Read Boros Dusun Amos 1 Bible Online

Amos 1 - Boros Dusun bible

Amos 1

¹Iti no o boros di Amos, i gompomogompi'd dumba' do mantad hilo'd bandar do Tokua. Tontok dit i Usia o raja' do Yohuda, om i Yirobiam i tanak di Yihoas o raja' dot Israil, om pointalango' ngai' nod Kinorohingan o piro-piro hal do pasal dot Israil dot id di Amos, di duwo po o toun dot a' nokorikatan di guminuyu' o tana'. Om tontok noddi do nosiliu i Amos do nabi.

²Boros kad i Amos, “Gumarom o Tuhan do mantad hilo'd Nuluhon do Sion; ongorod i boros dau do mantad hilo'd Yorusalim. Kumoring ngai' nopo i sakot, om rumiou i sakot do hilo'd Nuluhon do Karmol,” ka dau.

³Om boros kad Tuhan, “Miguli-guli' nopod momonsoi'd dusa i tulun do Damsik, om gowoi pondo om hukuman ku no kopio iyolo'. Om pinadalaan tomod diyolo' do monginggorit i tulun do Giliad.

⁴Om porikatan ku nondod tapui i walai'd raja' di winonsoi di Raja' Hasail om uuhon ku do monorob i piro-piro kuta' do pogintirungan di Raja' Binhadad.

⁵Raagon ku nopondo i totobon do bandar do Damsik om uyungon ku i tulun do songingiyon do hilo'd Rantai dot Awon om i pomorinta' do hilo'd Bait-Idon nga' iduwon ku do mantad id tirikohonon dau do don raja'. Om atanggayan nondod pisangod i tulun do Siria do kumaa'd hilo'd pomogunan do Kir,” ka dau.

⁶Om boros kad Tuhan, “Miguli-guli' nopo do momonsoi'd dusa i tulun do Gasa, gowoi pondo om hukuman ku no kopio iyolo'. Om oiyo' nopo diyolo' do minononggoi ot iso' o bansa'd tulun om dagango' no diyolo' do siniliu'd turipon dot id tulun dot Idom.

⁷Om porikatan ku nondod tapui i tolig do bandar do Gasa om osorob ngai' i' i kuta' do pogintirungan.

⁸Uyungon ku nondo i pomorinta' do bandar dot Asdod om Askilon. Hukuman ku nondo i bandar dot Ikron, om iri nopondo i tulun do Pilistin dit oolu-olu' om apatai ngai' no,” ka dau.

⁹Om boros kad Tuhan, “Miguli-guli' nopo do momonsoi'd dusa i tulun do Tirus. Om gowoi pondo om hukuman ku no kopio iyolo'. Tu' minononggoi i' iyolo' dot iso' o bansa'd tulun do pinakaa dot id ponguripanan do hilo'd pomogunan dot Idom, om tinolibambanan diyolo' i pinitoruan do piombolutan di winonsoi diyolo'.

¹⁰Om gowoi pondo om porikatan ku'd tapui i tolig do bandar do Tirus om uuhon ngai' ku do monorob i kuta' do pogintirungan,” ka dau.

¹¹Om boros kad Tuhan, “Miguli-guli' nopo do momonsoi'd dusa i tulun dot Idom, om gowoi pondo om hukuman ku no kopio iyolo'. Sinangod ngai' diyolo' i tobpinai diyolo', iri no i tulun dot Israil, om a' i' diyolo' ninsian-sianan. Aiso' no kopio o kotingkadan do kototogod diyolo', om sisuli' kasai' iyolo'.

¹²Om gowoi pondo om porikatan ku'd tapui i bandar do Toman om tutudan ngai' ku i kuta' do pogintirungan do Bosra,” ka dau.

¹³Om boros kad Tuhan, “Miguli-guli' nopo do momonsoi'd dusa i bansa' dot Amon, om gowoi pondo om hukuman ku no kopio iyolo'. Tontok di minongoi iyolo' sangod do mokimaanu-anu do tana', om iri piya i tongoondu' do monontian do hilo'd Giliad nga' numaan i' diyolo' ulayako' o tian.

¹⁴Om gowoi pondo om porikatan ku'd tapui i tolig do bandar do Raba om uuhon ngai' ku do monorob i kuta' do pogintirungan. Om giniakan pondo ot orongou do tontok diri, om miagal pondod tongus dot opuhod o karangahan di mogisasangod.

¹⁵Om atanggayan nondod kumaa dot id ponguripanan i raja' diyolo' om i boyoon do suwai,” ka dau.