Read Boros Dusun John 7 Bible Online

John 7 - Boros Dusun bible

John 7

¹Id tohuri noddi ko' iri om pimpanau no i Yesus do hilo'd Galilia. Nga' a' no iyau minongoi do hilo'd watas do Yudia tu' mokipamatai no dau i tongoboyoon do bansa'd Yohudi.

²Om tontok nopoddi nga' oruhai nod orikot i Tadau'd Agayo do Kinuhub-Kuhub.

³Om boros kaddi di piro-piro tobpinai di Yesus dot id dau, “Tongkiad nogi' do mantad hiti om mongoi i' do hilo'd Yudia, om kokito indo i tumatanud nu diti wonsoyon nu.

⁴Aiso' i' o tulun do momolisok-lisok di wonsoyon dau ondung orohian iyau'd abantug. Om ondung momonsoi ko do miagal diri, om apatut i' do kongoilo o pointongkop diti pomogunan!” ka diyolo'.

⁵(Tu' iri piya tongotobpinai di Yesus nga' a' i' monongkuyaan dau.)

⁶Om boros ka di Yesus dot id diyolo', “A' po norikot i maso ku. Nga' iyokoyu nopo om soira-ira' nopo nga' milo i'.

⁷Iyokoyu nopo om a' i' karaatan diti tulun do hiti'd pomogunan. Nga' iyoho' nopo om atantu' no do karaatan diti tulun do hiti'd pomogunan, tu' poboroson kasai' ku i' dot id diyolo' dot araat o wonsoyon diyolo'.

⁸Ongoi kou nopo iyokoyu dot id karamayan diri. A' oku i' iyoho' mongoi tu' a' po norikot o maso ku,” ka dau.

⁹Om iyo noddi o pinoboros di Yesus dot id piro-piro o tobpinai dau, om undorong poddi iyau do hilo'd Galilia.

¹⁰Om kapamanau poddi i tongotobpinai di Yesus do minongoi rapou di Tadau'd Agayo'ddi, om ongoi nogiddi i Yesus iyau dot iso-iso', om a' i' iyau noilaan do tulun.

¹¹Om solinaid nopo do karamayan diri om mingihum po dau i tongoboyoon do tulun do Yohudi om minguhot dot, “Hinonggo iyau?” ka no diyolo'.

¹²Om ogumu'ddi o tulun do minogikonos-konos dot i Yesus o komoyon. Om haro o momoros dot, “Iyau nopo om tulun dot osonong,” ka. Om haro kawagu o momoros dot, “Okon! Mamalid i' iyau do tulun dot ogumu'!” ka no.

¹³Nga' aiso' i' o tiso' diyolo' do katama' kopio do popimboros do pasal dau tu' ooris i' iyolo' di tongoboyoon do tulun do Yohudi.

¹⁴Om piintangaan noddi di karamayan diri, om suang no i Yesus di Walai'd Sasambayangan dot Agayo, om timpuun no iyau do minonuduk.

¹⁵Om ongosuayan tomod diri i tongoboyoon do tulun do Yohudi om boro-boros no iyolo', “Poingkuro kopio dot ogumu' o toilaan diti tulun, om a' i' insan kosikul?” ka no.

¹⁶Om boros ka di Yesus do suminimbar, “Iti nopo potudukon ku'dti om okon i' ko' doho'd ponudukan, suwai ko' ponudukan di minonuhu' doho'.

¹⁷Iri nopo tulun dit orohian do tumanud do korohian do Kinorohingan om koilo i' ondung mantad id Kinorohingan ko' mantad id doho' toomod iti ponudukan ku.

¹⁸Tulun nopoddi popotuduk di dau'd ponudukan, om mogihum no do kosuahan do tinan dau. Nga' tulun nopo di mogihum do kosuahan do bagi' di minonuhu' dau om otulid i' o ginawo, om a' kopio iyau mongudut.

¹⁹A' kou toi noonuan no di Musa di Tourat? Nga' aiso' i' o tiso' dokoyu do tuminanud di Tourat diri. Nokuro daa tu' pokipapatayan oku dokoyu?” ka dau.

²⁰Om boros ka di tulun dot ogumu' do suminimbar, “Mulau ko indo! Isai daa o sipamatai diya'?” ka diyolo'.

²¹Om boros ka di Yesus do suminimbar, “Iso' noo o karaja' do winonsoi ku di tadau'd Sabat, om osuayan kou no.

²²Nonuan kou di Musa do toturan do monunat, mulong piya dot otopot nopo kopio om okon i' ko' i Musa o tadon di sunat diri suwai ko' i komolohingan dit id gulu ko' i Musa. Om iri noddi o ponguwaan dokoyu, do tadau piya'ddi do Sabat nga' monunat kou i' do tulun.

²³Ondung wonsoyon dokoyu o miagal diri do mada' do kotolibamban di Tourat di Musa do pasal do monunat, om nokuro tu' otogod kou doho' do momolingos do tulun do gisom dot osonong kopio o tinan dau do tontok do tadau'd Sabat?

²⁴Kada' kou pomutus do tulun dot it okito dokoyu o maan do poimpahan do momutus, suwai ko' poimpahan nopod momutus om it otulid,” ka di Yesus.

²⁵Om haro'ddi o piro-piro o tulun di hilo'd Yorusalim do minomoros dot, “Okon toi ko' iti nogi' i tulun dit ihum-ihumon do maan patayo'?

²⁶Ontong pogi' nga' mimboros nopo moti' iyau dot id toguang do tulun dot ogumu', om aiso' i' o tiso' piya'd tulun do moro-boros do sumaap dau! Nokoilo no tuu'ddi i tongoboyoon toko' dot ilo' kopio i Raja' do Gampamasi?

²⁷Nga' iri nopo i Raja' do Gampamasi do rumikot om aiso' i' o tongoiso' piya'd tulun do koilo do tadon dau! Nga' iti nopo tulun diti om oilaan toko' i' o tadon,” ka diyolo'.

²⁸Om maso poddi di Yesus do monuduk do hiri'd Walai'd Sasambayangan dot Agayo, om boro-boros no iyau dot opuhod do poingkaa, “Kotutun kou i' kopio doho'ndo, koilo kou i' do tadon ku? A' oku i' ruminikot do tumanud do doho'd korohian, suwai ko' sinuhu' oku i' dau, iyau i kikuasa' do monuhu' doho', om milo i' iyau do ponongkuyaanan. Nga' iyokoyu nopo om a' i' kotutun dau.

²⁹Iyoho' nopo om kotutun i' dau tu' mantad oku i' dot id dau, om iyau no i minonuhu' doho',” ka dau.

³⁰Om tontok no daa'ddi do tangkapon diyolo' i Yesus, nga' aiso' iddi o katama' kopio do mongoi pomusus dau, tu' a' po norikot i maso dau.

³¹Om ogumu' noddi ot id pogialatan di tulun diri do monongkuyaan dau, om momoros dot, “Ondung korikot i Raja' do Gampamasi, om ogumu' po tuu o koimayaan do wonsoyon dau ko' mantad di winonsoi do tulun diti?” ka diyolo'.

³²Om korongou no di tulun do Parisi i pogikanas-kanasan di tulun dot ogumu'ddi do pasal di Yesus. Om iri noddi o kinoponuhuan diyolo' om i boyoon dot imam, do piro-piro di madtatamong do Walai'd Sasambayangan dot Agayo do mongoi panangkap di Yesus.

³³Om boros ka di Yesus dot id tulun dot ogumu' di hiri'd Walai'd Sasambayangan dot Agayo, “A' oku no alaid do poinsugku' dokoyu. Om gumuli' oku nondo dot id dau, i minonuhu' doho'.

³⁴Om ihumon oku daa'ndo dokoyu nga' a' oku no dokoyu okito; tu' a' kou i' milo'd mongoi do hilo'd kinoiyonon di koongoyon ku,” ka dau.

³⁵Om pogiboro-boros noddi i tongoboyoon do tulun do Yohudi do poingkaa, “Honggo'ddi kopio o ngoyon do tulun diti gisom dot a' toko' iyau osolowot? Mongoi tuu iyau do hilo'd tulun do Yohudi di poundorong do hilo'd pomogunan do suwai, i hilo'd pogialatan do tulun do Yunani, om monuduk nondo iyau di tulun do Yunani?

³⁶Nunu tuu o komoyon dau di boros dau do mogihum toko' piya dau nga' a' toko' no iyau osolowot om a' toko' milo'd mongoi do hilo'd kinoiyonon di ngoyon dau?” ka diyolo'.

³⁷Tontok di tadau do kooyion no do karamayan diri, i tadau dit agayo kopio, om ingkakat no i Yesus do hiri'd Walai'd Sasambayangan dot Agayo om pomoros nod opuhod do poingkaa, “Isai nopo o tulun di tuuhan om rumikot no dot id doho' do mongoi inum.

³⁸Om nokotulis no dot id suang do Buuk do Kinorohingan, dot i tulun dit otumbayaan doho' o komoyon do poingkaa, ‘Lumuyung nondo o waig di manahak do koposion do mantad id ginawo dau,’ ka,” ka di Yesus.

³⁹(Komoyon nopo di Yesus diri nga' i Rusod do Kinorohingan, it aramit do koinsanai'd tulun di monongkuyaan dau. Tontok nopoddi om a' po nakatahak i Rusod do Kinorohingan; tu' a' po i Yesus nokoinggayo tu' a' po iyau napatai om a' po napasi kawagu do mantad id kapatayon.)

⁴⁰Om ogumu' o tulun do nokorongou di pinoboros di Yesus, om haro ot id pogialatan diyolo' do momoros dot, “Atantu' no dot i Nabi ilo tulun dilo'!” ka.

⁴¹Om iri no suwai om momoros dot, “Ilo' no i Raja' do Gampamasi!” ka. Nga' haro i' o momoros dot, “A, do hilo' kopio tuu'd Galilia o tadon di Raja' do Gampamasi?

⁴²Id suang nopod Buuk do Kinorohingan om iri nopo Raja' do Gampamasi om sinakagon i' di Daud om mantad hilo'd Baitlahim, i kampung di Daud,” ka diyolo'.

⁴³Alaid noddi om mogisosongkiwal diri i tulun dot ogumu' do pasal di Yesus.

⁴⁴Om haro i sipanangkap daa dau, nga' aiso' i' o tiso'd tulun do minongoi pomusus dau.

⁴⁵Om soira'ddi nokoguli' i madtatamong di Walai'd Sasambayangan dot Agayo, i sinuhu' daa do minongoi panangkap di Yesus, om uhoto' no iyolo' di piro-piro boyoon dot imam, om i tulun do Parisi. Boros ka diyolo', “Nokuro tu' a' dokoyu iyau nigitan do hiti?” ka.

⁴⁶Om boros ka di piro-piro madtatamong do suminimbar, “A' po nokoumbal do haro o tulun do minimboros dot iyo kopio dau!” ka.

⁴⁷Om boros ka di piro-piro tulun do Parisi, “Do napalid kou i' pama iyokoyu piya?

⁴⁸Haro ot id pogialatan di piro-piro boyoon toko' om i tulun do Parisi do monongkuyaan dau?

⁴⁹Nga' iti nopo tulun dot ogumu' diti om a' i' kosuhut di Tourat di Musa, om poingkuro piya nga' nousung mantad no iyolo',” ka diyolo'.

⁵⁰Iri nopo songulun dot id pogialatan di tulun do Parisi'ddi nga' i Nikodimus, i nokoumbal do minongoi solowot di Yesus. Om boros ka di Nikodimus dot id tulun do Parisi di suwai,

⁵¹“Tumanud nopo do Tourat, om a' i' koino-ino do hukuman ot isai nopo o tulun dot a' po orongou o boros di tulun, om a' po osorisid kopio i winonsoi dau,” ka dau.

⁵²Om boros ka diyolo' do suminimbar, “Mantad ko i' pama iya' do hilo'd Galilia? Sorisido' nopo pogi' ilo Buuk do Kinorohingan! Om okito nu indo dot aiso' i' o nabi do mantad hilo'd Galilia!” ka diyolo'.