenfʋ ɩnɛ. Ba kpa na a yele a sɛlmɛ sapir kaarɩ̃ a ba jurɩ̃, ɩ̃ a ba nii-sɔw wɔ̃ taa nɩ nɩrɛ nii-sɔw.

⁸A ba jukɔbɔ womo na a pɔw jukɔbɔ kaarɩ̃, ɩ̃ a ba nyɩmɛ wɔ̃ taa nɩ gbeensɩ nyɩmɛ.

⁹Ba piw na a ba nyãa nɩ a gan kpoor na ɩ kur, ɩ̃ a ba pɩrɛ damfʋ wɔ̃ taa nɩ a jɛb-kaarsɩ a wi-yaw na tawra jɔrɔ cere nɩ a jɛb jie.

¹⁰Ba tɛrɛ na jʋ̃ɛ ɓɩɓɩl, lãw kaarɩ̃, ɩ̃ a ba jʋ̃ɛ saa a ba tɛrɛ a fãgã maala nɩ a nɩbɛ a bebe a cur anuu pʋɔ.

¹¹Ba tɛrɛ na a bɔw ʋlɔ na ma tɛrɛ a bɛwfʋ wa sɩ-tʋnaa, ʋ ɩ a ba jamana. A ʋ yuor nɩ a Eburo ƴɛrɩ̃ dɩ na Abadɔ̃, ɩ̃ a Gɩrɛkɩ ƴɛrɩ̃ ʋ dɩ na Apɔlɩyɔ̃. A par ɩ na, Wɛwɛlɛ.

¹²A dãdãw nabier baarʼã; a nabebe ayi lɛ cãa na be puo-sɔw waara.

¹³Ɩ̃ a gbɛɛ ayuɔb sɩ-tʋnaa pɛɛlʼã a ʋ ɩl. Ɩ̃ wõ na a kɔkɩr na yi a baar lofʋ jie lõbobo anaan. A ʋna baar lofʋ jie, ba maalʼɩ̃ ʋ na a sɛlmɛ, ʋ ɩraa a Naaŋmɩn nii-sɔw.

¹⁴A kɔkɩr ʋlɔ yelʼã a gbɛɛ ayʋɔb sɩ-tʋnaa na tɛrɛ a ɩl: “ꞌLor a sɩ-tʋnɩsɩ anaan bala bar, ba na lũ a be a ɛfɩratɩ kʋl-kpɛ̃ɛ nʋɔr.”

¹⁵Ɩ̃ ba ꞌlorʼã a bana sɩ-tʋnɩsɩ anaan bar, ba na dãa gbɛɛrɩ̃ a daarʼãa ɩnɛ, nɩ a bibirʼãa ɩnɛ, nɩ a cuu naa ɩnɛ, nɩ a yuon naa ɩnɛ, a ba na kú a tẽw pʋɔ nɩbɛ ji-bõ-ƴen jiir ata pʋɔ bar.

¹⁶Ba sɔrʼã a sɔdaalsɩ bala na do a wibe nʋɔr kʋ ma. Ba ɩ na tur kpɛ̃ɛ kʋbaa gbɛɛ kɔɔr ayi.

¹⁷Nyɛ a mɩnɛ ɩ̃ na dãa nyɛ a bana wibe nɩ a bala na do jɛ a ba jur a ɩ̃ sɩɛ bõ-miilaa pʋɔ. A bala na do jɛ tɛrɛ na a nyã-piwrsɩ; a ŋmɛɛ mʋ̃ɔ, vũu kaarɩ̃, a ŋmɛɛ ɩ bʋlɔ, ɩ̃ a ŋmɛɛ ɩ bõ-dʋɔr a kʋsɩ-ꞌlerisɩ kaarɩ̃. A wibe jur wɔ̃ na taa nɩ gbeensɩ jur, ɩ̃ vũu, nɩ jʋʋr, nɩ kʋsɩ-ꞌlerisɩ ɩ̃ yire a ba nɔɛ pʋɔ.

¹⁸A vũu, a jʋʋr, nɩ a kʋsɩ-ꞌlerisɩ ala ata na dãa yi a wibe nɔɛ pʋɔ kú na a nɩbɛ ji-bõ-ƴen jiir ata pʋɔ.

¹⁹A-na-ɩ a wibe fãgã be na a ba nɔɛ pʋɔ nɩ a ba jʋ̃ɛ pʋɔ mɩ. A ba jʋ̃ɛ wɔ̃ taa nɩ wiir na tɛrɛ a jur ba na ma de maalʼɩ̃ a nɩbɛ a bier.

²⁰Ɩ̃ a bana nɩbɛ a ana jãjĩ-yele na ma kú wa, na cɛ, ma sɔw bar a ba naaŋmɩnsɩ ba na maalʼɩ̃ a ba nur wa. Ba cãa na puoro a kɔ̃tɔnsɩ, nɩ a ba bʋtɩbɛ ba na maalʼɩ̃ a sɛlmɛ, nɩ a kur-pɩlaa, a kur-jɩ̃ɛw, a kʋsɩɛ, nɩ a tɩɩr, a ana yele na ma tʋɔrɔ nyɛrɛ wa, ma wono wa, ɩ̃ ma mɩ tʋɔrɔ cere wa.

²¹Baa mɩ sɔw bar a ba nɩ-kúfʋ, nɩ a ba tɩsɔɔlʋ̃ʋ, a ba gã-ta-burbur, mɩɩ a ba jufʋ wa.