Read Boros Dusun Nehemiah 1 Bible Online

Nehemiah 1 - Boros Dusun bible

Nehemiah 1

¹Iti no o sinusui di Nohomia, i tanak di Hakalia do pasal di nongowonsoi dau. Tontok di tulan do Kislu, i kohopod om duwo do toun do pomorintaan di Artasasta, i raja' do Porsia, om maso ku'd poundorong do hilo'd bandar do Susan, i bandar dot agayo. Iyoho' nopodti om i Nohomia.

²Om rikot no i Hanani, i tobpinai ku do mantad hilo'd Yohuda do miwoyo' do piro-piro o tulun do suwai. Om uhoto' ku no iyolo' ondung poingkuro-kuro no o hilo'd Yorusalim om i tulun do Yohudi di nokoguli' do mantad hilo'd Babil, i pomogunan do pinananggayan do pisangod.

³Om boros ka diyolo' do minomisunud doho', “Iri nopo i tulun di mantad id pomogunan di pinananggayan do pisangod om nokoguli' nod hilo'd pomogunan mantad, nga' oimuri tomod iyolo' tu' ulak-ulakan tomod di bansa'd suwai di songingiyon do hiri'd posorili'. Om iri tolig di bandar do Yorusalim nga' poingraag kasai' po, om i piro-piro o wawayaan nga' a' po nowonsoi do mantad po di numaan tutudai di gulu po,” ka diyolo'.

⁴Om soira' di norongou ngai' ku iri om irikau oku no do mikuwo'd miningihad. Mingihad oku nopoddi do piro-piro o tadau do koloido' om puasa oku. Om sambayang oku no dot id Kinorohingan do poingkaa,

⁵“Oi Tuhan, i Kinorohingan do momorinta do surga. Iya' no o Kinorohingan dit agayo om rumikot iyahai dot id toguang nu do mikuwo'd ooris. Osianan kasai' ko i' om bayaanon nu i batos nu dot id tulun dit osianan diya' om i mumboyo' di ponuhuan nu.

⁶Antangai oku no, oi Tuhan, om pokinongoho' no o sambayang ku di polombuson ku dot id diya' do tadau om totuong do bagi' do tulun dot Israil, i susuhuon nu. Okunon ku no do nokopomonsoi iyahai'd dusa, iyahai i tulun dot Israil; om i taki-aki ku om iyoho' nogi' nga' nokopomonsoi id dusa.

⁷Suminaap iyahai diya', om tuminolibamban iyahai di pinonuhuan nu. A' dahai natanud it oturan di pinatahak nu dahai di pinolombus di Musa, i susuhuon nu.

⁸Oi Tuhan, soroho' no i boros nu di pinonuhuan nu di Musa do popoboros dot ondung a' iyahai, i tulun dot Israil, otorodok dot id diya' om pogitongkiad-kiadon nu nondo iyahai dot id pogialatan do bansa'd suwai.

⁹Nga' ondung gumuli' iyahai kawagu dot id diya' om momonsoi di pinonuhuan nu om timungon nu i' kawagu iyahai do mulong piya do nokopogitongkiad-kiad no iyahai do hilo'd tisan do tana'. Om pogulion nu i' iyahai do hiri'd kinoiyonon di nopili' nu dot iyonon dahai do sumambayang dot id diya'.

¹⁰Oi Tuhan, iyahai nopodti om susuhuon nu om tulun di diya'd songonuon. Om pinasi nu iyahai dot i kuasa' nu dit agayo om i kokoriso' nu o pinamasi nu dahai.

¹¹Om baino'dti om pokinongoho' no o sambayang ku om sambayang do koinsanai di susuhuon nu'd suwai dit orohian do momusou diya'. Tulungo' oku no om osianan i' doho' i raja' do baino',” kangku. Tu' maso nopoddi nga' monininggarung oku do tinumon di raja'.