Read Boros Dusun John 21 Bible Online

John 21 - Boros Dusun bible

John 21

¹Om intalang poddi kawagu i Yesus dot id tumatanud dau do hilo'd Tasik Tiborias. Poingkaa o nosiliu.

²Insan o tadau, om timung no iyo Simun Pitrus, om i Tumas i roitan do Miapid, om i Natanil i mantad hilo'd Kana, i hilo'd Galilia, om i tangaanak di Sabidi, om i duwo o tumatanud di Yesus do suwai.

³Om boros kad Simun Pitrus dot id tumatanud di suwai, “Mongoi oku pokisada',” ka dau. “Tumanud iyahai,” ka diyolo'. Om ongoi no iyolo' sakai'd parau'. Nga' aiso' i' o naanu diyolo' do totuong diri, do gisom do nosuaban.

⁴Om tontok di mingungulai no o tadau, om poingkakat i Yesus do hiri'd tisan, nga' a' i' diyolo' oilaan dot i Yesus iri.

⁵Om boros ka di Yesus dot id diyolo', “Oi tangaanak ku, haro i' o sada' dokoyu?” ka dau. “Aiso',” ka diyolo'.

⁶Om boros ka di Yesus dot id diyolo', “Poromboto' dokoyu ino rambot dokoyu do hino'd dawananan dino parau', om kaanu kou id sada',” ka dau. Om poromboto' no diyolo' i rambot diyolo'. Om a' noddi iyolo' kagayat di rambot tu' ogumu' tomod o sada' do nokosulung.

⁷Om boros ka di tumatanud di kosianan kopio di Yesus dot id di Pitrus, “I Tuhan i' ilo'!” ka dau. Om korongou poddi di Simun Pitrus dot i Tuhan iri, om panangrasuk no iyau (tu' aiso' i' mantad o rasuk dau), om tuhun no iyau do hiri'd waig.

⁸Om susuhut noddi i tumatanud do suwai do poinsakai di parau' do miningisan, do mikuwo'd mamagayat iyolo' di rambot di noponu'd sada'. Om a' i' iyolo' osodu' no do mantad hiri'd disan, haro no doti' o hatus o mito do kosoduwo'.

⁹Om kolintuhun poddi iyolo' do mantad hiri'd parau', om kokito no diyolo' o popou do pinomoluguan do sada' om haro o roti'd hiri.

¹⁰Om boros ka di Yesus dot id diyolo', “Hiitio' daa o wookon di sada' di kaanu dokoyu,” ka dau.

¹¹Om suang no i Simun Pitrus di parau', om gayato' no dau i rambot dau do pinopotindal. Om noponu' nopod sada' dit angagayo i rambot diri. Om kogumuon' nopo di sada'ddi om hatus om limo nohopod om tolu o tinan. Nga' iyo piya kopio'ddi o kogumuon' di sada' nga' a' i' nohurak i rambot.

¹²Om boros ka di Yesus dot id diyolo', “Kainou makan,” ka. Om aiso' i' o tiso' di tumatanud dau do katama' do monguhot dot, “Isai ko?” ka, tu' oilaan no diyolo' dot i Tuhan iyau.

¹³Om insomok noddi i Yesus diyolo', om ngoyo' no dau i roti, om patahako' no dau diyolo'. Om i sada' nga' niyo i' dau'ddi.

¹⁴Om diri no do kointolu di Yesus do minintalang dot id tumatanud dau di napasi kawagu iyau do mantad id kapatayon.

¹⁵Om kaakan poddi iyolo' om boro-boros no i Yesus dot id di Simun Pitrus. Boros ka dau, “Simun, i tanak di Yona, agayo i' o diya'd kosianan doho' ko' mantad do kosianan diyolo' doho'?” ka dau. Om boros kad Pitrus do suminimbar, “Oo, oi Tuhan, oilaan nu i', oi Tuhan dot osianan oku diya',” ka dau. Om boros ka di Yesus dot id dau, “Gompion no i tangaanak di dumba' ku,” ka.

¹⁶Om uhoto' po kawagu di Yesus i Pitrus do koinduwo, “Oi Simun, i tanak di Yona, osianan ko i' doho'?” ka. Om boros kad Pitrus do suminimbar, “Oo, oi Tuhan. Oilaan nu i' dot osianan oku diya',” ka dau. Om boros ka di Yesus dot id dau, “Gompion no i dumba' ku,” ka.

¹⁷Om uhoto' po kawagu di Yesus i Pitrus do kointolu dot, “Oi Simun, i tanak di Yona, osianan ko i' doho'?” ka dau. Om tumongob diri i Pitrus tu' intolu nopo i Yesus ponguhot dau. Om boros ka kawagu di Pitrus do suminimbar, “Tuhan, oilaan nu i' o koinsanai'd nunu nopo. Om oilaan nu i' oi Tuhan, dot osianan oku diya'!” ka dau. Om boros kaddi di Yesus dot id dau, “gompion no i dumba' ku.

¹⁸Otopot no kopio iti poboroson ku do nopo dit omulok ko po om mimpori-pori ko i' do manangagkos, om mongoi ko do honggo nopo o korohian nu'd ngoyon nu. Nga' molohing ko nopondo, om poroloyon nu no o longon nu, om tulun indod suwai o mongogos diya' om pakaa diya' dot id kinoiyonon dit a' nu korohian do mongoi,” ka dau.

¹⁹(Om kinapamarasan nopod i Yesus do miagal diri nga' popoilo do kowoyo-woyoo' di Pitrus dot apatai do koimbagu do popoinggayo'd Kinorohingan.) Om boros kaddi di Yesus dot id di Pitrus, “Tanud no doho'!” ka dau.

²⁰Koili no i Pitrus, om kokito no dau i tumatanud di kosianan kopio di Yesus. (Iyau no i minirikau dot id toning di Yesus do tontok di minakan, om i minonguhot dau dot, “Tuhan, isai kopio o papadagang diya'?” ka.)

²¹Om uhoto' noddi di Pitrus i Yesus di nokito dau i tumatanud diri, “Tuhan, poingkuro no'lo'?” ka dau.

²²Nga' boros ka di Yesus, “Ondung korohian ku do poimpasi kasai' ilo' do gisom do korikatan ku, om okon i' ko' iya' o monongkoilo. Nga' tanud nopo pogi' iya' doho'!” ka dau.

²³Om kotongkop noddi o habar dot id pogialatan di tumatanud di Yesus dot a' matai i tumatanud diri. Om a' i' di Yesus nokoboros dot a' matai i tumatanud diri, tu' pinoboros nopo dau om poingkaa no, “Ondung korohian ku'd poimpasi iyau do gisom do korikatan ku, om okon i' ko' iya' o monongkoilo,” ka.

²⁴I Yohanis no i pinopoboros do pasal do koinsanai di nongosiliu'ddi, om iyau i minonulis diti. Om oilaan toko' i' dot ongotopot i pinoboros dau.

²⁵Om ogumu' po o suwai ko' iti do winonsoi di Yesus. Om ondung tulison ngai' daa iri, om osorou ku dot a' i' orumpos do hiti'd pomogunan i buuk do ponulisan diri.