Read Boros Dusun Luke 22 Bible Online

Luke 22 - Boros Dusun bible

Luke 22

¹Iri nopo Tadau'd Agayo do Roti dit A' Kipangambang, i roitan do Paska, om oruhai no dot orikot.

²Om maso no di piro-piro o boyoon dot imam om i guru do Tourat do mogihum do ralan do mamatai di Yesus, do lisok-lisokon, tu' moddosi iyolo' di tulun dot ogumu'.

³Om suang noddi o rogon dot id di Yudas, i roitan dot i Iskariot, iyau nopo om songulun do mantad id pogialatan di hopod om duwo di tumatanud di Yesus.

⁴Om ongoi noddi iyau solowot di piro-piro o boyoon dot imam om i boyoon do madtatamong di Walai'd Sasambayangan dot Agayo do mongoi ponokirunding diyolo' ondung poingkukuro o ralan dau do papatahak di Yesus dot id diyolo'.

⁵Om ongotood tomod diri iyolo' do nokorongou'ddi. Om pamatos no iyolo' do manahak di Yudas do tusin.

⁶Om kookunai no di Yudas o miagal diri. Om timpuun noddi iyau do mogihum do maso dot osonong dit a' oilaan do tulun do papatahak di Yesus dot id diyolo'.

⁷Om korikot noddi i Tadau dot Agayo do Roti dit A' Kipangambang. Om tontok noddi o koponumbolian diyolo'd dumba' dot akanon do tontok do Paska.

⁸Om lohowo' noddi di Yesus i Pitrus om i Yohanis, om boro-boros no diyolo'd poingkaa, “Ongoi kou posodia' do taakanon do dong Paska do maan toko'!” ka dau.

⁹Om boros ka diyolo' do minuhot di Yesus, “Hinonggo o korohian nu dot ongoyon dahai posodiaai?” ka.

¹⁰Om boros ka di Yesus do suminimbar, “Tontok do sumuang kou do hilo'd bandar, om haro nondo o songulun o kusai do kiinigit do kakanan do kisuang do waig do mongoi solowot dokoyu. Om tumanud kou nopo dau do kumaa do hiri'd walai di solokoyon dau.

¹¹Om sunudan nondo i sanganu di walai'ddi do poingkaa, ‘Muhot i guru ondung hinonggo o tiyonon dau om i piro-piro o tumatanud dau do mangakan do taakanon do dong Paska?’ kanto dokoyu.

¹²Om potudukon indo di sanganu di walai dot id dokoyu o bilik dot agayo do hiri'd louting, i haro mantad no o konunu-nunuwai. Om posodiawon ngai' no dokoyu i taakanon do hiri,” ka dau.

¹³Om pamanau noddi i Pitrus om i Yohanis, om iyo ngai' nopo di pinoboros di Yesus o nokito diyolo'. Om posodiawo' noddi diyolo' i taakanon do dong Paska do hiri.

¹⁴Om korikot noddi o kapangakanan di taakanon do dong Paska, om torungak no i Yesus di piro-piro o tumatanud dau do makan.

¹⁵Om boro-boros noddi i Yesus diyolo' do poingkaa, “Orohian kopio oku do tumorungak dokoyu'd mangakan do taakanon di dong Paska dot a' oku po oinggorit!

¹⁶Kotumbayaai kou no dot: A' oku no kaakan kawagu do taakanon diti do gisom do kointalang i komoyon diti poginakanan dot id suang di Pomorintaan do Kinorohingan,” ka dau.

¹⁷Om ongoyo' noddi di Yesus i sangkir di kisuang do waig dot anggur, om sambayang no do minongunsikou'd Kinorohingan. Om boro-boros no di piro-piro o tumatanud dau do poingkaa, “Romito' no dokoyu iti sangkir, om minum ngai' kou nodti.

¹⁸Ilaai no dokoyu dot a' oku nondo koinum kawagu do waig dot anggur diti do gisom do korikot i Pomorintaan do Kinorohingan,” ka dau.

¹⁹Om ongoyo' noddi di Yesus i roti, om sambayang no do minongunsikou. Om pogikobing-kobingo' noddi dau i roti'ddi, om potikido' no dau di piro-piro o tumatanud dau. Om boro-boros no diyolo' dot, “Iti no o tinan ku, [i patahakon do bagi' dokoyu. Om wonsoyon no dokoyu o miagal diti do kopomuhandaman doho',” ka dau.

²⁰Om niyo nogiddi dau i sangkir di kisuang do waig dot anggur diri, tu' kaakan poddi iyolo' om potunuyo' no dau i sangkir dot id diyolo', om boro-boros no dot, “Iti no sangkir o tumpongo'd Kinorohingan do wagu, i pinogirot di raha' ku i raha' di potuntugon do bagi' dokoyu],” ka dau.

²¹Boros ka kawagu di Yesus, “Antangai pogi' dokoyu! Nga' hino id hiti i tulun di papadagang doho'!

²²Atantu' no dot apatai nondo i Tanak do Tulun, do miagal di natantu' mantad do Kinorohingan. Nga' obungou no i tulun di papadagang dau!” ka dau.

²³Om mogiuhot-uhot nopoddi iyolo' dot ondung isai ot id pogialatan diyolo' do momonsoi'd miagal diri.

²⁴Om timpuun noddi i piro-piro o tumatanud di Yesus do mogisosongkiwal do pasal dot isai diyolo' ot agayo kopio o ngaran.

²⁵Boros ka di Yesus dot id diyolo', “Iri nopo i piro-piro o raja' do pomogunan, dit a' kotutun do Kinorohingan, om mongulok-ulok iyolo' di rayat, om i piro-piro o pomorinta' nga' roitan dot, ‘Mongintirung do rayat’.

²⁶Nga' iyokoyu nopo om a' i' iyo'ddi, tu' isai nopo it orohian dot agayo o ngaran dot id pogialatan dokoyu, om mositi' nod sumiliu iyau do miagal dit aiso' o ngaran-ngaran, om i boyoon nga' mositi' no do sumiliu do miagal do susuhuon.

²⁷Isai toi ot agayo: i tulun di surungan ko' i modsurung? Atantu' no dot i surungan ot agayo. Nga' iyoho' nopodti dot id pogialatan dokoyu om miagal i' di modsusurung.

²⁸Moyo-woyo' kasai' kou i' doho' dot id suang do koinsanai do kosusaan ku.

²⁹Om onuan ku'ddi iyokoyu do kuasa' do momorinta' do miagal di Tapa' ku tu' minanahak doho' do kuasa' do momorinta'.

³⁰Om kowoyo' kou nondo doho' do makan om minum do hiri'd Pomorintaan ku. Om koirikau kou nondo di hopod om duwo o tirikohonon do don raja' om momorinta' kou di hopod om duwo o payat dot Israil,” ka dau.

³¹Boros ka di Yesus, “Oi Simun, Simun, pokinongou no! Noonuan nod kabanaran i rogon do mongoi pogumbal dokoyu; do miagal di gandum dot atapan gisom dot opisompipi' it osonong om it araat.

³²Nga' nakasambayang oku no do bagi' diya' oi Simun, om a' i' koluhoi o kotumbayaan nu. Om koguli' ko nopondo kawagu dot id doho' om mositi' no do pogiroton ngai' nu o kotumbayaan di tobpinai nu,” ka dau.

³³Om boros ka di Pitrus do suminimbar, “Oi Tuhan, uhang ku i' do korundun piya diya' do kogiil, om tumonggoi diya' do matai',” ka dau.

³⁴Boros ka di Yesus do suminimbar, “Kotumbayaai no oi Pitrus, dot a' po koponingkukuhuk o manuk do tadau'd baino' om intolu ko no kopogolim doho'!” ka dau.

³⁵Om boro-boros noddi i Yesus dot id diyolo' do poingkaa, “Tontok di sinuhu' ku iyokoyu di gulu do minamanau di noduhan ku iyokoyu do mongigit do poiiyanan do tusin om kantung om kasut, om haro toi o kinokurangan dokoyu'ddi?” ka dau. “Aiso' i',” ka diyolo'd suminimbar.

³⁶Om boros ka kawagu di Yesus, “Nga' baino' nodti om: isai nopo i haro o poiiyanan do tusin ko' kantung, om mositi' no dot igitan dau iri; om isai nopo it aiso' o gayang, om padagangon nopo o rasuk dau dit id soibau do pomoli do gayang.

³⁷Kotumbayaai no, dot iri nopo om nokotulis no dot id Buuk do Kinorohingan do, ‘Roitan nondo iyau'd tulun dit araat,’ ka, om mositi' no dot osiliu dot id doho'. Tu' nunu nopo i nongkotulis dot id Buuk do Kinorohingan do pasal doho', om maso nori dot osiliu do dinondo,” ka dau.

³⁸Om boros ka di piro-piro o tumatanud di Yesus, “Oi Tuhan, ontong pogi', nga' haro i' o duwo o gayang do hiti,” ka diyolo'. Om boros ka di Yesus do suminimbar, “Ula' po nod boros,” ka dau.

³⁹Om tongkiad noddi i Yesus di bandar, om ongoi no do hilo'd Nulu-Nulu do Saitun, do miagal di koubasan dau. Om tanud no dau i piro-piro o tumatanud dau.

⁴⁰Om korikot poddi iyolo' do hiri, om boro-boros no i Yesus diyolo' do poingkaa, “Sambayang kou no om a' kou i' kowonsoi'd dusa do tontok dot oontok kou'd pogumbalan,” ka dau.

⁴¹Om tongkiad noddi i Yesus diyolo' do minongoi sambayang do hiri'd sodu-odu', dot orikot no doti' do momigod do watu o kosoduwo' do mantad id diyolo',

⁴²om otud no iyau om sambayang noddi do poingkaa, “Oi Apa', ondung milo no daa, om poinsoduwon no do mantad id doho' iti koinggoritan dit otimbabaan ku. Nga' a' indo tumanud di doho'd korohian, suwai ko' tumanud nopo do korohian do Tapa',” ka dau.

⁴³[Om rikot noddi o tiso' o moloikat do minongoi popokoris dau.

⁴⁴Om oinggorit tomod diri ot id suang do ginawo di Yesus, gisom do suminambayang iyau do mikuwo'd aayi-ayi' o ginawo. Om iyo poddi do raha' o lasu' dau do tumuru' do hiri'd tana'.]

⁴⁵Om kopongo poddi i Yesus do suminambayang, om guli' noddi iyau do hiri'd piro-piro o tumatanud dau. Om kabantalai no dau iyolo' dot ongkoodop tu' tumongob tomod iyolo'.

⁴⁶Om boros kaddi di Yesus dot id diyolo', “Nokuro tu' koodop kou? Tungag kou om sumambayang kou i', om a' kou i' oontok do pogumbalan,” ka dau.

⁴⁷Om maso po di Yesus do moro-boros, om korikot no o sonsinompuruan o tulun do winoyo' di Yudas, i songulun dot id pogialatan di tumatanud di Yesus. Om ongoi no i Yudas rapou di Yesus om tungubai no dau iyau.

⁴⁸Nga' boros ka di Yesus dot id di Yudas, “Oi Yudas, tunguban nu toi do papadagang i Tanak do Tulun?” ka dau.

⁴⁹Om koilaai poddi di piro-piro o tumatanud di Yesus di hino'd hiri o kootuson diri, om boro-boros no iyolo' do poingkaa, “Oi Tuhan, sumaap nopo iyahai dot iti gayang o pakayon dahai!” ka diyolo'.

⁵⁰Om haro'ddi o tiso' di tumatanud di Yesus do minonibas di susuhuon di Boyoon dot Agayo dot Imam do gayang o pinonibas, gisom do kaansap nopo o tolingo'd wanan di susuhuon diri.

⁵¹Nga' boros ka di Yesus, “Ula' nori!” ka dau. Om kamao' noddi di Yesus i tolingo di tulun diri om kolingos no.

⁵²Om boros kaddi di Yesus dot id piro-piro o boyoon dot imam om i piro-piro o soudor di madtatamong di Walai'd Sasambayangan dot Agayo, om i boyoon do tulun do Yohudi di nokorikot do hiri do mongoi panangkap dau, “Tulun oku toi'dti dot araat, tu' gisom do rumikot kou dot ongkiinigit do gayang om bobobog do mongoi panangkap doho'?

⁵³Tu' monikid tadau oku i' do poiruhang dokoyu do hilo'd Walai'd Sasambayangan dot Agayo, om a' oku i' dokoyu tinangkap. Nga' iti no o maso do kapamansayan dokoyu'd miagal diti, tu' kumaraja' no o kuasa' do totuong,” ka dau.

⁵⁴Om tangkapo' no diyolo' i Yesus om pootodo' noddi diyolo' do hiri'd walai di Boyoon dot Agayo dot Imam. Om muhut-suhut i Pitrus do hiri'd sodu'.

⁵⁵Hiri nopod tanga-tanga' di natad diri om haro o rinubpu' do tinutudan, om ongoi noddi i Pitrus irikau dot id toning di tulun di songirikau do posorili' di tapui.

⁵⁶Nga' kokito no di tiso' o susuhuon do tondu' i Pitrus do poirikau do hiri'd doros di tapui. Om sonsodo' no di susuhuon diri i Pitrus do mogintong kopio, om boro-boros nod, “Iti tulun diti nga' moyo-woyo' i' di Yesus di tiinu',” ka dau.

⁵⁷Nga' minogolim i' i Pitrus, boros ka dau, “A' oku i' kopio kotutun do tulun dino!” ka dau.

⁵⁸Nga' oruhai po do mantad diri, om kokito po kawagu do tulun do suwai i Pitrus. Boros ka dau, “Iya' nga' kinoruhangan nogi' diyolo!” ka. Nga' boros ka di Pitrus do suminimbar, “Okon i', okon oku i' ko' kinoruhangan diyolo',” ka dau.

⁵⁹Om sajaam no doti' do mantad diri, om ongoi po kawagu boro-boros dau ot iso' o tulun dot apatog o boros do poingkaa, “Atantu' no dot iti tulun diti nga' tumatanud nogi' di Yesus, tu' tulun i' iyau do Galilia!” ka.

⁶⁰Nga' boros ka di Pitrus do suminimbar, “A' oku i' koilo dino komoyon nu!” ka dau. Om maso po di Pitrus do moro-boros, om poningkukuhuk no o tandaha'.

⁶¹Om koili no i Yesus om ontong no iyau di Pitrus. Om kahandamai noddi di Pitrus i nokoboros mantad do Tuhan dot id dau do poingkaa, “A' po koponingkukuhuk o manuk do tadau'd baino', om intolu ko no kopogolim doho',” ka.

⁶²Om soliwan noddi i Pitrus do mantad hiri, om pingihad tomod no iyau.

⁶³Om iri nopo i piro-piro o tulun di madtamong di Yesus, om minomohingi-hingi om minomobog dau.

⁶⁴Om sompono' no diyolo' o mato di Yesus, om boro-boros nod, “Tonduwai daa om isai i minomobog diya'ddi?” ka no diyolo'.

⁶⁵Om ogumu' po o boros diyolo'd suwai do pongindaraat diyolo' di Yesus.

⁶⁶Om kosuabon noddi, om timung no i piro-piro o boyoon do Yohudi om i boyoon dot imam om i guru do Tourat om ongoyo' nogiddi diyolo' potimbabao' i Yesus di Gompomutus do Don Tugama'.

⁶⁷Boros ka diyolo' dot id di Yesus, “Sunudai daa iyahai, ondung iya' kopio i Raja' do Gampamasi?” ka. Om boros ka di Yesus do suminimbar, “Mulong piya do poboroson ku dot id dokoyu nga' a' kou i' otumbayaan.

⁶⁸Om ondung monguhot oku dokoyu, nga' a' kou i' sumimbar.

⁶⁹Nga' mantad pondod baino', om poirikau nondo o Tanak do Tulun do hiri'd dawananan do Kinorohingan dit Osundu Kopio,” ka dau.

⁷⁰Boros ka ngai' diyolo', “Iyo nopoddi, om Tanak ko no kopio'd Kinorohingan?” ka. Boros ka di Yesus do suminimbar, “Iyo nondo pinoboros dokoyu,” ka dau.

⁷¹Om boros ka diyolo', “A' no minog do haro o sasi'! Nokorongou ngai' toko' no di boros dau!” ka.