Read Boros Dusun Amos 6 Bible Online

Amos 6 - Boros Dusun bible

Amos 6

¹Obungou kou no, it osimbayan tomod daa o koposi-posion do hilo'd Sion, om iyokoyu it aiso' no o koligagaanan do hilo'd Samaria --- iyokoyu, i tulun dot ongkipangkat do bansa'd Israil, i bansa' dot agayo, i toongoyon do tulun pokiuhupai!

²Ongoi kou no ontong di bandar do Kalni. Om potilombusan o hilo'd Hamat, i bandar dot agayo'ddi om poruhukan do hilo'd bandar do Gat, i bandar do tulun do Pilistin. Poimaha-maha' tuu i piro-piro o bandar diri ko' mantad do pomorintaan do Yohuda om Israil? Agayo toi o diyolo'd watas ko' i dokoyu?

³A' kou daa otumbayaan do rumikot no o tadau do kosusaan, nga' poporuhai nogi' do korikatan do tadau'ddi ino pingwonsoyon dokoyu.

⁴Obungou kou no, i songillatan do hino'd timpohon dokoyu dit ongolumis, om i mangakan do tonsi'd dumba' om sapi' dit ongokoro' po do tontok do moginakan!

⁵Orohian kou do modsinding om ompoton dokoyu iri do kecapi do miagal di koubasanan di Daud.

⁶Om oiyon nopo dokoyu'd monginum o waig dot anggur do mantad id sangkir di poimponu' do waig dot anggur, om momowongi-wongi' kou do tumau dit owongi' kopio, nga' a' kou i' mogihad do karaagan dot Israil.

⁷Om gowoi pondo om iyokoyu o kopogulu dot atanggayan dot id pomogunan do pisangod. Opupusan nondo i pogiginakan om karamayan dokoyu.

⁸Nokoboros nod Tuhan, i Kinorohingan dit Osundu Kopio om it Asawat Kopio, o boros do poingkaa, “Araatan oku di kasawato' do ginawo'd tulun dot Israil; a' tomod oku orohian di walai diyolo' dit angagayo om ongolumis. Om patahakon ngai' ku nondo i bandar diyolo'd agayo om koinsanai dit id suang di bandar diri dot id pisangod,” ka dau.

⁹Ondung haro daa o hopod o tulun do mongoi lisok dot id iso' o walai, om apatai ngai' nopondo iyolo'.

¹⁰Om ngoyon nondo di koobpinayan di tulun do napatai posoliwano' i rata' do mantad hiri'd walai, i koobpinayan dit apatut do momolobong di rata'. Om momolohou nondo i koobpinayan diri dot id isai nopo i tulun do noolu' do hiri'd walai do hiri'd ponong id tolikud, do poingkaa, “Haro po tulun do koruhang nu?” ka. Om haro nondo o sumimbar dot, “Aiso'!” ka. Om moro-boros nondo i koobpinayan diri dot, “Kada' kohiyo! A' to no koino-ino do karait do ngaran do Tuhan,” ka.

¹¹Soira' nopondod koboros o Tuhan do monuhu', om oinsanan nopondo i walai dit angagayo om it ongokoro' dot angaraag.

¹²Milo toi o kuda' do manangkus dot id kaantalaban? Nokoumbal toi o tulun do mamaradu do rahat do sapi' o pamaradu? Nga' sinomputul i' dokoyu it otulid, gisom do nosiliu'ddi iri do kawanit di kapatai.

¹³Oondos tomod kou do naala' dokoyu i bandar do Lodibar. Om mimboros kou do mokirayou-rayou dot, “Okoris toko' i', om osolod toko' i' o bandar do Karnaim,” ka no dokoyu.

¹⁴Om Tuhan no, i Kinorohingan it Asawat Kopio, o moro-boros do poingkaa, “Oi tulun dot Israil, poporikot oku nondod soudor do mantad id iso' o pomogunan do suwai, do mongoi poningolod diti pomogunan dokoyu. Om inggoriton kou nondo diyolo' do mantad pod hilo'd ralan di poingkaa do hilo'd Hamat di ponong id utara om gisom do korikot di Rantai dot Araba do ponong id salatan,” ka dau.