Read Boros Dusun Nehemiah 8 Bible Online

Nehemiah 8 - Boros Dusun bible

Nehemiah 8

¹Tontok di tulan do koturu' om nongkoundorong ngai' noddi i tulun dot Israil do hiri'd bandar diyolo'. Om tontok di tadau do koiso' do tulan diri om timung ngai' no iyolo' do hilo'd Yorusalim do hiri'd natad dit otimbabaan di wawayaan di roitan do Wawayaan do Waig. Om suhuo' no diyolo' i Isra, it oilo kopio do Tourat di pinatahak do Tuhan dot id tulun dot Israil, i pinolombus di Musa, do mongoi panganu di buuk do Tourat diri.

²Om ngoyo' no di Isra iri om igitai no dau do hiri'd toguang di tulun di songintimung --- i tongokusai, om i tongoondu', om i tangaanak di milo nod mokinongou.

³Om basao' no di Isra i Tourat diri dot id diyolo' do mantad po di kosuabon om gisom do pitangaadau. Om orohian ngai' nopo iyolo' do mokinongou'ddi.

⁴I Isra nopo nga' poingkakat do hiri'd mimbar di papan do winonsoi. Om iri nopo mimbar diri nga' winonsoi do maan do maso'ddi. Om iti ngai' no o tulun di poingkakat do hiri'd dawananan dau: i Matisa, i Sima, i Anaya, i Uria, i Hilkia om i Maasiya. Om iri no i songingkakat do hiri'd dogibangan dau om i Podaya, i Misail, i Malkia, i Hasum, i Hasbadana, i Sakaria om i Mosulam.

⁵Iri nopo mimbar di ningkokoton di Isra nga' asawat i' ko' mantad di tulun dot ogumu' om ongkokito ngai' nopoddi iyolo' dau. Om maha' di noukaban no dau i buuk, om ingkakat ngai' no iyolo'.

⁶Om boros kaddi di Isra, “Royohon no o Tuhan, i Kinorohingan dot Agayo,” ka dau. Om oinsanan nopo i tulun do pinopoinsawat do longon diyolo' om simbar no do poingkaa, “Amin! Amin!” ka. Om otud ngai' no iyolo' do tuminuku' dot id Kinorohingan.

⁷Om hangog noddi iyolo' om ingkakat no do hiri'd kinoiyonon diyolo', om potuduko' noddi di piro-piro o tulun do Liwi i Tourat dot id diyolo'. Iri nopo i tulun do Liwi diri nga': i Yosua, i Bani, i Sorobia, i Yamin, i Akub, i Sabitai, i Hodia, i Maasiya, i Kolita, i Asaria, i Yosabad, i Hanan om i Polaya.

⁸Om pinasalin diyolo' o boros di Tourat do Kinorohingan om pinatarang o komoyon diri do gisom dot osuhutan kopio di tongoulun.

⁹Om soira' di norongou di tulun dot ogumu' do binasa' i Tourat diri, om nongosudu'ddi iyolo' om ihad no iyolo'. Om sunudai noddi di Gobunor Nohomia, om i Isra it Imam it oilo kopio di Tourat diri, om i tulun do Liwi i pinoposuhut di Tourat diri, o koinsanai di tulun do poingkaa, “Tadau nopod baino' om tadau di nokotobilang do maan do don Tuhan, i Kinorohingan toko', om kada' kou nogi' tongob om kada' kou ihad.

¹⁰Nga' uli' kou nogi' do dinondo om moginakan i'. Om bohogian no di taakanon om waig dot anggur dokoyu i tulun dit aiso' o taakanon. Tadau nopod baino' om tadau di nokotobilang do maan do Tuhan toko', om kada' kou tongob. Tu' iri nopo i kaarapadan do patahakon do Tuhan dot id dokoyu om popokoris i' dokoyu,” ka.

¹¹Om ngoyo' noddi di tulun do Liwi insasamadai o koinsanai di tulun om piguli-guli' po diyolo' do popimboros o boros do poingkaa, “Kada' kou tongob do tontok do tadau'dti, i tadau di nokotobilang do maan do don Tuhan,” ka.

¹²Om uli' ngai' noddi i tulun om akan no iyolo' om inum do mikuwo'd ongotood tomod. Om bohogiai no diyolo' i tulun do suwai di taakanon diyolo' tu' nosuhutan no kopio diyolo' o komoyon di binasa' di norongou diyolo'ddi.

¹³Om tadau noddi kawagu om ongoi ngai' no i boyoon do pinuruan do sompiiyon, om it imam, om i tulun do Liwi do hiri'd di Isra do mongoi pinsingilo di ponudukan di Tourat.

¹⁴Om kabantalai no diyolo' do hiri'd Tourat, i pinatahak do Tuhan di pinolombus di Musa, do sinuhu' i tulun dot Israil do miyon dot id kinuhub-kuhub dot oruuhai, do solinaid di Tadau dot Agayo do Kinuhub-Kuhub.

¹⁵Om poboroso' noddi diyolo' dot id tulun dot ogumu' ot iso' o ponuhuan, om potongkopo' no diyolo' iri dot id pointongkop do Yorusalim om hiri'd kabandaran om hiri'd kokompungan. Poingkaa i ponuhuan diri, “Ongoi kou no do hilo'd konuluhanan om manganu do raan do kayu dot aras, om kayu do saitun, om kayu di kitumau, om guas do kurma, om raan di kayu do suwai do maan do wonsoyon do kinuhub-kuhub do tumanud di pinonuhuan di nokotulis do hiri'd buuk do Tourat,” ka.

¹⁶Om ongoi ngai' noddi i tulun panganu do raan di kayu'ddi, om pomonsoi no iyolo' do kinuhub-kuhub do hiri'd sakai di taap do walai diyolo' dit arantai, om hiri'd natad do walai diyolo', om hiri'd natad dit id dotimbabaan di Walai'd Sasambayangan dot Agayo, om hiri'd pogititimungan do tulun dot ogumu', it id toning di wawayaan di roitan do Wawayaan do Waig, om hiri'd pogititimungan do tulun dot ogumu', it id toning di wawayaan di roitan do Wawayaan dot Ipraim.

¹⁷Koinsanai di tulun di nongkoguli' do mantad id pomogunan di pinananggayan do pisangod nga' minomonsoi ngai' nopo do kuhub-kuhub, om iyon noddi iyolo'd hiri. Om diri nogindo do nowonsoi o miagal diri do mantad di poimpasi po i Yosua, i tanak di Nun. Om oinsanan nopo dot ongosimbayan om ongooropod i tulun.

¹⁸Om mantad nopo di tadau do koiso' di tadau do karamayan diri om gisom do norikot i tadau do kolimpupuson om mambasa' kasai' nopo iyolo' do sobohogian di Tourat do Kinorohingan do pointikid do tadau. Om ruminamai iyolo' do solinaid do turu' o tadau, om tontok di kawalu'd tadau om haro'ddi o pinitimungan dot agayo do pongolimpupus di karamayan diri, do tumanud di pinonuhuan do hiri'd Tourat.