Read Boros Dusun Amos 9 Bible Online

Amos 9 - Boros Dusun bible

Amos 9

¹Om kokito ku o Tuhan do poingkakat do hiri'd toning do pananaraban do porsombahan. Om boros ka dau do minonuhu', “Ngoyo' bobogo' dot opuhod ilo tompok do torigi do Walai'd Sasambayangan dot Agayo om oguyu' ngai' i' i kakilima'. Babakon ngai' no i torigi om pologoson nopo do kootung do tulu di tulun. Om iri nopondo tulun do suwai dit a' apatai om patayon ku no dot id pisangadan. Om aiso' indo o tiso' po diyolo' do kopoggidu'; om aiso' o songulun piya dot apasi.

²Om mulong piya do poukadon diyolo' o wayaan diyolo' do hilo'd pomogunan do tulun do napatai nga' okosupan ku i' iyolo' om mulong piya do mindakod iyolo' do hilo'd tawan, nga' polintuhunon ku i' kawagu iyolo'.

³Om ondung lumisok iyolo' do hilo'd timpak do Nuluhon do Karmol, om ihumon ku i' iyolo', om atangkap ku i' iyolo'. Om ondung lumisok iyolo' do hilo'd nanad do rahat, om suhuon ku indo i naga' di hilo'd rahat do mongokot diyolo'.

⁴Ondung tanggayan iyolo' di pisangod diyolo' dot id pomogunan do pisangod, om monuhu' oku indo di pisangod do mamatai diyolo'. Iso-iso' no kopio o ginawo ku do mamatai diyolo', om a' oku no monulung diyolo',” ka dau.

⁵Kamaon nod Tuhan it Asawat Kopio, om it Osundu Kopio, iti pomogunan, om gumuyu' nopo iti pomogunan; om mihad ngai' nopondo i tulun di poingiyon do hiti. Poingkuro nopo i Bawang do Nil do migayo-pikoro', om iyo noddi iyolo' di minsawat nga' aratu' indo.

⁶Wonsoyon do Tuhan o walai dau do hilo'd tawan, om gisaman dau o tawan do momolingkup diti pomogunan. Om potuntugon dau i waig do rahat do hiti'd katanaan. Om Tuhan no o minomonsoi do koinsanai'ddi.

⁷Om boros kad Tuhan, “Oi tulun dot Israil, piiyoon ku nopo o pamamadul ku dokoyu om i tulun dot Etiopia. Nigitan ku i tulun do Pilistin do mantad hilo'd Krita om nigitan ku i tulun do Siria do mantad hilo'd Kir, do miagal dokoyu tu' nigitan ku do mantad hilo'd Masir.

⁸Iyolo' no o mintong diti pomorintaan do tulun dot Israil, i bansa' do kidusa. Om tonuson ku nondo o bansa'dti do hiti'd pomogunan. Nga' a' ku indo insanan kopio do mamatai i sinakagon di Yakub. Iyoho' no, i Tuhan, it Asawat Kopio o minomoros diti.

⁹Om poboroson ku nondo i ponuhuan ku om atapan ku o tulun dot Israil do miagal do tulun di mangatap do gandum. Om atapan ku nondo iyolo' dot id pogialatan do bansa' do mongidu' dit aiso' o guna'.

¹⁰Om angapatai nondo dot id pisangadan i tulun do kidusa dot id pogialatan di tulun ku om oinsanan o tulun di momoros dot, ‘A' i' bo kopio'd Kinorohingan pologoson do haro o kosusaan do korikot dot id dati',’ ka,” ka dau.

¹¹Om boros kad Tuhan, “Rumikot indo o tadau do tondulion ku o koiyon-iyono' di tulun dot Israil do miagal di maso pod pomorintaan di Raja' Daud. Iyo po daa iyolo'd walai di naraag do dinondo poo. Nga' wonsoyon ku indo kawagu i limput diri, om gisom do miagal di gulu po.

¹²Om ngoyon nondo kawagu di tulun dot Israil onuo' i noolu-olu' do pomogunan dot Idom om koinsanai di bansa' di songonuon ku di gulu po. Iyoho' no i Tuhan, o minomoros diti, om bayaanon ku i' iti,” ka dau.

¹³Boros kad Tuhan, “Rumikot no i tadau, dot okosupan di gandum dit id tohuri tonomo' i gandum di maso dot omot-omoton, gisom dot aiso' nopondo o kotingkadan do mongomot; om okosupan dit anggur dit id tohuri tonomo' it anggur di pagaon no, gisom dot aiso' nopondo kotingkadan do mamaga' do tua'd anggur. Om moninuru' pondo do waig dot anggur dit oomis o hilo'd konuluhanan, om i konulu-nuluan nga' oluyungan ngai' nopondoddi.

¹⁴Pogulion ku nondo kawagu i tulun ku do hilo'd pomogunan diyolo'. Om wonsoyon nondo diyolo' kawagu i bandar diyolo' di nangaraag om iyonon kawagu diyolo'; mananom nondo iyolo'd kabun dot anggur om oinum diyolo' i waig dot anggur diyolo'. Om momukabun nondo iyolo' om aakan diyolo' i tua' di potonomon diyolo'.

¹⁵Poiyonon ku nondo i tulun ku do hilo'd pomogunan di pinatahak ku dot id diyolo', om a' nondo iyolo' ouyung kawagu. Iyoho' no i Tuhan, i Kinorohingan diyolo', o minomoros diti,” ka dau.