Read Boros Dusun Jeremiah 27 Bible Online

Jeremiah 27 - Boros Dusun bible

Jeremiah 27

¹Tontok dit oruhai po o kinosilihan di Sodokia i tanak di Yosia, do raja' do hilo'd Yohuda, om sunudai oku nod Tuhan

²do momonsoi do poku' do kayu o wonsoyon om pongogos nopoddi om kulit di tinali om popokuon nogindo iri dot id liou ku.

³Om sunudai oku noddi do Tuhan, it Osundu Kopio, i Kinorohingan dot Israil do popolombus do boros dau dot id raja' dot Idom, om Muab, om Amon, om Tirus om Sidon. Om poporomut nopo di boros diri nga' i wakil diyolo' di nokorikot do hilo'd Yorusalim do mongoi solowot di Raja' Sodokia. Om poingkaa o boros do Tuhan diri,

⁵“Winonsoi ku iti pomogunan do mikuwo'd kinoris ku om sinundu ku dit agayo kopio om winonsoi ku nogi' o tulun om koinsanai do nintorusan di poimpasi do hiti'd pomogunan; om milo oku i' do papatahak diri dot id isai nopo i korohian ku'd patahakan.

⁶Iyoho' no, i pinapatahak do koinsanai do bansa' diti dot id suang do kuasa' di susuhuon ku, i Nobukadnisar, i raja' do Babil, om iri piya nintorusan nga' pinatahak ku i' dot id dau.

⁷Oinsanan nopo o bansa' do mininsiriba' dot id dau, om minsiriba' po kawagu iyolo' dot id dau om id manangaki dau do gisom dot orikot i maso do kaalaan di bansa' dau. Om iri nondo i bansa' do Babil o minsiriba' dot id bansa' dit ongokoris om id raja' dit angabantug dot orikot o maso'ddi.

⁸Nga' ondung haro o bansa' ko' pomorintaan dot a' minsiriba' dot id pomorintaan di Nobukadnisar, om hukuman nondo i bansa'ddi do pisangadan, om mononglous, om toruol do gisom id minsiriba' nondo o bansa'ddi dot id dau.

⁹Kada' kou pokinongou di nabi di tuuhoton dokoyu ko' isai nopo i magakun do milo do poposunud dit osiliu dot id dosunsudan dot id nipi ko' momolohou do rusod do tulun do napatai ko' mamakai po do toilaan do bobolian. Mogodu ngai' nopo daa iyolo' dokoyu do minsiriba' dot id raja' do Babil.

¹⁰Mongudut i' iyolo' dokoyu om popotongkiad dokoyu do mantad id pomogunan dokoyu om koongoi kou nondo do hilo'd sodu'. Om uyungon ku iyokoyu om apatai kou nondo.

¹¹Nga' ondung haro o bansa' di minsiriba' om mokiporinta' di raja' do Babil om pologoson ku indo i bansa'ddi do mundorong do hiri'd pomogunan diyolo', om mongumo om momogun-mogun do hiri. Iyoho' no i Tuhan, o minomoros diti,” ka dau.

¹²Om miagal nogiddi o pinoboros ku dot id di Sodokia i raja' do Yohuda, “Insiriba' no dot id raja' do Babil. Umboyo' no dau om i tulun dau om apasi ko i'!

¹³Nokuro tu' uhang nu'd apatai ko om i tulun nu dot id suang do pisangadan om mononglous om toruol? Iri no o nokoboros do Tuhan dot osiliu dot id nunu nopo o bansa' di mada' do minsiriba' dot id raja' do Babil.

¹⁴Kada' pokinongou di nabi di momisunud diya' dot a' minsiriba' dot id dau. Mongudut ngai' i' iyolo' diya'ddi.

¹⁵Tu' Tuhan no o minomoros dot okon i' ko' iyau o pinoporikot diyolo'ddi, om pinoboros nogi' dau do mingudut no iyolo' do tontok di pinoboros diyolo' do momoros iyolo' dot id suang do ngaran do Tuhan. Gowoi pondo om potompiason om patayon ko'd Tuhan do mitonggoi di nabi di minongudut diya', oi Tuan Raja',” kangku.

¹⁶Om sunudai ku noddi it imam om koinsanai di rayat di boros do Tuhan do poingkaa, “Kada' kou pokinongou di nabi di mimboros dot oruhai nod koguli' kawagu i pakakas di hiri'd Walai'd Sasambayangan dot Agayo do mantad hilo'd Babil. Mingudut i' iyolo' dokoyu'ddi.

¹⁷Kada' kou pokinongou diyolo'! Insiriba' kou nogi' kopio dot id raja' do Babil diri, om apasi kou i'! Nokuro nanu' tu' uhang nu'd araag iti bandar?

¹⁸Ondung otopot do nabi kopio iyolo' om monongkuyaan di boros ku om atantu' no do pokionuon i' daa kopio diyolo' doho', iyoho' i Tuhan it Osundu Kopio, dot a' popologos di pakakas di poingopi' do hilo'd Walai'd Sasambayangan dot Agayo om i hiri'd poiyanan dit id walai'd raja', dot atanggayan do hilo'd Babil,” ka dau.

¹⁹(Tontok di tinanggayan di Raja' Nobukadnisar do hilo'd Babil i raja' do Yohuda, i Yoyakin i tanak di Yoyakim, om i boyoon do tulun do hilo'd Yohuda om hilo'd Yorusalim, om a' i' dau tinanggayan i torigi, om i tangki' do tambaga', om i korita'-kuda' om i piro-piro o pakakas di suwai di hiri'd Walai'd Sasambayangan dot Agayo.)

²¹Om boros ka kawagu'd Tuhan, “Pokinongou nod poboroson ku, iyoho' i Tuhan it Osundu Kopio, om i Kinorohingan dot Israil, do pasal di pakakas di noolu' do hiri'd Walai'd Sasambayangan dot Agayo, om i hiri'd poiyanan dit id walai do raja' do Yorusalim.

²²Atanggayan ngai' nopondo iri do hilo'd Babil om hilo-hilo' nori do gisom po do podulon ku kawagu iri. Om pogulion ku nogindo kawagu iri om potondulion ku dot id kinoiyonon diti. Iyoho' no i Tuhan, o minomoros diti,” ka dau.