Read Boros Dusun Ezra 4 Bible Online

Ezra 4 - Boros Dusun bible

Ezra 4

¹Om korongou no di piro-piro o pisangod do tulun do Yohuda om Binyamin do waalon kawagu di tulun di nokoguli' do mantad id pomogunan di pinananggayan do pisangod i Walai'd Tuhan, i Kinorohingan dot Israil.

²Om ongoi noddi iyolo' solowot di Sorubabil om i piro-piro o boyoon di sinompuruan do sompiiyon om boro-boros nod, “Muhup daa iyahai dokoyu do maal dilo Walai'd sasambayangan. Tu' iyahai nga' miagal i' dokoyu tu' tumuku i' dot id Kinorohingan dokoyu, om papatahak kasai' iyahai do porsombahan di sumbolion dot id dau do mantad poddi pinakaa iyahai di Isarhadon, i raja' dot Asur diri do hiti,” ka diyolo'.

³Nga' boros ka di Sorubabil, om i Yosua, om i piro-piro o boyoon do sinompuruan do sompiiyon do tulun dot Israil dot id diyolo', “A' i' iyahai mokiuhup dokoyu do mamaal diti Walai'd Tuhan, i Kinorohingan dahai. Iyahai noo o mamaal diti do miagal di pinonuhuan di Koris, i raja' do pomogunan do Porsia dot id dahai,” ka.

⁴Om timpuun noddi do popoluhoi do ginawo di tulun do Yohudi i tulun di laid no do poingiyon do hiri'd pomogunan diri, om monompurolosi iyolo' diyolo', om otingkadan i' daa'ndo i waalon diri.

⁵Om sinisipan nogi' diyolo' i piro-piro o pagawai do pomorinta' do pomogunan do Porsia do poningkod di wonsoyon di tulun do Yohudi, do solinaid di Raja' Koris do momorinta' om gisom i' dit i Raja' Darius o raja' do pomogunan do Porsia.

⁶Tontok di koimpuunon do pomorintaan di Raja' Ahaswiros, om ponulis nod surat do monondos diyolo' dot araat i piro-piro o pisangod di tulun do poingiyon do hilo'd Yorusalim om Yohuda.

⁷Om tontok nogi' di pomorintaan di Raja' Artasasta, i Raja' dot Agayo do hilo'd Porsia nga' haro i' o nosiliu do miagal diri. Om ponulis nod surat i Bislam, om i Mitridat, om i Tabiil om i piro-piro o tambalut diyolo'd suwai do kumaa dot id di Raja' Artasasta. Om iri nopo surat diri nga' tinulis dot id suang do boros dot Aram om posolinon diri dot id boros dit osuhutan do tontok di basaon.

⁸Om nakaramit po i Artasasta do surat do pasal do Yorusalim. Iri nopo surat nga' pinokirim di Rohum i gobunor diri om i Simsai i gomponulis do watas om i piro-piro o tambalut diyolo', om i piro-piro o gompomutus om koinsanai di pagawai do suwai di mantad hilo'd Irik, om Babil, om Susan, i hilo'd pomogunan dot Ilam,

¹⁰om i piro-piro o bansa'd suwai di pinoundaliu di Asnapar, it abantug diri. Iyolo' nopo nga' sinuhu' dau do momogun-mogun do hilo'd bandar do Samaria om id piro-piro o bandar do suwai dit id watas dot Iprat di ponong id Kotonobon.

¹¹Iti no o suang di surat diri: “Kumaa id Raja' Artasasta. Mantad id piro-piro susuhuon nu di poingiyon do hiti'd watas dot Iprat Kotonobon. Tumabi' iyahai diya'.

¹²Orohian iyahai do popoilo do Tuan Raja' dot iri nopo i tulun do Yohudi di kuminaa'd hiti, do mantad id watas do suwai di porintaon nu, om poundorong do hiti'd Yorusalim om wonsoyon no kawagu diyolo' i bandar dot araat om obinsaap. Nokotimpuun no iyolo' do momonsoi kawagu di tolig om a' no diyolo' alaid dot opongo.

¹³Oi Tuan Raja', ondung owonsoi kawagu i bandar diri, om opongo do momonsoi i tolig di bandar, om tumingkod nondo i tulun do hiri do mambayar do sukai, om okuri' nondo it aanu do pomorintaan do Tuan Raja'.

¹⁴Om a' i' apatut do piantangan tomod nopo dahai o Raja' dot orugi', tu' osonong i' kopio o winonsoi nu dot id dahai. Om iri no o kapabarasan dahai do

¹⁵sorisidon kopio do mogontong i nokotulis dot id suang do buuk di monusui do pasal do taki-aki do Tuan Raja'. Om oilaan indo do Tuan Raja' do mantad id buuk do pinotulisan diri do bandar nopo do Yorusalim nga' obinsaap do mantad di gulu po, om mamagangau di piro-piro o raja' om i pomorinta' di watas do hilo'. Om osusa' mantad no do momorinta' o tulun do hilo'. Om iri noddi o kinapamaraagan do bandar diri.

¹⁶Om oilaan no dahai, oi Raja', dot ondung owonsoi kawagu i bandar diri om opongo i tolig di bandar om a' ko no koporinta' di watas dot Iprat di ponong id Kotonobon,” ka.

¹⁷Om pokirimo' no di raja' ot isimbar do poingkaa, “Kumaa id di Rohum, i gobunor do watas, om id di Simsai, i gomponulis do watas, om kumaa id piro-piro o tambalut diyolo'd suwai, i poingiyon do hilo'd Samaria, om it id kabandaran do suwai om id watas dot Iprat di ponong id Kotonobon. Tumabi' ngai' oku dokoyu!

¹⁸Iri nopo surat do pinokirim dokoyu dot id doho' om nasalin no om nabasa' dot id doho'.

¹⁹Om nokoponuhu' oku no do monorisid kopio, om noilaan noddi dot iri nopo bandar do Yorusalim nga' obinsaap mantad no do piro-piro o raja' do mantad di gulu po, om iri tulun do songingiyon do hilo' nga' kogumuan no do sumasaap om moninimpuun do kagangahan.

²⁰Nokoumbal i' di gulu po do haro o piro-piro o raja' dit ongokoris do nokopomorinta' do hilo', om nokopomorinta' do koinsanai di watas dot Iprat do ponong id Kotonobon. Om minonimung iyolo' do sukai om i titimungon do dong pomorinta' do mantad id rayat.

²¹Om iyo nopoddi om moro-boros oku no do mogodu ngai' di tulun do momonsoi kawagu di bandar do gisom do haro kawagu o boros ku.

²²Om wonsoyo' no kopio dokoyu'd oruhai iti ponuhuan ku'dti, om kada' dokoyu popioling-olingo', om a' i' agayo o korugian ku!” ka.

²³Om kabasa' poddi i surat do mantad id di Raja' Artasasta dot id di Rohum, om id di Simsai, om id piro-piro o tambalut diyolo' do suwai, om arau-arau ngai' no iyolo' do minongoi'd hilo'd Yorusalim. Om sansagai tomod no diyolo' i tulun do Yohudi do tumingkod do momonsoi kawagu di bandar.

²⁴Om kotingkadai no do mamaal i Walai'd Sasambayangan dot Agayo, om a' no nosoupan kawagu do gisom di koduwo do toun do pomorintaan di Darius, i raja' do Porsia.