Read Boros Dusun Amos 5 Bible Online

Amos 5 - Boros Dusun bible

Amos 5

¹Pokinongoho' no iti sinding do pogihad, oi tulun dot Israil, tu' sindingon ku iti do pogihad ku dokoyu.

²Naratu' no ot Israil i sumandak, a' no iyau kotungag kawagu! Poillii po tomod iyau do hiri'd tana' do tinongkiadan, om aiso' i' o tiso' do mongoi potungag dau.

³Om boros kad Tuhan it Asawat Kopio, “Haro o bandar do hilo'd Israil do minonuhu' do soribu o soudor do mamanau, nga' hatus poo o nokoguli'; om haro no o bandar do suwai do minonuhu' do hatus o soudor do minamanau, nga' hopod po o nokoguli',” ka dau.

⁴Om boros kad Tuhan dot id tulun dot Israil, “Guli' kou no dot id doho', om apasi kou i'.

⁵Kada' kou ongoi sambayang do hilo'd Borsiba. Kada' kou umbal do mogihum doho' do hilo'd Baitol, tu' tumanus i' o Baitol. Kada' kou ongoi do hilo'd Gilgal, tu' atanggayan nondod pisangod i tulun do hilo',” ka dau.

⁶Guli' kou no dot id Tuhan, om apasi kou i'. Ondung a' kou gumuli' dot id dau, om miagal pondo iyau di tapui do monorob do tulun dot Israil. Om sorobon nondo di tapui i tulun do hilo'd Baitol, om aiso' no o songulun piya do kopisok diri.

⁷Obungou kou no, iyokoyu i monomputul dit otulid, iyokoyu i monipu' do tulun, gisom dot a' diyolo' aanu it apatut dot aanu diyolo'!

⁸Tuhan i' o minomonsoi do rombituon do hilo'd tawan, dot i muru-puru om i walatik. Silihon dau do totuong o tanawau, om tanawau no om silihon dau do totuong. Om potuntugon dau do hiti'd katanaan i waig do rahat. Tuhan no o minomonsoi do koinsanai'ddi.

⁹Porikatan dau do karaagan i tulun dot okoris om it intirungon diyolo'.

¹⁰Araatan kou do tulun di sumaap dit a' otulid om i popoboros dot otopot dot id kut.

¹¹Nulak-ulakan dokoyu i tulun do mosikin om pinanakau dokoyu i gandum diyolo'. Om gowoi pondo om a' kou koiyon di walai do watu dit olumis di winonsoi dokoyu, om a' kou koinum di waig dot anggur do mantad id kabun dot anggur dit osonong tomod do tinanom dokoyu.

¹²Oilaan ku no o kogumuo' do dusa dokoyu om kogoyoo' do karaaton do winonsoi dokoyu. Mongulok-ulok kou'd tulun dit ongosonong, om manganu kou di ponisip, om mada' kou dot obutusan dit otulid i tulun do mosikin dot id kut.

¹³Iyo nopo kopio'ddi i wonsoyon dokoyu, om wonsoyon nopo dit osonong kopio dot osorou'd tulun, do maso do miagal kopio'ddi karaat, om a' nopo mungkomi!

¹⁴Tumotos no do momonsoi dit osonong, om kada' pomonsoi dit araat, om apasi kou i'. Om moyo-woyo' nogindo kopio dokoyu o Tuhan it Osundu Kopio, do miagal di popimboroson dokoyu.

¹⁵Karaatai kou no dit araat, om korohiai kou no dit osonong, om wonsoyon no kopio dokoyu it otulid. Tu' nunu o koilo-ilo nga' osianan i' doti' o Tuhan do tulun dot Israil di noolu-olu'.

¹⁶Om boros kad Tuhan, i Kinorohingan dit Osundu Kopio, “Haro nondo o minggiak do mihad dot atatangaban do hilo'd karalan-ralanan do bandar. Iri piya'ndo i gompongumo nga' lohowon i' do mongoi pogihad di tulun di nangapatai do rumuhang di tulun di godsian do mogihad do tulun do napatai.

¹⁷Om haro ngai' nopondo o mihad do hilo'd kokobunan dot anggur. Osiliu ngai' nondo o miagal diti tu' rumikot oku no do mongoi pomohukum dokoyu. Iyoho' no, i Tuhan o minomoros diti,” ka dau.

¹⁸Obungou no i tulun di lumangad do tadau'd Tuhan! Nunu po kopio o guna' do tadau'ddi dot id dokoyu? Tu' id dokoyu nopo om tadau nopoddi om tadau di totuong om okon i' ko' tanawau.

¹⁹Kowoyo-woyoo' nopo do tontok do tadau'ddi om miagal do tulun di manangkus do mogidu' do mantad id singa nga' kobontol indo do bohuang! Ko' miagal pod tulun di muli' no daa do hiri'd walai dau om pakabayon no daa dau di limput o longon dau, nga' otinduk nogid tulanut.

²⁰Iri nopo tadau'd Tuhan om poporikot do totuong om okon i' ko' tanawau. Iri nopondo om tadau do luhung, om aiso' no o tanawau.

²¹Om boros kad Tuhan, “Araatan oku di karamayan dokoyu do tadau'd agayo do don tugama', om sosomuan oku do kokito'ddi.

²²Soira' nopod mongoi kou daa papatahak dot id doho' do porsombahan di sorobon om porsombahan do gandum, om a' ku i' romiton iri. A' ku i' romiton i tayam-tayam di pinolomu' dokoyu do maan do porsombahan do piombolutan do patahakon dot id doho'.

²³Tingkadai dokoyu ino sinding dokoyu dit ohiyo; a' oku i' sirongou dino kecapi dokoyu.

²⁴Nga' osonong nogi' do tumotos kou do momonsoi dit otulid gisom do lumuyung pondo do miagal do waig om momonsoi kou dit otopot do gisom do lumuyung iri do miagal do bawang dit a' insan do rumasak.

²⁵Oi tulun dot Israil, a' oku i' minokianu do porsombahan di sumbolion om porsombahan do nunu nopo do solinaid dit apat nohopod o toun do winoyo' ku iyokoyu do hilo'd tana' do kowotuan.

²⁶Nga' baino' noddi, tu' tumuku' kou dot id Kiwan, i rombituon do ponokokinorohingan dokoyu, om mositi' no dot igitan dokoyu i tingolig diri.

²⁷Pokoyoon ku nondo iyokoyu dot id pomogunan do pisangod, it osodu' po ko' hilo'd Damsik. Iyoho' no, i Tuhan i kingaran do Kinorohingan dit Osundu Kopio, o minomoros diti,” ka dau.