Read Boros Dusun Amos 3 Bible Online

Amos 3 - Boros Dusun bible

Amos 3

¹Oi tulun dot Israil, pokinongoho' no iti boros do Tuhan do pinoboros dau do pasal dokoyu, i bansa' do pinosoliwan dau do mantad hilo'd Masir. Poingkaa o boros dau,

²“Id pogialatan nopo do bansa' do hiti'd pomogunan om iyokoyu no i bansa' dot otutunan ku om i ginompi' kopio ku. Om iri no o kagayo-gayo kopio di dusa dokoyu, om iri o kopomohukuman ku dokoyu,” ka dau.

³Kopitanud toi o duwo o tulun do mamanau ondung a' iyolo' nokopibatos do misolowot?

⁴Mamagarom toi o singa do hilo'd gouton ondung a' po iyau nakaanu'd nintorusan do kanon dau? Minggarom toi o tanak do singa do hiri'd luang dau ondung aiso' po o natabpaan dau?

⁵Kosulung toi o tombolog do lawa' ondung a' pinataan i lawa'? Awakas toi o lawa' ondung aiso' o nokosulung diri?

⁶A' toi kotompurolosi di tulun i torumpit do tanda' do haro o pisangadan do hiri'd bandar? Rumikot toi dot id bandar o kosusaan ondung a' do Tuhan porikoton iri?

⁷A' i' o Tuhan, it Asawat Kopio, momonsoi do nunu nopo dot a' po dau kointalang iri dot id nabi, i susuhuon dau.

⁸Ondung mamagarom o singa, om isai po daa ot a' moddosi? Ondung moro-boros o Tuhan, i Kinorohingan, om isai po daa ot a' popolombus di boros dau?

⁹Poboroson no dot id tulun di songingiyon do hilo'd walai'd raja' do Masir om Asdod o boros do poingkaa, “Timung kou no do hilo'd konuluhanan di posorili' do Samaria om miontong i' di kagangahan dot agayo do hilo' om i karaaton do pingwonsoyon do hilo',” ka.

¹⁰Om boros kad Tuhan, “Ponuon nopodti tulun i walai diyolo' do dapu' dit araat om kororongit o kinoonu-onuan. A' no iyolo' milo do momonsoi dit otulid.

¹¹Om gowoi pondo om ngoyon do pisangod turungkuo' i pomogunan diyolo', om ngoyon panakahai o hiri'd walai diyolo' dit angagayo.

¹²Miagal nopo di gompomogompi' do dumba' tu' ongoduwo po o gakod ko' ongoiso' o tolingo di dumba' dot aanu dau do naakan do singa, om iyo noddi tu' okuri' nondo o tulun do Samaria dot apasi, i songillii daa do toodopon dit ongolomok do dinondo poo,” ka dau.

¹³Boros kad Tuhan it Osundu Kopio, om it Asawat Kopio, “Pokinongou nod dinondo, om poinsanon no i sinakagon di Yakub.

¹⁴Tontok nopo di tadau do hukuman ku ot Israil di dusa diyolo', om raagon ku nondo i pananaraban do porsombahan do hilo'd Baitol. Babakon ngai' ku nopondo i sinangau-sangau do hiri'd sunduk di pananaraban do porsombahan om angaratu' nondo iri do hiri'd tana'.

¹⁵Raagon ngai' ku nopondo i walai do tuundorongon di maso dot osogit om i tuundorongon di maso dot alasu'. Iri piya i walai di linumis do lamai nga' araag i'; araag ngai' nopondo i walai dit angagayo.