Read Boros Dusun John 4 Bible Online

John 4 - Boros Dusun bible

John 4

¹Om korongou noddi i tulun do Parisi dot ogumu-gumu' o tulun di nosiliu'd tumatanud di Yesus om ogumu' o nobotisan dau ko' mantad di Yohanis.

²(Nga' otopot nopo kopio om a' i' i Yesus minamatis, tu' iri no i tumatanud dau o minamatis.)

³Om soira'ddi noilaan di Yesus do nokorongou i tulun do Parisi do pasal diri, om tongkiad no iyau do mantad hilo'd Yudia om poguliai no dau do hilo'd Galilia.

⁴Om tontok di pakayaan dau do hilo' om a' no milo dot a' iyau kawaya' do hilo'd Samaria.

⁵Om korikot noddi i Yesus dot id iso' o bandar do hilo'd Samaria di roitan do Sikar, it a' i' osodu' no do mantad id tana' di pinatahak di Yakub dot id di Yusup, i tanak dau, di gulu po.

⁶Om hilo' no i torobong di Yakub. Om ohuyan tomod diri i Yesus do minamanau, om irikau no iyau do hiri'd tisan di torobong. Om tontok nopoddi nga' jam kohopod om duwo no doti' do pitangaadau.

⁷Om nokoongoi no i tumatanud di Yesus do hiri'd bandar do minongoi boli do taakanon. Om korikot noddi o songulun o tondu' do Samaria do mongoi sago'. Om boros ka di Yesus dot id dau, “Poinumo' oku daa,” ka.

⁸

⁹Om boros ka di tondu' do Samaria do suminimbar, “Iya' nopo oi Tuan, om bansa'd Yohudi, om iyoho' no om bansa'd Samaria; om nokuro tu' mokiinum ko doho'?” ka dau. (Tu' bansa' nopod Yohudi om a' i' kopio mongoi ponongkokuro-kuro do bansa'd Samaria.)

¹⁰Om boros ka di Yesus do suminimbar, “Ondung koilo ko daa di nipuhawang do Kinorohingan om ondung isai i mokiinum diya', om atantu' no dot iya' daa o mokiinum dau, om oonuan ko indo dau di waig do kapasi,” ka dau.

¹¹Om boros ka di tondu', “Aiso' i' o ponimbauk nu'ndo oi Tuan, om aralom i' moti' kopio iti torobong diti. Nga' honggo o ngayan nu'd waig di kapasi, oi Tuan?

¹²I Yakub i', i taki-aki dahai o minanahak dahai diti torobong. Om hiti i' o nangayan dau di waig dot inumon dau; om i tangaanak om i tayam-tayam dau nga' hiti i' o ninuman. Om sorohon nu daa'ddi dot agayo ko iya' ko' i Yakub?” ka di tondu'.

¹³Om boros ka di Yesus, “Iri nopo tulun di monginum do waig diti om tuuhan i' kawagu,

¹⁴nga' iri nopondo tulun di koinum do waig di patahakon ku, om a' no koumbal kawagu do tuuhan do gisom dot alaid. Tu' iri nopondo waig di patahakon ku dau om sumiliu nondo do miagal do tudan do waig dot id suang dau om sumimpulak do sumoliwan om manahak dau iri do koposion dit otopot kopio om i poingompus,” ka dau.

¹⁵Om boros ka di tondu'ddi, “Tuan, onuwai oku daa do waig dino, om a' oku i' tuuhan kawagu; om a' oku minog do gumuli'd hiti do mongoi sago',” ka dau.

¹⁶Om boros ka di Yesus, “Ngoyo' po lohowo' i sawo nu, om gumuli' nogindo'd hiti,” ka dau.

¹⁷Om boros kaddi di tondu' do suminimbar, “Aiso' i' o sawo ku,” ka dau. Om boros ka di Yesus, “Otopot i' ino boros nu dot aiso' o sawo nu.

¹⁸Tu' inglimo ko no kakawin, om iri nopo kusai di poinsugku' diya' do dinondo om okon i' ko' sawo nu,” ka dau.

¹⁹Om boros kaddi di tondu', “Oilaan ku noddi do nabi ko, oi Tuan.

²⁰Iri nopo i komolohingan dahai om hiti id nulu-nulu'dti o tiyonon do sumambayang dot id Kinorohingan, nga' boros ka di bansa' nu om hilo' nod Yorusalim o tiyonon do tulun do sumambayang dot id Kinorohingan,” ka dau.

²¹Om boros ka di Yesus dot id dau, “Ponongkuyaai no, do rumikot indo o maso do sumambayang o tulun dot id Tapa', dot okon nondo ko' hiti'd nulu- nulu'dti om okon ko' hilo'd Yorusalim.

²²Iyokoyu nopo i bansa'd Samaria om a' i' kotutun di sambayangan dokoyu, nga' iyahai nopo i bansa'd Yohudi om kotutun i' di sambayangan dahai, tu' iri i bansa'd Yohudi o milo do popoilo do ralan do Kinorohingan do mamasi'd tulun.

²³Nga' rumikot indo o maso, om otopot nopo kopio om nokorikot no, do sumambayang nondo o tulun dot id Tapa' do woyoon di Rusod do Kinorohingan, om otutunan kopio diyolo' do Kinorohingan iyau dit otopot, do miagal di korohian do Tapa'.

²⁴Tu' Kinorohingan nopo om Rusod i', om isai nopo i sumambayang dot id Kinorohingan om mositi' nod woyoon di Rusod do sumambayang dot id dau do tumanud dit otopot,” ka dau.

²⁵Om boros kaddi di tondu'ddi dot id di Yesus, “Koilo oku i' do rumikot nondo i Raja' do Gampamasi (i roitan do Kristus). Om korikot nopondo iyau, om momisunud nondo iyau dati' do koinsanai'd nunu nopo,” ka dau.

²⁶Om boros ka di Yesus, “Iyoho' nogi' bo iyau'ddi, iyoho' i moro-boros diya' do dinondo,” ka dau.

²⁷Om koguli' noddi i tumatanud di Yesus. Om osuayan tomod daa iyolo' do nokokito di Yesus do monokiboro-boros do tondu'. Nga' aiso' i' o tiso' diyolo' do minonguhot di tondu' dot, “Nunu daa o pokionuon nu oi inan?” ka, ko' minonguhot po di Yesus do, “Nokuro tu' monokiboro-boros ko di tondu'ddi, oi Guru?” ka.

²⁸Om tongkiadai nopo di tondu'ddi i kakanan dau'd hiri, om panangkus no iyau do minongoi'd hiri'd bandar, om boro-boros no iyau di tulun do hiri.

²⁹Boros ka dau, “Kainou mongoi solowot di tulun di minomisunud doho' do koinsanai'ddi nongowonsoi ku. Om okon tuu ko' iyau nogi' i Raja' do Gampamasi'ddi?” ka dau.

³⁰Om tongkiadai ngai' nopoddi di tulun i bandar om ongoi no iyolo' solowot di Yesus.

³¹Om daamot nopoddi om angatai no di tumatanud di Yesus, i Yesus do minakan. Boros ka diyolo', “Guru, akan,” ka.

³²Nga' boros ka di Yesus do suminimbar, “Haro i' o takanon ku dit a' dokoyu oilaan,” ka.

³³Om timpuun noddi i tumatanud dau do minogiuhot-uhot. Boros ka diyolo', “Haro tuu o tulun do minongoi dau paatod do taakanon?” ka.

³⁴Om boros kaddi di Yesus, “Taakanon ku nopo om i tumanud do korohian di minonuhu' doho', om momongo di karaja' di pinatahak dau dot id doho'.

³⁵Boros ka daa dokoyu om, ‘Apat po tulan om mongomot no!’ ka. Nga' monuhu' oku no dokoyu do montong dilo koumaan, tu' nongoonsok no ilo tua' dilo songintanom, om osuhatan nod tomoton!

³⁶Iri nopo tulun di mongomot om kaanu i' dot isomuli', om momoyo' do tulun do rumikot dot id koposion dit otopot kopio om i poingompus. Om iyo noddi dot otood goduwo i tulun di minananom om i tulun di mongomot.

³⁷Om otopot no kopio o komoyon do boros di poingkaa, ‘Suwai o tulun do mananom, om suwai o tulun do mongomot,’ ka.

³⁸Suhuon ku iyokoyu do mongoi pongomot do hilo'd tumo dit okon ko' iyokoyu o minananom; nakakaraja' no o tulun do suwai'd hilo', om iyokoyu nopo om mongoi po panganu di hasil di karaja' diyolo',” ka di Yesus.

³⁹Om ogumu'ddi o tulun do Samaria do mantad id bandar diri do notumbayaan di Yesus, tu' minomoros i' i tondu' dot, “Poboroso' ngai' nopo dau dot id doho' i nongoumbalan ku'd momonsoi,” ka.

⁴⁰Om tontok di nokosolowot di Yesus i tulun do Samaria, om sansagai no tomod diyolo' i Yesus do mundorong do hiri'd kinoiyonon diyolo'. Om undorong poddi i Yesus do hiri do solinaid do duwo o tadau.

⁴¹Om koruhangai poddi o ginumu' do tulun di notumbayaan di Yesus do nokorongou iyolo' di ponudukan dau.

⁴²Om boros ka diyolo' dot id tondu'ddi, “Monongkuyaan noddi kopio iyahai, nga' okon no ko' i pinoboros nu dot id dahai o nokoponongkuyaan dahai, nga' iyahai'ddi kopio o nokorongou dau, om koilo iyahai dot iyau no kopio o Gampamasi do tulun do hiti'd pomogunan,” ka diyolo'.

⁴³Om katalib poddi o duwo o tadau do poundorong i Yesus do hilo'd Sikar, om ongoi no iyau do hilo'd Galilia.

⁴⁴Om nokoboros i' i Yesus do poingkaa, “Nabi nopo om a' i' pusohon dot id pomogunan dau,” ka.

⁴⁵Nga' di nopo di nokorikot iyau do hilo'd Galilia, om ongosonong tomod i' o ginawo di tulun do hilo' do suminuwau dau, tu' hilo' i' iyolo'd Yorusalim do tontok di Tadau'd Agayo do Paska, om nongkokito ngai' iyolo' di winonsoi di Yesus do hilo'.

⁴⁶Om guli' noddi i Yesus do hilo'd Kana, i hilo'd Galilia, i pinamansayan dau do waig dot anggur dot i waig toomod o winonsoi. Om hiri nopod bandar diri nga' haro o songulun o pagawai do pomorinta' di maso'd sumakit o tanak do hilo'd Kapornaum.

⁴⁷Om soira'ddi nokorongou iyau do nokorikot i Yesus do hilo'd Galilia do mantad hilo'd Yudia, om ongoi no iyau solowot di Yesus om angatai no dau i Yesus do mongoi'd hilo'd Kapornaum do mongoi pomolingos di tanak dau di motingkapatai no.

⁴⁸Om boros ka di Yesus dot id pagawai do pomorinta'ddi, “Ondung a' kou kokito do koimayaan om a' kou i' otumbayaan,” ka.

⁴⁹Om boros ka di pagawai do pomorinta', “Tuan, kaino kopio, dot a' po apatai i tanak ku,” ka dau.

⁵⁰Om boros ka di Yesus dot id dau, “Pamanau no, tu' nolingasan no i tanak nu,” ka. Om ponongkuyaai nopo i tulun diri di boros di Yesus, om pamanau no iyau.

⁵¹Om hiri noddi iyau'd tanga'd ralan om korikot no i susuhuon dau do minongoi pomisunud dau do, “Nolingasan no i tanak nu, oi Tuan,” ka diyolo'.

⁵²Om uhoto' noddi dau iyolo' ondung jam kopiro do nolingasan i tanak dau. Om boros ka diyolo', “Di jam koiso' doti'ddi di konihab do notingkod i sogiton dau,” ka.

⁵³Om kosorou noddi di tapa' di tanak diri do tontok noddi do minomoros i Yesus dot id dau do, “Nolingasan no i tanak nu,” ka. Om kotumbayaai noddi iyau di Yesus om i sompiiyon dau nga' koinsanai nopo do notumbayaan di Yesus.

⁵⁴Iri no o koimayaan di koduwo do winonsoi di Yesus do hilo'd Galilia di nokoguli' iyau do mantad hilo'd Yudia.